Экономика тилізіне паза чуртас синін кӧдіреріне
05.08.2026
Хабарлар
Чоллар тыхталча
Чоллар. Хакасияда чолларны тыхтирына паза пӱдіреріне, кисчең орыннарны паза тротуарларны иптиріне, чарытхы, тохтағ орыннарын паза сиденнер турғызарына позыдылчатхан ахча сині чыл сай хозылча
Пу чылға республиканың чол чыындызы рекордтығ алты миллиард салковайға чит парды (2025 чылдағызынаң пір миллиард салковайға паза 2017 чылдағызынаң 10 хати кӧп). Ӧӧн чардығы – регион бюджедінің ахчазы.
Хакасияда чол тыхтаҷаң тус хыызында парча. Хакасия пазы Валентин Коновалов ахчаны нандырығлығ тузаланарға пӧгін турғысча паза чолларны иптирінҷе тоғыстарны хайдағ даа чардыхта кӧcтегліг министерствоның даа, муниципалитеттернің устағ-пастааның даа хатығ хайиинда тударға киректепче.
– Чол чыындызының полған на салковайы кӧні салылған асфальттығ километрлерге, наа автобус тохтағларына, тротуарларға паза чарытхаа айланарға кирек. Чахсы чоллар паза тиліпчеткен чол инфраструктуразы чох экономика даа алнынзар тибіребинче. Ол чуртағҷыларыбыстың чуртас синін кӧдіреріне паза хорғыс чох поларын тӧcтиріне талазығ чох ӧзен полча, – таныхтапча регион устағҷызы.
Республиканың чол хонии паза транспорт министерствозы танығларынҷа, «Хакасавтодор» пу чылға 31 хазна чӧптезиин ит салған.
Пӱӱнгі кӱнге тиксі узуны 40 километр 14 чол кизегі тыхталған. Ол санда: Ачинск – Ужур – Шира – Троицкай, Ағбан – Саяногорск, Пригорск – Чорба, Пии – Очыр, Шира – Тойым чоллар паза пасхазы.
Тастып – Харағай чолны тыхтиры тоозылған (1 км +656 – 8 км+442). Маткичіг аал алнындағы чол тиксі тыхталча. Пу неделяда подряд пірігізі Шира – Новосёлово чолны тыхтаан соонаң тузаланысха кирерге тимненче.
Асхыс – Пирікчул – Тӧӧ пазы (73 км – 88 км), Саяногорск – Ымай тастағы ГЭС – Нымырттығ (22 км – 23 км) чолларны нааҷылиры узарадылча. Таштып аймаанда паза Саяногорск – Хаал – Солбы чолзар кірер алнында автобустарның тохтағ орыннары турғызылча, чарытхы тартылча паза тротуар салылча.
От айы пасталғанда, чолларны нааҷылирға паза тыхтирға хоза пис чӧптезіг иділген, ол кизектерде тимнегліг тоғыстар апарылча.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
