Пӧгін – тузында паза чахсы толдырарға
29.07.2026
Хабарлар
Хакасия пазы Валентин Коновалов республикадағы пӱдіріглерні хайығда тутча
Тыхтағ тоғыстары. Валентин Коновалов Хакасияның школаларында паза олған садтарында тоғыстар хайди парчатханын позы хайығда тутча
Хакасияның полған на аймаанда паза городында олғаннарға амғы паза хорғыс чох орын тӧстир ӱчӱн, чыл сай илееде ахча позыдылча: прай синнердегі бюджет ахчазы. «Чииттер паза олғаннар» национальнай проект хоостыра пӱӱл 400 миллион азыра салковай федеральнай полызығ пирілген. Олар Хакасияның ӱгредіг учреждениелерін тиксі тыхтирына ызылғаннар.
Тыхтағ орыннарында тоғыстар ӧткін апарылчалар. Олар алты школада (Алтай, Ағбан пилтірі, Пии, Таштып аймахтарында, Харатаста) паза тӧрт олған садында (Ағбанда, Харатаста, Алтай паза Ағбан пилтірі аймахтарында) апарылчалар.
Хакасия пазы Валентин Коновалов тыхтағ тоғыстарының прай чардыхтарын толдыразынаң тоосханҷа позы сыныхтағда тутча.
Регион устағҷызы муниципальнай ӱлгӱлерге объекттерні тузында паза пӧзік качестволығ толдырылған тоғыстарны тимге сығарарға пӧгін турғысча. Прайзы ла кирекке нандырығлығ хайбинча паза кӧрілген тусха тудынминча. Кӧзідімге, Ағбанның устағ-пастаа «Василёк» олған садының тиксі тыхтаан айныт полбинча. Хакасия пазы киректі хысха тусха тӱзедерге, табыраанҷа айныдарға паза прай кӱстерні тартарға киректеен.
– Муниципалитеттернің ӧӧн пӧгіні – тыхтағларны чахсы синде паза тузында тоос салары. Кӧрілген тусха маңнанчатханнарға алғызым читірчем. Сыданминчатханнарға, тізең, пістің чуртағҷылар алнында нандырығлығ тудынар ӱчӱн киректі тӱзедерге паза табыраанҷа айныдарға кирек, – пасча Валентин Коновалов соцсетьтердегі страницаларында.
Пӱӱнгі кӱнде тыхтағ тоғыстары полған на школада паза олған садында хайдағ синде парчатханын пирчебіс. 2026 чыл тоозыларына тимге сыхчаң школалар: Таштыптағы 1 № школа-интернат 23 %-ке тимде, ол санда 95 %-ке сайал парған, спортзалда чылығ пирҷең системаны нааҷылир тоғыстар тоозыл парғаннар, тура істіндегі тыхтағ тоғыстары апарылча паза кӧзенектер алыстырылчалар. Пиидегі школа-интернат 13 %-ке тимде, ол санда сайиры толдыразынаң тоозыл парған, пастағы хадылдағы поллар урыл парғаннар, чарытхы тартчаң тоғыстар апарылчалар. 2027 чылда тимге сығарылар школалар: Кӧк хайадағы школа 29 %-ке тимде, ол санда сайиры тоозыл таа парған, чағарынҷа тоғыстар апарылчалар; Ағбан пилтіріндегі, Пӱӱр пилтіріндегі паза Харатастағы (1 №) школаларда: сайирынҷа паза чарытхы тартарынҷа тоғыстар ӧткін парча.
Олған садтарында: Хубачардағы «Буратино» олған сады 62 %-ке тимде (тоғыс айнызынҷа иң алнында), ол санда тура хыры прай тимде, чарытхы тартарынҷа тоғыстар паза стенелерні тӱзедері тоозылча; Харатастағы «Звёздочка» олған сады 55%-ке тимде: ікі хадылы прай даа тимде, тура тастында паза хырында тоғыстар узарадылчалар; Ағбан пилтірі аймаандағы «Звёздочка» олған сады 35 %-ке тимде, ол санда сайалған, тасты иптелче паза отмостка иділче; Ағбандағы «Василёк» олған садында алындағы пӱдіріг пірігізі тоғыстарны тузында толдырбааннаңар, аннаң чӧптезіг тохтадылған, город устағ-пастаа тоғыстарны нааҷылир ӱчӱн садығларның ікінҷі араласчызынаң чӧптезіг идер киректі апарча.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
