Алнында чапсых тоғазығлар, тӱзімніг чӧптезіглер
05.08.2026
Хабарлар
«Гатчина» музей-заповедниктің директоры Василий Панкратов
Тоғазығ. Киҷее правительство туразында Хакасия пазы Валентин Коновалов «Гатчина» хазна музей-заповеднигінің» устағҷызы Василий Панкратовнаң тоғасхан
Таныхтирға кирек, пу кӱннерде Ағбанда «Актуальные проблемы сохранения наскального искусства и каменных изваяний на территории Евразии» чоннар аразындағы наука-практикалығ симпозиум иртче. Ол, 4 орғахтаң пасталып, 7 орғахха теере тоғынар. Анда аймах хазналарның кӧп саблығ учёнайы, музейлернің устағҷылары, пурунғы хумартхыларға наа тыныс пирчеткен реставраторлар араласчалар. Ол санда Хыдаттаң, Моол чирінең, Ираннаң, Казахстаннаң килген аалҷылар.
Василий Панкратов Чоннар аразындағы музейлер чӧбінiң Россиядағы комитедінің президенті полча паза Ленинград облазындағы «Гатчина» саблығ музей-заповедникнең устапча. Ол музейнің чыындызынзар 18 чӱс чылда, ІІ Екатеринаның тузында, пӱдірілген хайхастығ ӧргелер кірчелер.
Хакасия пазы Валентин Коновалов аарлығ аалҷыны чылығ удурлаан. Паза Василий Панкратовха Хакассияның пурунғы хумартхызына хайығ салчатханы ӱчӱн алғызын читірген:
– Хакасия тархын-культура ис-пайынаң сабланча. Пістің республикада 30 муң азыра археология хумартхызы саналча. Амды піс оларны таңдағы тӧлге артыс саларға кирекпіс. Аннаңар піс пурунғы хумартхыларны сибер хайраллапчабыс. Паза олох туста регионда туризмні тилiтчебіс. Пістің регионға хайығ айландырчатхан ӱчӱн, Сірерге улуғ алғызым читірчем. Прай кӧрілген тоғазығлар тӱзімніг иртсіннер.
Соонаң сӧс алған Василий Юрьевич. Ол Хакасия пазына хайди пістің республиканаң танысханнаңар чоохтап пирген:
– Піс Хакасиязар улуғ поғдархаснаң ааллап килчебіс. Чоннар аразындағы музейлер чӧбінiң Россиядағы комитеді пӱӱл республиказар ӱзінҷі хатап тоғыс хоостыра килді. Мин, тізең, пеер пастағызын на ааллап килдім. Хакасияның ӧӧн музейінің директоры Андрей Иосифович Готлиб музейлер чӧбінің араласчыларына республикаҷа экскурсия иртірген. Піс Улуғ Салбыхта полғабыс. Соонаң Минсуғдағы Н.М.Мартьяновтың адынаң чир-суғ ӱгренҷең музейзер чол тутхабыс. Анаң піс Сустағы музейзер парғабыс паза Улуғ Хуртуйах тасты пос хараанаң кӧріп алғабыс. Сойан-Сус ГЭС-сар кӧріп, істімде пос хазназына улуғ поғдархас тӧреен. Паза чоохтап таа полбас сағыстар пасха кіргеннер. Андағ килкім пӱдірігні пос хараанаң кӧріп алған соонаң хайди Кимде суға сомып албас. Суғның чылии 14 градус таа полған полза, мин анда сомғам.
Ідӧк Василий Юрьевич чооғында Л.Р.Кызласовтың адынаң чир-суғ ӱгренҷең музейнің тоғызын пӧзік паалаан. Музейнің пастағы хадылындағы пурунғы тастар орныхчатхан кӧзідігліг зал аның кӧңніне уғаа кіртір. Ол аны тиксі тилекейде археологияа чарыдылған иң чахсы кӧзідігліг зал тіп таныхтаан. Паза аны Россияның музейлерінiң визитнай карточказына даа кирерге чарир тіп чоохтаан.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
