Чарым финалның таңнастығ ойыннары
17.07.2026
Хабарлар
Ламин Ямаль (сол саринаң) паза Килиан Мбаппе ойын тузында
Футбол. Франция Испаниянаң тоғасхан, Аргентина – Англиянаң
Пастағы ойын 14 от айында ирткен. Аны кізілер чидікпин сағааннар. Чазыда Франция паза Испания тоғазарлар нооза. Ікі ӧме алындағы «ыырҷыларын» сизінмин халған тирге чарир. Амғы ойын хайди иртер ни? Ол оңдайынаң 2022 чылдағы мундиальның азах меедіне тӧӧй полар, неке. Андада финалда чиңіc ӱчӱн Франция Аргентинанаң хада ойнааннар. Хайдағ матч полды! Ойын 3:3 саннаң тоозылған соонда чиңіcчіні пенальти тузында табарға киліскен.
Футбол чазызы кӧзіткен: ізенген тағда киик полбинча. Французтар най уйан ойнабысханнар. Пастағы таймда «ӱс ӧңніглер» хомай нимес кӧрінгеннер. Че 20 минута пазынаң Люка Динь ойын тузында Ламин Ямальны тебіскен. Рефери пенальти чарлаан. «Фурия роха» сан асча. Испания алнында. Францияның ӧмезін ит салғаннар, таң? 30-ҷы минутада Вильям Салиба, кинеп парып, аннаң андар ойнап полбаан. Чідіріг французтарның кӧңнін тӱзірген. Тоғазығның ікінҷі чардығында капитан Килиан Мбаппе арғыстарының кӧңнін кӧдірерге кӱстенген. 58-ҷі минутада «ӱс ӧңніглернің» хаалхазынзар пазох меспек учухча. Сан 3:0 поларҷых, че чарғыҷы Ламин Ямальның меспегін санға албаан. Офсайд пол партыр.
Испанияның командазы – 2010 чылдағы футболҷа тилекей чемпионы. Аның соонда «фурия рохаа» соон сӱрістіре ӱс мундиальда оң полбаан. 2014 чылда испаниядағылар плей-оффха сых полбааннар, 2018 чылда марығның 1/8 чардығында Россияа утыр салғаннар, 2022 чылда – олох раундта Мароккоға. Ӧменің амғы чиңістері ӧӧн тренер Луис де ла Фуэнтенең палғалыстығ. Аның устаанынаң «фурия роха» тӧрт чыл аразына Нацияларның лигазын паза Европаның чемпионадын утып алған, амды мундиальның азах меедіне сыхты.
Аргентинанаң Англия 15 от айында ойнааннар. Пу мундиальда командаларның ӱлӱстері тӧӧй. Ікізі дее чарым финалға теере ФИФА-ның рейтингінҷе тилекейнің 10 иң артых ӧмезінең тоғаспаан. Плей-офф ойыннары «ӱс арсыл аңа» даа, «альбиселестее» дее сидік ирткеннер. Пасха командаларның паза «ағырчатхан» улустың таниинаң, чарғыҷылар Англияа паза Аргентинаа «полысчалар». Чоохтирға кирек, ікі ӧменің ойыннары хаҷан даа улуғ хайығда. Алында олар пис хати тоғасханнар. Иң танығлығ матчтаң 40 чыл ирт парды, пӱӱл аны матап сағысха кирчелер.
Ойыннаңар чоохтаза, пастағы тайм уғаа ээрістіг ирткен. Футболисттер ойнир орнына китенгеннер. Полған на ӧме азах меетте аралазарға сағынчатпас па. Англия футболның тӧстегҷізіне саналчатса даа, чемпионатта 1966 чылда ла чиңіc тутхан. «Альбиселестенің» тархыны чидіглерге хай-хай пай. Аргентина ӱс хати чемпион полған, олох син хати – кӱмӱc призер. Итсе, тайм тоозылчатханда, ойын ӧткін арах пар сыххан. Тоғазығның ікінҷі чардығында «ізіг» полар. Тынанып алған соонда Аргентина сан азарға чаратты. Меспек чаза учухча. 55-ҷі минутада «ӱс арсыл аң» нандыр пирген. Сан – 1:0. «Альбиселесте», алты хати чарым финалда ойнап, пір хати даа утырбаан. Аны сағысха киріп, таң, аргентинадағылар атакаа парчалар. Че «ыырҷының» хаалха хадағҷызы Джордан Пикфорд меспекті тудып алды. Матч тоозыл парир. Сан олох ла. «Альбиселесте» утырча. Тиктең нимес Аргентина 2022 чылның чемпионы. 85-ҷі минутада «ӱс арсыл аңа» голны Энцо Фернандес тебіскен, 90-ҷы минутада – Лаутаро Мартинес. Ікізіне пас пирген Лионель Месси. Аргентина 2:1 саннаң чиңіc тутча! Команда азах меетте Испаниянаң хада ойнир, Англия паза Франция хола медаль ӱчӱн харбазарлар.
Пасха хабарлардаң: «Интер Майами» клуб (США) Кабо-Верденің командазының хаалха хадағҷызы Возиньянаң чӧптезіг идiбізерге тимде. Футболисттің ӱлӱзі чапсытча. Португалияда ол ікінҷі дивизиондағы клубта ойнаан. Аннаң хада контракт пӱӱл хандых айында тоозыл партыр. Возинья, тилекей чемпионадында аралазып, футболнаң анымҷохтасхан тирге чарир. Салтарында, марығ тоозылғанҷа ағаа 28 миллион кізі пазын cалған. Мундиальның кӱзі илбек.
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
