Садығ киреенде чибiргi чыл азыра iстен парир
24.07.2026
Хабарлар
Пыдырах аалдағы садығҷы Полина Майнагашева
Таңда – Садығ тоғынҷызы кӱнi. От айының халғанҷы чечімезінде хазнада садығҷыларның ӱлӱкӱні таныхталча
Тархынның соо тузынзар айланза, садығ кирее хакас чонның чуртазында халғанҷы орында пір дее полбаан полар тіп сағынчам. Пістің чон мал, хой, ат ӧскіріп чуртаҷаң, че кізее аннаң пасха ниме-ноо кирегӧк. Аның сылтаанда улуғ аалларда ярмаркалар азылғаннар. Анда ыраххы аалыҷахтардаң килген улус, ахчанаң на тузаланмин, ӧӧнінде ниме-ноонаң орнасчаң полтыр. Аны мағаа тай іҷем чоохтаҷаң. Че чуртас алнынзар ла хаалап одырча, прай ниме алысча. Амды прай даа аалларда кічіг садығ туралары пар, хайда чонға прай кирек ниме-ноо садылча.
Тастып аймаандағы Пыдырах аалда даа андағ улуғ нимес садығ туразы пар. Аның ачых-чарых кӧңніліг садығҷызынаңар пас пирерге сағынчам. Редакциядаң андағ чахығ килгендӧк, сағамох Полинаның омазы сағызыма кір килген. Нинҷе тус пілчем Полинаны, анҷох ол садығҷы полҷаң кізі тӧреен тіп сағынчам. Танызыңар – Полина Петровна Майнагашева, хыс фамилиязы – Чебочакова. Аның тӧреен чирі Пыдырах аал полча. Хада хонғаны Сергейнең ӱс пала, ӧскiрiп, чон аразына кир салғаннар. Улуғ оолғы Борис Дудинка городта полицияда істенче. Ӱр ниместе майор звание алып алған. Полина Петровна оолғына поғдархапча. Алёна хызы Пыдырахтағы аал чӧбінде ӧӧн бухгалтер полып тоғынча. Очы оолғы Вячеслав Норильскте МЧС-та істенче, уғаа кӱрленҷік оол, саңай артист оңдайлығ.
Чоохтирға кирек, Полинаның паза Сергейнің ынағ паза пик сӧбіре. Олар чуртас тооза кӧп мал-хус тудып чуртапчалар. От тоғынарға, малға азых пилетирге улуғ ӧсклеп парған палалары, городтардаң отпускка килглеп, прай тоғынып парыбысчалар. Пархаларының улии Алла, ағаа амды 22 час, ууҷазына ибде матап полысча. Пасха даа пархалары, ууҷазы тоғыста майых парарын піле тура, аны ӱӱҷiктегі тоғыстарға чағын итпинчелер.
Полина Петровна ол ла пір садығ туразында 21 чыл тоғын парир. Чиит туста ағаа парикмахер, інек сағҷаң, школадағы столовайда даа тоғынарға киліскен. Прай даа тоғыстарында сымдах хылиин, хыйға паза амыр тудынызын кӧзіткен. Ол кiзiлернең иптiг чоохтазып пiлче. Полина Петровнадаң садығҷы тоғызы чӱрееңерге чатча ба тiп сурғанда, ол піди нандырған: «Ибдегі тоғыс толдыра, ам даа тоғыстаң парар оңдайлығбын, че орныма тоғынҷаң кізі чоғыл». Амғы чииттер тоғысха тың на тартылбинчалар. Хазна пала ахчазын, хозып, тузында тӧлепче. Ноға кирек посты майыхтырарға? Аннаңар, харын, Полина Петровна осхас кізілер пар, кемнiң сылтаанда пістің чуртас тудылча.
Ӱлӱкӱннең Cірерні, Полина Петровна, хазых чӧріңер, андағох ачых-чарых полыңар, хынған сағыстарың толзын.
Сом авторни
Автор :
Евгения Табурчинова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
