Алынҷа экономика орнын тӧстиріне старт пирілген
22.07.2026
Хабарлар
Экономика. Михаил Мишустин «Хакас технология ойымын» тӧcтирдеңер чарадығда хол салыбысхан
Россия правительствозының кнезі Михаил Мишустин «Хакас технология ойымы» алынҷа экономика орнын (ОЭЗ) тӧcтирдеңер чарадығда 15 отта хол салған.
– Пу проектке федеральнай синде хабасханы прай республикаа танығлығ кирек. Аны чуртасха киргені хазнаның технология суверенитедін тыыдарына хабазар, Хакасияның инвестиция кирер оңдайларын пілдірте кӧдірібізер паза регион экономиказын тилідеріне наа оңдайлар азар, – сағыс-кӧрізінең ӱлескен республика пазы Валентин Коновалов.
Таныхтирға кирек, хандых айы тоозылчатханда, Россияның вице-премьері Александр Новак правительствоның тоғысчы ӧмезінің чыылиин иртірген. Ол чыылығның салтарларынҷа республикаа уғаа кирек полчатхан улуғ проектке пір ӱннең хабасханнар. Че аның алнында Хакасия правительствозы айланыстығ пічікті тимнирінҷе улуғ тоғыс иткен.
Азах мееттіг чардығы Россия правительствозының чарадиинда хол салары полған. Ол пландағы сығарыс тоғыстарын пастирына официальнай старт пирген.
ОЭЗ Саяногорск паза Пии аймаа чирінде тӧстелче. Пастағы чардығында анда тиксі 25 миллиард салковай артиинаң паалалчатхан пис инвестиция проектін чуртасха кирері кӧрілче. Оларның аразында ӧӧн проект – чылбыраң фольга паза соох оңдайнаң молат лентазын сығарчатхан наа завод. Аның пӱдірии пу чылның ікінҷі чарым чылында пасталар тіп кӧрілче.
Ідӧк ОЭЗ чирінде шариктіг подшипниктер, тағ оборудованиезін, алюминий полуфабрикаттарын сығарчатхан паза тимір чолдағы терпектерні тыхтирынҷа заводтарны азарға пӧгінілче.
Алынҷа экономика орнының тиксі улии 313 гектар полар.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
