Чорыхтар хорғыс чох ползын
24.07.2026
Хабарлар
«Продвижение безопасности» проекттің эксперті Анна Курникова Хакасияның министерство-ведомство кізілерінең хада
Пресс-конференция. Ирткен чылда Хакасияның перекрёстоктарында 150 азыра саай пол парған, анда 14 кiзi ӱреен, 200 азыразы тың палығлатхан тiп искiрче Хакасияҷа Россия МВД-зының хазна автоинспекциязының устанызы
Пу чылның кӱрген – сiлкер айларын алза, республиканың чоллары пiрiкчеткен орыннарда 50 азыра саай пол парған, 100-ке чағын кізі палығлатхан, пiрсiнiң тыны ӱзiлген. Саайларның ӧӧн чардығы светофор чох орыннарда пол парча.
Хайди таныхтапча Хакасияҷа Россия МВД-зының ГИБДД пастығы орынҷызының тоғызын толдырчатхан Роман Марченко, саайларда ӱрееннернiң саны хызырылза даа, палығлатханнарның саны ӧскеннең ӧсче. Мындағ кирек пiстiң регионда ла нимес. Хайди саннар кӧзiтчелер, тиксi хазнада автомобиль саайлары iдӧк ӧӧнiнде чоллар пiрiкчеткен орыннарда полчаттырлар. Палығлатханнары даа анда кӧп.
Саайларның ӧӧн сылтаа – ӧӧн чолҷа иртчеткен машиналарға чол пирбеенi, светофорның хызыл паза сарығ ӧңнерiнҷе ойлатханы, маңзырап чӱгӱрткенi, телефоннаң чоохтасханы, ачығ суғ амзааны паза оодылых машиналығ чӧргенi.
Мындағ хорғыстығ киректi тохтадар пӧгiннең нинҷе-де чыл мының алнында Россияда «Продвижение безопасности» социальнай кампанияның тоғызы пасталыбысхан. Ол «Инфраструктура чуртасха» национальнай проекттің «Чол чӧрізінің хорғыс чох полары» федеральнай проекті хоостыра иртче. Тӧстегҷiзi Россия МВД-зының хазна автоинспекциязы полча.
Кампанияның хайии чылдаң чылға алысча. Кӧзідімге, 2025 чылда чазағ чӧрчеткеннернің хорғыс чох поларына хайығ салылған. 2026 чылда, тізең, кӧстегнi алыстырыбысханнар — чоллар пiрiкчеткен орыннар хорғыс чох поларына чарыдылған.
«Продвижение безопасности» социальнай кампания хоостыра килкім мероприятиелер иртірiлчелер. Олғаннарға паза саарбахтарға театр кӧзідіглерi, ӱгредігліг фильмнер, марығлар иртiрiлче, улуғларға – АЗС-тарда, парктарда, автошколаларда интерактивнай чӧрімнер. Ағаа хоза СМИ пастыра кӧп тоғыс апарылча.
Тиксi хазнада иртчеткен чӧрiмге хазна автоинспекциязының тоғынҷылары ла нимес, ідӧк пасха даа ведомстволарның кізілері хозылчалар: ӱгредіг паза хазых хайраллаҷаң министерстволарның, чол ведомстволарының кізілері, ідӧк халых пірігістері, кӧзідімге, чиит инспекторларның отрядтары. Пу тусха мындағ чӧрiм хазнаның 40 азыра регионында иртче. Кiчiг хырлас айына теере перекрёстоктарда саайлар полдыртпазына чарыдылған аймах мероприятиелер иртер.
Хакасияда чӧрiмнi азарға Москвадаң ӧнетiн специалист кил парған. Анна Курникова социальнай кампанияның экспертi полча. Хакасияның правительство туразында ирткен пресс-конференцияда Анна Александровна социальнай чӧрiмнiң ӧӧн кӧстеглерiн чарытхан. Ӱстӱнде адалған мероприятиелер пiстiң регионда iдӧк иртер.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
