Школа нааҷылалча, спорт ачығы тимнелче
31.07.2026
Хабарлар
Тоғыс хыызында парча
Тыхтағ. Пиидегi Н.П.Князевтiң адынаң школа-интернатта килкiм тыхтағ тоғыстары парча. Пӱдiрiгҷiлер аны хысхаа теере тоос саларға киректер
Амғы туста Хакасияда пір саңай 10 ӱгредіг учреждениезінде тиксі тыхтағ тоғыстары парчалар. Оларның хайзы-да пӱӱлӧк тимге сых парар, хайзылары килчеткен чылда. Наа чыл алнына теере Пиидегi Н.П.Князевтiң адынаң школа-интернат паза Таштыптағы 1 № школа-интернат нааҷылал парарға киректер. 2027 чылда Ағбан пилтiрiндегi, Пӱӱр пилтiрiндегi, Харатас городтағы 1 №, Хубачардағы школаларда тыхтағ тоғыстары тоозыл парарға киректер. Школалардаң пасха, iдӧк иргiлен парған олған садтары нааҷылалчалар. Оларны прайзын Хакасия правительствозы «Чииттер паза олғаннар» национальнай проекттiң «Прай чахсы ниме палаларға» федеральнай проектiне кирiп алғанда тыхтирға оңдай полған. Пу кӧстеге федеральнай кiн Хакасияа 400 миллион салковай азыра позытхан.
Пиидегi Н.П.Князевтiң адынаң школа-интернат 1973 чылда пӱдiрiлген. Ол муниципалитеттiң ӧӧн школазы полча. Iдӧк аның филиаллары пар. Ирткен ӱгредiг чылында школа-интернатта 600 азыра ӱгренҷi ӱгренген. Пӱӱл хосхар айында школада ӱгредiг тохтадылған. Ол чабыл парғанына школа тоғынҷылары даа, олғаннар даа ӧрiн парғаннар. Пiлiс ӧргезiнде килкiм тыхтағ тоғыстары пасталыбысхан нооза. Аны школа ӧмезi хаҷанох сахтаан полған. Ӱгренҷiлер ӱгредiг чылын школаның хыринда орныхчатхан школа-интернатта паза Харатастағы тағ-пӱдiрiг техникумының Пиидегi филиалында тоосханнар. 2026-2027 ӱгредiг чылын андох пастирға тӧӧйлер.
Пиидегi Н.П.Князевтiң адынаң школа-интернатты Иркутск облазындағы «Юность» ООО нааҷылапча. Анда тоғынчатхан он специалист школаны пӱкӱлее иптепче. Школа тастында мының алнындағы аймах ӧңнең сырлалған чугун батареялар чатхлапчалар. Тоғынҷылар, оларны сығарып, нааны турғысчалар.
Хайди чоохтапча пӱдiрiг организациязының техническай директоры Сергей Амигалатеой, олар электромонтажнай тоғыстарны iдӧк тоос парирлар. Специалисттер школаның прай чарытхызын нааҷылап саларлар. Амды тоғынҷылар школаның стенелерiн тӱзетчелер, соонаң оларны сырлирлар. Аннаң пасха, школаның поллары нааҷылалар, пастағы хадылдағы кабинеттер паза туалеттер иптелер. Фойеде паза спортзалда, тiзең, ӱр ниместе тыхтағ тоғыстары апарылғаннар. Школа хыры паза кӧзенектерi iдӧк алыстырылбастар. Олар наа.
Ӱгредiг кабинеттерi нааҷылал парарына школа директоры матап ӧрiнче. Анда ӱгредiге кирек ниме-ноо турғызылар.
– Пiс мындағ килкiм тоғыстарны хаҷанох сахтаан полғабыс, аннаңар пӱдiрiгҷiлер школазар кiрiбiскеннерiнде матап ӧрiн парғабыс. Пiстiң аймахта ӱр ниместе iдӧк Табаттағы школада килкiм тыхтағ тоғыстары толдырыл парғаннар. Арғыстарыбысха тоғынар прай чахсы оңдайлар тӧстелген. Оларның ӱчӱн уғаа ӧрiнгебiс. Амды, тiзең, позыбыстың школабыс андағох пол парарын чидiкпин сахтапчабыс. Пiстiң школада чарытхынаң уйан полған, класстарда пӱлес. Хазна стандарттарына нандырбинчатхан, амды олар пӱкӱлеезiнең нааҷылал парғаннар. Чылығ пирҷең система уйан тоғынҷаң. Хысхызын школаның пiр чардығында батареялар чахсы iзiтчеңнер, пасхазында сала ла чылығ полҷаңнар. Анда cӧрӧн пiлдiрҷең. Амды чылығ пирер система пiр тӧӧй тоғынарына паза чылығ поларына iзенiс пар.
Ӱгретчiлер ӱгредiг оборудованиелерiнең тоғынарын чидiкпин сахтапчалар. Пiс оларны прай ал салғабыс. Складта хайраллалчалар. Нааҷылалған соонаң химия, биология, технология, ОБЗР, ИЗО, музыка кабинеттерiне ӧнетiн оборудованиелер турғызылар. Iдӧк пасха кабинеттерзер интерактивнай доскалар, оргтехника паза даа пасха ӱгредiг тирiглерi кирiлерлер, – чоохтапча школа директоры Надежда Романцова.
Алындағы чылларда анда улуғ нимес тыхтағ тоғыстары апарылғаннарох. 2013 чылда школаның пастағы хадылы, столовайы паза туалеттерi иптелген, соонаң «Окна в школу» программаҷа кӧзенектер алыстырылғаннар, анаң хыры, водостоктар паза откостар нааҷылалғаннар. 2021 чылда «Ӱгредiг» нацпроекттiң «Полған на ӱгренҷiнiң чидии» федеральнай проектiнҷе «Ӧзic орны» кабинет азылған, 2023 чылда – «Саннығ ӱгредiг орны» кабинет. Ирткен чылда, тiзең, ӱгредiг организациязының спортзалында тыхтағ тоғыстары апарылған. Пӱдiрiгҷiлер полларны алыстырғаннар, стенелернi нааҷылааннар, тренажёр залына спорт тирiглерi алылған.
Наа спорт объектi полар
Хайдағ даа муниципалитеттерде иргi школалар пар. Оларны регион ӱлгӱзi теес пастыра нааҷылап одырча. Пии аймаан алып алза, Алахтайлардағы иргi школа хаҷанох тыхтағ тоғыстарын кирексiпче. Анда хонҷых кiчiг ааллардағы олғаннар ӱгренчелер, школадағы интернатта чуртапчалар. Пии аймаа устағ-пастаа пу чағында проект-смета пiчiктерiн тимнеп пастир, анаң регион ӱлгӱзi аны iдӧк федеральнай программаларға кирерге кӱстенер. Пiлдiстiг, пу табырах идiлчеткен тоғыс нимес.
Чоохтирға кирек, Пиидегi Н.П.Князевтiң адынаң школа-интернатха пу чыл тыхтағ тоғыстарынаң на нимес тынағлығ. Ӱгредiг организациязының ачығында iдӧк пӱдiрiг тоғыстары парча. Аар техника бетон урча. Тӱрче полза пу орында наа спорт объектi полар. Аны «Хыйға ачых» адапчалар. Ол «Бизнес-спринт (Я выбираю спорт)» федеральнай проектче пӱдiрiлче. Анда футбол паза хоккей ойнаҷаң коробкалар полар, iдӧк тренажёрлар турғызылар. Анда ӱгренҷiлерге ле нимес, олаңай чуртағҷыларға даа хазыхты тыыдарға оңдай полар.
Сомнар Илона Каковани
Автор :
Оксана Котюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
