Испания – тилекей чемпионы
22.07.2026
Хабарлар
Ферран Торрес гол кирген соонда ӧрінче
Тилекей марии. Футбол ӱлӱкӱнi тоозыл парды. Че миллионнар кӧрiгҷi ам даа аны ӱр тус сағысха кирер, ӧрiнер паза хомзынар. Сала соонаң арах тилекей мариинаңар кӧп хоза танығлар пирiл турарлар нооза
Уйғу чох хараалар тоозылды. Амды футбол пайрамы сағыста ла халар. Че хазыр талазығлар, ӧрiнiстер паза хомзыныстар табырах тохтабас. Тилекей марии соонда сыбыра iди поладыр. Аннаңар футбол ӱлӱкӱнi тузында полған хайхастығ киректердеңер алынҷа чоох хайди даа пирiлер.
Амды, тiзең, тилекей марииның азах мееттегi тоғазығдаңар сала алғым арах. Мында даа хайхастар паза таңнастар асхынах нимес. Кӧзiдiмге алза, Аргентинаның айдас футболисттерi ойын тоозылғанҷа Испания командазының хаалхазына пiр хати даа орта тееп полбиндырлар.
Анзына киртiнерге дее сидiк, че кирек сынында андағ полтыр. Тилекейге сабланчатхан Лионель Месси дее, чӱреен пазын полбин, командазына полыс пирерге сағынып, арачыланыста ойнапчатханнар санына хозылыбысхан, чахсы кӧзiдiм поларға харасхан. Че анда даа аның кирегi килiспеен. Ол даа сылтағнаң полбас па, кӧрiгҷiлер хайиин позынзар тартчатхан 39 частығ Месси кӱмӱс медаль кӧксiне iлiлген соонда ылғап салыбыстыр. Айастығ, ачырғастығ, че Ӧӧркi чайааннар хылынызынаң тоғыр пар полбассың.
Мында иң не чапсыстығ мына ниме. Футбол марии пасталчатханда, Испания тилекейдегi иң чахсы командалар санында адалбинчатхан даа. Пiреезi ле, тың iкiнҷiлеп ала, аны саңай хыйа тастирға чарабас тiп чоохтан салҷаң. Хайдағ даа полза, пiр хати тилекей мариинда утхан нооза. Ол чидiг 2010 чылда полғанын сағысха кирҷеңнер.
Испания азах меетке сығып алғанда, прайзы даа, сала ла пiр ӱннең нимес, мин не ағаа iзенгем, киртiнгем тiп суулазып пастабысхан. Хайди идерзiң зе, чуртас ағынында андағ таңнастығ кӧзiдiмнер толдыра табарға чарир. Уламох, кем чиңiс ағылған голны кире тебiскенiнде Испанияның тилекейге саблан парған айдас оолғы пол парған Ферран Торрес прайзына ӧрініс сыйлаан.
Таныхтирға кирек, тилекейнiң азах меедiне читiре тiл чохтар ла аны, хомайлап, сӧклебинчеткеннер. Чоохтан полбинчалар нооза. Ферран Торрес сынында даа андағ хайыға турыстығ футболист полтыр. Испанияның пiрiктiрiлген командазына алылғандох, кӧп кiзi андағ чарадығдаң тоғырлантыр. Футбол чахсы ойнап полбастар ба. Пенальти орта тееп полбинчатханын ол позы даа аймах марығлар тузында кӧп хати кӧзiтчең осхас.
Че аның чуртазында иң нандырығлығ тус чит килгенде, Ферран Торрес прай хомай нимелернi хыйа тастаан. Аның алнында пiр ле ӧӧн пӧгiн турған – хазназына, чонына ӧрiнiс сыйлап пирерге кирек. Команданаң тилекей чемпионы полыбызары айдас чидiг нооза. Анзы хайди даа чир ӱcтӱндегi футбол тархынында алтын букваларнаң пазыл парар, аның ады-солазы таныхталар.
Ол даа сылтағнаң полбас па, тилекей марииның араласчызы ағаа пирiлген меспекті пар-чох кӱснең Аргентинаның хаалхазынзар учухтырыбысхан. Позы даа чахсы оңарарға маңнанғалахта, стадионда одырчатхан 80 муң артиинаң кӧрiгҷi ӧрчiлiг суулаза тӱскенде ле сизiнген – гол кирiп алтыр. Хандыра полчатпас па. Анзына хайди ӧрiнмес. Ол махтаға сыхты нооза. Азах мееттегi тоғазығ амох-амох ла тоозыл парар. Аргентина азынадох пенальти теберге тимненче полар. Чох-а, кирек iди килiспес. Чиңiс голы кирiлдi.
Мында хоза танығ идерге кирек. Тилекей марииның азах мееттегi тоғазии тоозылар алнында Ферран Торрес пазох пiр гол теберге маңнанған. Че, улуғ хомзынысха, марығ чарғыҷызы аны санға албин салған. Ол гол кирчеткен туста Испанияның пiр футболизi офсайдта пол партыр. Прай ниме кӧрчеткен-сизiнчеткен техника анзын маңат киречiлепче. Иң улуғ хомзыныс мында мына ниме – офсайд нинҷе-де миллиметрге ле пол партыр. Че аны хайығ чох артыспааннар.
Че Испанияның футболизi пу туста кӧмес пасха нимее чапсаан полар: хайди iди позын сыбыра хызааннап, хырыс чӧрчеткен нанҷы-арғыстары ноға мячты андар ла тебiзерге маңзырапчалар. Мының алнында ла аны хомайлирға харасчатпадылар ба. Анзы даа тиктең нимес. Ойын тузында гол кирген кiзее кемнең андағ чахсы пас пирiлгенi хайди даа санға алылча нооза. Аннаңар постары гол кир полбинчатханда, чахсы пас пирiп, махтаға сығып аларға кирек.
Чазырбаспын, тилекейдегi футбол пайрамы полчатхан туста Норвегияның командазы ӱчӱн матап «ағырғам». Пiлiгҷiлернiң тӧлкеленгенi хоостыра, пу хазнаның чиит командазы пiрдеезiнең хорыхпинча, хайди даа чарым финалға чидiп аларға кирек тееннерiне тыңох киртiн парғам. Олар Грузияны утып алғаннарында, киртiнiзiм уламох тыыбысхан. Аннаңар, хараа полза, хараа турып, оларның ойыннарын кӧрiп аларға харасчаңмын. Олар утыр салғанда, кӧңнiм саңай тӱс парған, кӱнӧрте хати кӧзiтчеткен ойыннарны ла харах пулиинаң кӧр салҷаңмын. Олох арада тилекей марии хайди парчатханын пiстiң пiлiгҷiлерiбiс ӱзӱрчеткенiне хайығ айландырҷаңмын.
Прай кӧрiгҷiлер чiли, Аргентинаның футболисттерi ойыннар тузында най тың иртiнчеткеннерiне тың хыпчыхчаң полғам. Позым алынҷа сiрернiң дее «хара» кӱннерiң чидер тiп сағын салҷаңмын. Аннаңар даа азах меетте олар Испанияның командазынаң ойнапчатханда, хараазын турып, телевизор алнында одыр тастабысхам. Най тың иртiн чӧрчеткен ӱчӱн хайди даа нандырығ тудар тус читче. Халғанҷы ойын тузында полбаза, соонаң хаҷан даа килiспес, орай пол парар. Ол сылтағнаң ойын хайди парарын кӧр сыххам.
Сынап таа, хыйға ӧбекелерiбiс орта сизiнҷең полтырлар, пасхазына хомай сағынғаны алай хомай иткенi ӱчӱн хайди даа тӧленерге килiсчеткенiн. Мында улуғ пiлiгҷi-кӧрiгҷi поларға кирек чоғыл. Аргентинаның «хара» кӱнi читкенi харахха тасталчатхан. Иң не пастағызы Лионель Месси хара чалғысхан халғаны чапсытхан. Прай команда сыбыра ағаа ла «тоғырланчатханына» кӧнiк парған саблығ футболистке нанҷы-арғыстары хайығ айландырбиныбысханы аны даа тың таңнатхан осхас. Анзын сизiнiп, команда капитаны арачыланыста ойнапчатханнарға «полызарға» парыбысхан. Анда ол харахха тың тасталбас нооза.
Че Испанияның футболисттерiн тохтатчаң оңдай чоғылға тӧӧй. Олар прай команданаң пiлiп арачыланчалар, iдӧк пiр чӧптiг алнынзар iдiлiзе тӱсчелер. Аннаңар саблығ футболисттер мячты хайдар даа тепcелер, анда ол Испанияның командазының холына кiр парча. Паза мындағ ниме кӧмес чапсыстығ пiлдiрген: мяч оларның на чахиин толдырчатханға тӧӧй. Итсе, анзы оңарылыстығ. Хаҷан сын устар ойынға кiрiбiсселер, прай сағынған сағыстары оой ла толдырылчатханға тӧӧй. Сынында андағ чахсы кӧзiдiмге чидiп алар ӱчӱн кӱннең кӱнге аар, посха айабас тимненiс иртiрерге килiсчеткенiн пiлчебiс.
Анзына киртiнерге дее сидiк, че тоғазығның ӧӧн чардығында Аргентинаның футболисттерi «ыырҷының» хаалхазына пiр дее хати орта тееп полбааны таныхталған. Мяч, саңай аптат салған чiли, андар-мындар хынып учух чӧрче, че хаалхазар чол ундут салғанға тӧӧй. Аннаңар, ойынның чардығы чиңiс чох тоозылғанда, хоза тус пирiлген. Ол тусха орта командалар мячты постарында нинҷе тус тутханнаңар искiрiлген. Мында даа Аргентина ӧрiнҷең кӧзiдiм пол парған. Олар, Испаниянаң тиңнестiрзе, саңай соона халтырлар, 36 % мячнаң тузалантырлар.
Ағаа хоза, ойынның ӧӧн чардығы тузында командаларның футболисттерi iкi хати тудызарға маңнанғаннар. Че иң не ӧӧнi – Аргентинаның командазында алызығлар пол парғаннар. Тоғазығның iкiнҷi чардығында стадионда Леандро Паредес кӧрiнген. Ол позының тудысхах хылиинаң кӧп хати «махтаға» сыххан. Че чарғыҷылар, аның «ойнастарына» хайығ айландырбин, хатығлабин турғаннар. Мында даа пастағы туста кирек андағ оңдайнаң парған. Леандро пiрее футболисттi аңдарыбысчаң. Алай iде сазыбысчаң. Че сым на турчатхан Родризер кистiнең пастыр килiп, учазынаң тыыда сабысханда, чарғыҷының хылығы тудыбысхан. Ол ағаа сарығ карточка кӧзiт пирген. Анзы сах андох аннаң талас сыххан. Команда капитаны аны чадап ла амырадып алған. Че анзы хомай хылиин алыстырбаан, мяч соонҷа сегiрiбiскен испанецтi саңай аңдара тебiскен. Андағ хылыныс ӱчӱн марығ чарғыҷызы ағаа пазох карточка кӧзiткен. Анзы хызыл карточкаа тиңнелче. Iди Аргентинаның командазында он на футболист халған.
Хоза тус пирiлгенде, ойынның ӧӧн кӧрiмi тың алыспаан. Мяч ӧӧнiнде Испанияның футболисттерiнiң холында полған. Тоғазығның 106 минутазында Педро Порро ырахтынох Аргентинаның хаалхазынзар тебiскен. Нико Уильямс, тiзең, мячты паснаң Ферран Торрестiң азахтарынзар тӱзiр пирген. Анзы гол кирiбiскен. Соонаң Испанияның футболисттерi, Ферранны махтап, хаалханың тимiрлерi парчан ээл партырлар тiп чоохтасчатханнар.
Аргентинаның футболисттерiн най тың хомайлирға чарабас. Олар гол кирiп аларға матап сiренгеннер. Мында пазох ла Лионель Месси махтаға сыххан. Пастағызын ол Маркос Сенесиге чахсы пас пирiбicкен. Анзы, тiзең, хаалха хадағҷызының сырайына орта тебiскен. Iкiнҷiзiн Месси Джулианоға андағох маңат пас пирiбiскен. Анзы мячты хаалханың ӱстӱнҷе учухтырыбысхан. Iди Аргентина iкiнҷi орында пол парған. Ойын тоозылғанда, саблығ Лионель Месси стадионда чалғысхан ӱр одырған. Пiрдеезi андар чағын пастырбаан. Тилекейге саблығ футболист чемпионатнаң саңайға анымҷохтасчатхан. Аның кӧксiне кӱмӱc медаль iлдiр пиргеннерiнде, ол чалғысхан на хыйа пастыра халған. Лионель Месси ылғапчатхан! Хайдағ даа полза, тилекей чемпионаттарында алты хати араласхан, сыбыра махтаға сых турған. Амды саңайға анымҷохтасча. Хайдағ кiзi чӱрексiбес. Аннаңар аны прайзы чахсы оңарған.
Сом интернеттең алылған
Автор :
Анатолий Султреков
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
