Чааҷылар аймах пӧгiннер толдырчалар
12.08.2026
Хабарлар
Хакасия пазының орынҷызы Михаил Побызаков бригада чааҷыларын профессия ӱлӱкӱнiнең алғыстапча
Пайрам. 6 орғахта Россияда чыл сай Тимiр чол войсколарының кӱнiн таныхтапчалар. Пӱӱл хазнаның ӧнетiн войсколарына 175 чыл тол парды
Россияның тимiр чол войсколары постарының 175 чыллығ тархынында саблығ чол ирткеннер. 6 орғахта 1851 чылда император I Николай позының пӧзiк Указынаң «Санкт-Петербург – Москва тимiр чолның устанызынаңар положениенi» чарат салған. Аны хоостыра тилекейде пастағызын на тимiр чолларны хадарҷаң паза оларда тоғынҷаң ӧнетiн чааҷы пiрiгiстерi тӧстелгеннер. Пастап ол пiрiгiстерде 4340 чааҷы саналған, оларны 17 ротаа пӧл салғаннар. Чаа тимiр чол ведомствозын тӧстирiнде Россия тилекейде пастағы хазна полған, ол туста пiр дее хазнада андағ структура чох полған.
Позының прай 175 чыллығ чолында тимiр чол войсколары хазнаның стратегия кӧстеглiг аймах пӧгiннерiн толдырғаннар. Илбек Ада чаа тузында олар чаа эшелоннарын ӱзiгi чох чӧргiскеннер, прай ол тоғыс ыырҷының бомбардировкаларында паза диверсияларында апарылған. Олар иңзерiлген тахталарны, чолларны, суғ кизiре кичiглернi тыхтап турғаннар. Чааҷы-тимiрчолҷылар чаа чылларында 120 муң азыра километр чолларны, муңарлап тахта паза переезд тыхтааннар. Чаа соондағы чылларда Байкал – Амур магистральын пӱдiрерiне салымнығ хозым иткеннер. Совет тузының ол иң улуғ инфраструктура проектi полған, тағлар ӧтiре тоннельлерҷе, хайылбинчатхан чирлерҷе паза тайғаларҷа чааҷы-тимiрчолҷылар, гражданскай пӱдiрiгҷiлернең хада, чол салғаннар.
Ам Россияның тимiр чол войсколары арачыланыс министерствозының структуразына тылдаң хабасчаң ӧнетiн войсколары чiли кiрчелер. Анда 25 муң чааҷы служба иртче. Аның частьтары прай хазнада, кидеркi хырығлардаң сығара Ыраххы Востокка теере орныхчалар. Хазнаның арачыланыс кирексiнiстерi хоостыра войсколар тимiр чол объекттерiн пӱдiрер, тыхтир, тоғындырар пӧгiннер толдырчалар. Iдӧк олар транспорт инфраструктуразын тилiдерiнҷе улуғ национальнай проекттернi чуртасха кирерiнде араласчалар. Амды ӧӧн пӧгiннернiң пiрсi – БАМ-ны паза Транссибирь магистральын алғыдары паза нааҷылиры.
6 орғахта прай хазнада, тимiр чол войсколарының ӧӧн бригадалары орныхчатхан орыннарда пайрамнығ мероприятиелер иртiрiлгеннер. Аңдағ пайрам ирткен Ағбанда орныхчатхан Хызыл Знамялығ Познанскай 5-ҷi алынҷа тимiр чол бригадазында. Аның культура туразының улуғ залында бригаданың чааҷылары паза ветераннары одырғаннар. Сценазар Россияның, тимiр чол войсколарының паза бригаданың флагтарын чааҷылар киргеннер, Россияның паза Хакасияның гимннерi толдырылған соонда, трибуназар бригаданың командирi, полковник Андрей Баринов хығыртылған. Ол бригаданың тархындағы саблығ чолынаңар, чааҷыларның махачы, сындырлығ тудынызынаңар чоохтаан, чааҷыларны ӱлӱкӱннең алғыстаан паза службада наа чидiглер алғаан. Iдӧк командир ведомствоның ӧӧркi пастыхтарының алғыстастарын читiрген.
Анаң Андрей Баринов Россияның арачыланыс министерствозының, Тимiр чол войсколарының Ӧӧн устааның паза бригаданың устааның приказтарынаң сыйыхтатхан чааҷыларға медальлар, алғыстас пiчiктерiн, танығлар читiрген. Сыйыхтар алғаннар аразында адалғаннар лейтенант Андрей Боргояков паза сержант Сергей Сазанаков. Андрей алғыстас пiчиин алған, Сергей «Тимiр чол войсколарының отличнигi» таныға турысхан.
Чааҷыларны iдӧк профессия ӱлӱкӱнiнең алғыстаан Хакасияның Ӧӧркi Чӧп кнезi Сергей Сокол. Хайди ол таныхтаан, Хакасияа уғаа оң полған. 50 чыл республикада Хызыл Знамялығ Познанскай 5-ҷi алынҷа тимiр чол бригадазы орныхча. Ол Россияның тимiр чол войсколарының иргi пiрiгiзi полча, пазағы чылда бригаданың 95-ҷi чылы таныхталар. Прай ирткен чылларда чааҷылар, тимiр чолларны пӱдiрiп, тыхтап, объекттернi тоғысха тимнеп, пӧзiк профессионализм кӧзiтчелер, улам Сибирьнiң сидiк климадында. Ам чааҷылар ӧнетiн чаа операциязы зоназында транспорт инфраструктуразын иптiг тудар чаа пӧгiннерiн толдырчалар.
Сергей Михайлович, чааҷыларны профессия ӱлӱкӱнiнең алғыстап, оларға службада пӧзiк чидiглер, чахсы чуртас, пик хазых алғаан. Анаң Ӧӧркi Чӧптiң алғыстас пiчiктерiн службаны чахсы апарчатхан чааҷыларға читiрген. Андағ пiчiктер алғаннар санында пазох Сергей Сазанаков полған.
Сценазар чоох тударға Хакасия пазының орынҷызы Михаил Побызаков сыххан. Ол, iдӧк тимiр чол бригадазының чааҷыларын ӱлӱкӱннең алғыстап, Хакасия пазы Валентин Коноваловтың алғыстазын читiрген. Михаил Анатольевич позының чооғында Сойан-Сус ГЭС-та полған техногеннiг саайда чааҷы-тимiрчолҷыларның, посха айабин, махачы тоғызын таныхтаан. Хайди Хакасия пазы ол туста полған Виктор Зиминнiң устаанынаң саай салтарларын чох идерiнде тимiр чол бригадазы салымнығ хозым иткенi таныхталған.
Михаил Побызаков, чооғын тоозып, службада чахсы кӧзiдiмнер кӧзiтчеткен чааҷыларға республика правительствозының алғыстас пiчiктерiн читiрген.
Пайрамнығ чыылығ тузында сыйыхтар алчатханнар санында iкi хати таныхталған Сергей Сазанаковнаң хысха даа чоох алызарға оң полған. Сергей Гаврилович Сазанаковтың тӧреен, ӧскен чирi – Асхыс аймаандағы Кызлас аал. Ортымах ӱгредiглiг школаны ол 2007 чылда олох аалда тоосхан. 2008 – 2010 чылларда срочнай чааҷы службазын Сухопутнай войсколарда Хабаровск городта ирткен. Анда ол, пасталығ ӱгредiг курстарын иртiп, позы чиит чааҷыларны службаа кӧнiктiрген.
Пайрамнығ чыылығда iкi хати сыйыхтатхан сержант Сергей Сазанаков
Армия соонда Сергей Ағбанда орныхчатхан тимiр чол бригадазында служба иртерге контракт идiп алып, амға теере службаны узаратча. Ол отделение командирi полча, службаны маңнаныстығ апарча. 2016 чылда ХГУ-ны чуртасты хорғыс чох апарары (БЖ) специальностьча тоосхан, iдӧк служба тузында чаа академиязын 2013 чылда тоозарға маңнанған. Позы Ағбанда сӧбiрелiг чуртапча, ипчiзi Наталья пос киреенең айғасча, iкi пала ӧскiрчелер. Мыннаң мындар планнар кӧп тiпче Сергей Гаврилович.
Сомнар Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
