АЗС-тар толдыра кӱзінең тоғынарға киректер
03.08.2026
Хабарлар
Пӱӱн Хакасия пазы Валентин Коновалов, тоғысха тынағ соонаң сығып, иң пастағызын кӱн сурығларынҷа чыылығлар иртірген. Андағ сурығларның пірсі – бензин сурии.
Ирткен тынағ кӱннері ниикке чӧрҷең машина ээлеріне оой нимес ирткен: бактарны бензиннең толдырып алар ӱчӱн, километрлерге сӧӧ тартылған теесте 5-7 часча турарға алай теес чох, че ікі хати аарлығ пааҷа бензинні садызарға киліскен. Бензин суриин алынҷа идінҷектер АЗС-тарының тоғызын тохтатханы, тынағ кӱннері алнында, тізең, ХТК станциялары бензинні талоннарҷа ла (оларны чӧптезігҷе тоғынчатхан пірігістерге пирчелер) позыдарға чаратханы сидіктіндірген.
Итсе, Хакасия правительствозы бензиннең сидіксіністер пасталғаннаң ала, сурығны хайығда тудып, республиказар бензинні читірчеткен ӧӧн компанияларнаң чӧптезіглерні сыбыра иртірче, Россияның энергетика министерствозынзар даа хабазығ сурап айланған.
– Сидіксіністерні кӧріп, піс АЗС-тарға тоғыс тузын алыстырарға кирек тіп санапчабыс: олар прай колонкаларында бензинні позыдарға паза узун тынағ тузы чох, хараа-кӱнӧрте тоғынарға киректер. Компаниялар, анзын пӧгіп, кӱстенібізерге киректер, – таныхтаан Валентин Олегович.
Топливо чырғалындағы киректердеңер сан пиріснең республика пазының орынҷызы Дмитрий Бученик чоох тутхан. Аның искіриинең, «Роснефтьнең» паза «Газпромнаң» хада чӧптезіглер хоостыра алылған чарадығларҷа биржа садиинда тудыл парған топливо республиказар пу кӱннерде читірілер. Іди бензин пу компанияларның АЗС-тарынаң пасха, ХТК-ның автостанцияларына, алынҷа идінҷектернің АЗС-тарына читірілер. Тиксі 13 АЗС-сар, олар республиканың иң ыраххы город-аалларында орныхчалар, бензин читірілер: Саяногорскка, Сорыға, Орджоникидзе, Боград аймахтарына паза Асхыс аймааның тайғадағы посёлок-аалларындағы АЗС-тарға.
– Че піс Ағбан-Харатас агломерациядаңар ундутпасха кирекпіс, мындағы автостанциялардағы теестерні ідӧк чох идерге кирек! – теен Валентин Олегович. – Пістің чӧптезіглер сылтаанда топливо читірілген АЗС-тар пааларны ӧскірбеске киректер! Андағ киректерҷе сах андох кӧнізін УФАС-сар айланарға кирек!
Бензин суриинҷа чыылығда Хакасия пазының орынҷылары Татьяна Курбатова, Михаил Побызаков, Дмитрий Бученик паза чурт-коммунальнай хоных паза энергетика министрі Максим Виноградов, экономика тилізі министрі Роман Ковтун араласханнар.
Роман Ковтунның искіриинең, министерство топливо чырғалын хайығда тударын узаратча. Кирек сыбыра алызып одырча. «Роснефть» искіриинең, пу чағында бензин республиказар читкіҷе читірілер, аннаңар кирек тӱзеделеріне ізеніс пар.
Чыылығны тоозып, Хакасия пазы Валентин Коновалов топливо чырғалындағы киректі оңдайлир ӱчӱн ӱс сурығны пӧгерінҷе тоғысты узарадарға чахаан: республиказар бензиннің хоза читірілерін хайығда тударға, АЗС-тарны толдыра кӱзінең (узун тынағ тузы чох паза хараа-кӱнӧрте) тоғындырарынҷа чӧптезіглерні узарадарға паза орындағы АЗС-тарға бензинні читіріп, аның паазын хайығда тударға!
Ізенербіс, сурығ чахсы саринзар алызар.
Сом Хакасия пазының паза Хакасия правительствозының пресс-службазыни
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
