Германия тың ачырғанған
28.07.2026
Хабарлар
Эрлинг Холанд, сіліг гол кирібізіп, махтаға сыхча
Футбол. Пӱӱл тилекей мариинда кӧп команда араласты – 48. Аннаңар ойыннар даа ӱр парғаннар. Марығ тузында чапсых таа киректер пол турғаннар
Футболҷа тилекей мариинда пӱӱл 4 команда пастағызын на араласты: Кабо-Верде, Кюрасао, Узбекистан паза Иордания. Оларның аразында Кабо-Верде иң чахсы кӧзiдiмге читкен, марығны 1/16 чардығында тоосхан. Тилекей мариинда пастағызын на араласчатхан командаа уғаа маңат чидiг тiп таныхтирға чарир. Марығның 1/8 чардығына сығып алар ойында олар Аргентинаа 3:2 саннаң утыр салғаннар. Харбазығ хайди хазыр парғанын саннар даа маңат киречiлепчелер.
Пӱӱл футболҷа тилекей марии Канадада, Мексикада паза США-да ирткен. Че пу ӱс хазнаның пiрдеезi марығның 1/8 чардығын ирт полбин салған. Мында прайзын чапсытхан Канада. Ол позының подгруппазында iкiнҷi орынға сығып аларын пiрдеезi сағыбаан нооза. Таныхтирға кирек, Канада парчан тоғазығларын США-ның стадионнарында иртiрген. Марығның 1/8 чардығына сығып алар ойында Марокконың командазына 3:0 саннаң утыр салған. Мексика 1/8 чардыхха сығып алар ойында Англияа 3:2 саннаң утырған. США, тiзең, iдӧк 1/8 чардыхха сығып алар тоғазығда Бельгияа 4:1 саннаң утыр салған. Мында кирек Американың президентi ара кiрiскенҷе парған. Че анзы даа марығ ээлерiне чиңiс тудар оңдай пирбеен.
Прайзынаң артых чобағда полған Германия. Тилекей мариинда тӧремiл араласчатхан саблығ команда 1/16 чардығында Парагвайнаң тоғасхан. Тилекейнiң тӧрт хати чемпионы пу команданы оой ла ирте халарбын тiп тыңох iзенiбiскен полбас па. Аннаңар ойын пасталыбысханда, Германияның футболисттерi постарын най тың иртiре тудынчатханнарын сизiнерге чарир полған. Че тоғазығның ӧӧн чардығы 1:1 саннаң тоозылғанда даа, кӧкесiм хылыхтары синмеен. Пенальти полза, Парагвайға кӧрҷең ниме кӧзiдербiс тiп тыңох iзенгеннер, неке. Пенальти тебер тус пасталыбысханда, хара пасхаҷыл кирек, махтаға сыхчатхан ӱс футболизi хаалхаа даа орта тееп полбин салғанда, Германия ла нимес, прай чир ӱстӱ тың таңнаан, полбас ниме пол парды тiп санаан.
Iди тиксi махтаға сыхчатхан Германияның командазы тилекей марииның 1/8 чардығына даа сых полбин салған. Хайдағ уйат тiп санапчатханнар. Мындағ хомзыныстығ кирек оларның 1962 чылда ла полған полтыр. Аның соонда олар, тилекей мариинда аралазып, сыбыра маңат тимненiс кӧзiтчеңнер, тилекей чемпионы даа полыбысчаңнар. Сыйыхтығ орыннарға тӧремiл читчеңнер. Амды, тiзең, 1/8 чардығында ла тохтабыстылар.
Андағох улуғ хомзыныс полған Бразилияның командазында. Тилекейнiң пис хати чемпионнары халғанҷы 36 чыл аразында марығның 1/8 чардығында тохтабаан полғаннар. Пiрдең, кемге утыр салғаннар – хайдағ-да Норвегияның командазына. Постарына най тың киртiнiбiзiп, «ыырҷыларын» оой ла утып аларбыс тiп iзенiбiскеннер. Норвегияны пӱкӱлее санға ал килзе, улуғ марығларда хаҷан даа махтағда полбинча, сыйыхтығ орыннарға сых полбинча. Че ойын пасталыбысханда, киҷегейлiг Эрлинг Холанд, арғыстарын алнынзар кӧӧктiрiп, бразилецтернi тиксi стадионда хысти пас сыхханда, тилекейге саблығ футболисттер хайди даа поларын пiлбинiбiскенге тӧӧй тудынғаннар. Тоғазығ 2:1 саннаң тоозылғаны футбол кӧрчеткеннернi саңай ӱрӱктiрген, неке. Андада ла оларның пiреезi ойын пасталар алнында Норвегияның командазының капитаны Эрлинг Холандтың сӧстерiн сағысха кирген полар.
– Пiс Бразилияның командазын олаңай тоғазығда 2:1 саннаң утхабыс. Амды хорыхпинчабыс, пазох утып аларбыс, – сала даа iкiнҷiлебинчеткен команда капитаны.
Сын чуртаста даа кирек iди пол парған. Пастағы голны Эрлинг Холанд кирiбiскен. Iди ол нанҷы-арғыстарына маңат кӧзiдiм пирген, Бразилияны даа утчаң оңдай поладыр теен чiли, прайзы даа чапчаң хайынып пастабысханнар. Норвегия Бразилияны, 2:1 саннаң утып алып, тилекей марииның 1/8 чардығында артыс салғанда, пiлiгҷi-ӱзӱрiгҷiлер пiр ӱннең оларны махтап сыхханнар, тилекейнiң наа чемпионы пол парарға айабастар тiпчеткеннер дее табыл сыхханнар. Аннаңар даа полбас па, Норвегияның командазынаң тоғазарға уламох матап тимнен сыхханнар. Бразилияны даа утып алған командадаң хайди чочынмас. Че пiлiгҷiлернiң ухаанҷыластары килiспин парған, Норвегия тилекей марииның 1/4 чардығынаң пӧзiк кӧдiрiл полбин салған.
Футбол кӧрерге хынчатханнар iдӧк Португалияның командазы хомай ойнабысханына тың хомзынғаннар. Таныхтирға кирек, сағамғы туста пу хазнаның пiрiктiрiлген командазында иң аарлығ паалалчатхан футболисттер чыылыс парғаннар. Тилекейге сабланчатхан Криштиану Роналду позының нанҷы-арғыстарын чиңiске матап кӧӧктiрер, хайди даа сыйыхтығ орынға сығып аларлар тiп кӧп кӧрiгҷi iзенген полған. Cынында, тiзең, Португалияның иң саблығ футболисттерiнiң пiрсiне саналчатхан К.Роналду позын сыбыра махтапчатханнарны, ағаа тың iзенчеткеннернi прайзынаң артых хомзындыр салған. Сынап таа чи хайди iди полар, тилекей марии тузында саблығ футболист «ыырҷыларының» хаалхазынзар чағдап, 17 хати тепкенi таныхталча. Че кӧрiгҷiлернi ӱс ле голнаң ӧрiндiртiр. Ағаа хоза, стадионнарзар нинҷе хати сыххан, хада ойнапчатхан арғыстарына гол кирҷең пiр дее пас пирбиндiр.
«Ахчаны кӱрҷекнең кӱрепчеткенде, iдӧк маңат ойнирға кирек нимес пе?» – перiнiсклеен осхастар кӧрiгҷiлер, Португалияның чахсы командазы 1/8 чардыхтаң ирт полбин халып, ибзер айланарға тимненчеткеннернi кӧрчеткен туста.
Iдӧк тилекейнiң теестегi марии тузында кӧрiгҷiлернiң кӧңнiне кiрбеен командалар санында Турция паза Уругвай адалтыр. Ирткен чылларда оларның хайзы даа, тилекей мариинда аралазып, сыбыра маңат тимненiс кӧзiтчең полған. Турция 2002 чылда тилекей мариинда хола медаль утхан. Уругвай, тiзең, тилекейнiң iкi хати чемпионы полған. Амды, 1/1 чардығынаң пӧзiк кӧдiрiл полбады.
Пӱӱлгi тилекей марии тузында прайзын чапсытхан iкi команда адалтыр. Пастағызы Кабо-Верде хазнаның командазы. Ол, мындағ улуғ марығда пастағызын на аралазып, 1/8 чардыхха чидiп алған. Iкiнҷi орында Норвегияның командазы адалча. Ол 1998 чылдаң сығара тилекей мариинда араласпиндыр. Амды позының узын сынап, 1/4 чардыхха читкенi, тилекейнiң пис хати чемпионы полчатхан Бразилияны 2:1 саннаң утханы уғаа махалығ чидiг тiп паалапчалар.
Кабо-Верде хазнаның пiрiктiрiлген командазының хаалха хадағҷызы прайзының хайиин тартхан. 40 частығ Возинья тилекейге саблан парыбысхан. Ол хайди даа тыыда тебілген меспектерні холға киріп алчатхан. Аннаңар даа аны махтапчатхан соцсетьтердегi нинҷе-де муң кiзiдең сығара 30 миллионға теере ӧс парыбысхан. Мына хайда сын сабланыс. Тилекей мариинда аралазып, ол нинҷе-де ойын изере пiр гол даа кирдiрбеенiнең махтаға сыххан.
Амды пӱӱлгi тилекей мариинда аралазып, хайдағ футболисттер иң кӧп гол киргенiн кӧзiт пирерге чарир: 1 орында Килиан Мбаппе, Франция, 8 ойында 10 гол; 2 орында Лионель Месси, Аргентина, 8 ойында 8 гол; 3 орында Эрлинг Холанд, Норвегия, 6 ойында 7 гол; 4 орында Джуд Беллингем, Англия, 8 ойында 7 гол; 4 орында Усман Дембеле, Франция, 8 ойында 6 гол.
Тилекей мариина тимнелген сыйыхтар пiди ӱлестiрiл парғаннар: иң чахсы чиит футболист 19 частығ Пау Кубарси (Испания); иң чахсы хаалха хадағҷызы Унаи Симон (Испания); иң чахсы футболист Родри, Испания командазының капитаны; «Алтын бутсы» Килиан Мбаппеге пирiлген (Франция).
Сом интернеттең
Автор :
Анатолий Султреков
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
