Хакас театры улуғ фестивальда аралазар
24.07.2026
Хабарлар
Хакасияның культура министрi Светлана Окольникова
Пресс-конференция. Санкт-Петербургта «Балтийский дом» чоннар аразындағы театр фестивальына паза театр-фестивальның пайрамнығ сезонына чарыдылған чыылығ ирткен
От айының 20-ҷi кӱнiнде ТАСС-тың пресс-кiнiнде тоғазығ ирткен. Анда тӧстегҷiлер «Балтийский дом» чоннар аразындағы театр фестивальынаңар чоохтааннар, 89-ҷы сезонның салтарларын искiргеннер паза пайрамнығ 90-ҷы сезонға тимненiснең ӱлескеннер. Пресс-конференцияда Санкт-Петербургтың культураҷа комитет кнезiнiң орынҷызы Антон Александров, «Балтийский дом» чоннар аразындағы театр фестивальының устағҷызы Сергей Шуб, фестивальның хоос устағҷызы Марина Беляева, Индияның Санкт-Петербургтағы ӧӧн консулының орынҷызы Деви Чаран Дхули Дасс араласханнар. Хакасияның культура министрi Светлана Окольникова, Новосибирсктегi «Красный факел» академическай театрның хоос устағҷызы Андрей Прикотенко паза режиссёр Гульназ Балпеисова онлайн палғалысха сыхханнар.
Фестиваль пӱӱл чарыс айының 6 – 15 кӱннерiнде «Фестивальларның фестивальы» хыйғылығ иртер. Программаа Россияның паза тилекейнiң алғым театр форумнарында сабланған спектакльлар кирiлерлер. 2026 чылда «Балтийский дом» фестиваль хоостыра Театр фестивальларының пiрiгiзi тӧстелген. Ол хазнадағы фестиваль чӧрiмнерiн пiрiктiрер паза хайығда тудар.
Фестивальда Россияның ӧӧн театр ӧмелерiнiң читi ойыны паза Индиядаң пiр спектакль аралазар. Хакасияның Культура кӱнi иң танығлығ мероприятиелер санына кiрер. Анда А.М.Топановтың адынаң Хакас драма театры «Чазы. Тастың ыры» (режиссёр – Тимур Казнов) спектакльны кӧзiдер. Ол Хакасиядаңар триптихтең алылған кӱстiг ипчiнiң аар ӱлӱзiнеңер ойын полча. Спектакль Улуғ Хуртуйах Тастаңар кип-чоохха тӧстене турғызылған. Чонға кӱс, тӧл пирчеткен тасха тиксi Россиядаң ипчiлер, сӧбiрелер, килiп, пазырчалар.
– Мындағ саблығ фестивальда аралазарына тың поғдархапчабыс. Санкт-Петербургтағы «Балтийский дом» ачыхта пастағызын на аралазарбыс. Андар пiс махалығ спектакль апарарбыс. Ол полған на кӧрiгҷiнiң чӱреенде тирең iс артызар. Хайхастығ теелбектер, хакас чонның кӧглерi, сiлiг костюмнар – прай пу ниме хаталбас ӱлӱкӱн чiли иртер! – пресс-конференцияда таныхтаан Хакасияның культура министрi Светлана Окольникова.
Хайҷы Аржан Тодош, фестивальның араласчыларын паза аалҷыларын Хакасияның пай культуразынаң таныстырып, хакас кӧг тирiглерiнең (чатхан, тимiр хомыс паза пасхазы) ойнир. Iдӧк фестивальда хакас чонның кип-азаа кӧзiдiге сығарылар.
Сом Хакасияның культура министерствозының пресс-службазыни
Автор :
Аскар Артамонов
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
