Хада-пірге тудынарға кирек
07.08.2026
Хабарлар
Чалаң чӧрерге хайдағ хынығ!
Хабазығ. СВО ветераннары, оларның сӧбірелері хазна саринаң сыбыра хайығда тудылчалар. Iди ӱр ниместе Хакасиядаң андағ 60 артиинаң кізі «Чигірен ат» тынағ-спорт комплексінде аалҷы полған
Хазнабыстың «Чир-суубыс арачылағҷылары» фондының Хакасиядағы пӧлии Украина чирінде парчатхан ӧнетін чаа операциязында араласхан республикадағы ветераннарны, оларның сӧбірелерін «Чигірен ат» тынағ-спорт комплексінзер пір кӱнге апар килген. Андар парарға Харатас, Сорығ городтардаң, Орджоникидзе паза Таштып аймахтарынаң сурыныс пічіктері кірген полған. Парчан 60 артиинаң кізі чыыл парған.
СВО махачыларына, оларның сӧбірелеріне уғаа алғым программа тимнелген полтыр. Улуғларны даа, кічіглерні дее хынығ экскурсияа апарғаннар, чалаң ойлат чӧрер оңдай пирілген. Пурунғы фаэтон-хаңаалығ чӧрерге чапсых пілдірген. Че прайзына даа чапсых полған пу комплексте чуртапчатхан аттарнаң, адайларнаң, аңыҷахтарнаң чағын танызып аларға. Олар кізее уғаа паарсахтар. Аннаңар оларны азырирға, ӱр нимес ойнап таа аларға чаратчалар.
Кӧрген ползар андағ туста СВО ветераннарын, оларның сӧбірелерін, уламох оолағастарын. Хайзының даа сырайында ӧрчiліг кӱлімзірес чітпинчеткен. Анаң олар стол кистінде ізіг чей ізіп одырғаннар, тынағ кӱнні хайди хынығ паза тузалығ иртіргенін сағысха кир турғаннар. Полғанының на искірҷең чапсых чоох табылчатхан.
«Хайдағ таңнастығ чарых кӱн полды піске. Чорых прайзыбыстың даа кӧңніне кірген. Мин позым чалаң чӧрерге тың хынғам. Оолағым хаски адайнаң саңай майыхханҷа ойнаан, чарылызарға даа хынминчатхан. Кізі кӧңнін саңай тибіретчеткен орыннар Ағбан хыринда табылчатханы уғаа ӧріністіг. Пісті андар ызар оңдай тапхан пастыхтарға улуғ алғызыбыс читірчебіс, – таныхтаан Украина чирінде парчатхан ӧнетін чаа операциязында чиит чуртазын пир салған махачының хада хонғаны Елена Бажина. – Оолағымны саңай пасха саринаң чахсы піліп алдым...»
СВО ветераннарын, оларның cӧбірелерін «Чигірен ат» тынағ-спорт комплексінзер ал чӧрері «Чир-суубыс арачылағҷылары» фондтың республика пӧлиинде чахсы кибірге айлан парир. Аннаңар сурыныс пічии хоостыра ай сай даа піреезі хайди даа тынанып алча. Амғы тусха теере «Чигірен ат» комплексте 700 артиинаң кізі тынанып, социальнай реабилитация иртерге маңнанды.
«Чир-суубыс арачылағҷылары» фондтың республикадағы пӧлии Хакасия правительствозына, СВО ветераннарының ассоциациязына, «Чигірен ат» тынағ-спорт комплексінің устаана улуғ алғызын читірче.
Сом авторни
Автор :
Елизавета Гончарова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
