Иң кӱстіглернің аттары адалған
15.07.2026
Хабарлар
Норвегия мундиальда турыстыра ойнабысханында Эрлинг Холанның хозымы улуғ
Футбол. Мундиаль тоозарға чит тее парир. 9 – 12 отта командалар чарым финалзар сығар ӱчӱн ойнааннар
Чемпионаттың тӧртінҷі чардығын Франциянаң Марокко асханнар. Матч 9 отта ирткен. Пастап оңарарға даа сидік полған: Африканың командалары удур-тӧдір ойнапчалар, таң, Францияның футболисттері пір чазыда тоғас парғаннар. Марокконың командазында алты кізінің тӧреен-ӧскен чирі Франция полтыр. Ноға ол нимее прайзы хайығ айландырча? Марокконың ӧмезі улуғ турнирлерде чахсы ойнапча. Кӧзідімге, 2022 чылда олар тилекей чемпионадында тӧртінҷізі полыбысханнар. Команданың пӧзік узының чазыдының пірcі – тимде футболисттерні ӧмезер хығырғаны. Францияның піріктірілген командазынаңар чоохтаза, футболисттернің омалары хоостыра сизінерге чарир: оларның ӧбекелері «хара» континенттең сыхханнар. Африкадағылар, тізең, хысха даа, узун даа дистанцияларға чӱгӱрерге кӱстер. Футболда табырах чӱгӱрерге паза ӱр майыхпасха киректелче. Алында искіргеннер: мундиальның тӧртінҷі чардығынзар Европаның алты ӧмезі ирт парыбысхан. Че командаларнаң таныссаң, полған на ӧмеде Африкадаң сыхханнарның тӧлін табарға чарир. Глобализацияны тохтат полбассың.
Амғы арға-мӧрійде Франция уғаа чахсы ойнапча. Ӧмедегілер соон сӱрістіре «ыырҷыларын» утып парирлар. Марокконы даа олар 2:0 саннаң чиңіп алғаннар. Прайзы французтар чемпион поларлар тіп ухаанҷылапча.
Чемпионаттың тӧртінҷі чардығына теере Испанияның ӱлӱзі андағох полған. Пис ойын изере «фурия роханың» хаалхазы хуруғ тур халҷаң. 10 отта испаниядағылар Бельгиянаң хада тоғасханнар. «Хызыл айналарға» чон киртінмеен. Олар Сенегалны чадап утып алғаннар, ӧмелер мариинда Ираннаң паза Египетнең хайым ойнабысханнар. Итсе, Испаниянаң ойынны кӧрзең, оңарчазың, Бельгияа талаан читпиндір. Матчта аралас полбаан капитан Юри Тилеманс. Футболист тренировкада кинеп партыр. Аңдағ оңдайларда «хызыл айналарға» хатығ чуххан. 30-ҷы минутада санны асхан «фурия роха». 2024 чылның Европа чемпионы чиңіcті таныхтирға тимде. Че 41-ҷі минутада испаниядағыларның хаалхазынзар меспек учухча. Аның авторы – Шарль Де Кетеларе. Ол меспек Бельгияның ӧмезіне кӱс хосхан. Ікінҷі таймда олар ӧткін ойнааннар. Хаалха хадағҷызы Тибо Куртуа кинеп парбаан полза, кирек сағыбаан оңдайнаң парыбызарҷых. Куртуа тилекейнің иң чахсы хаалха хадағҷылар санына кірче, ол чох Бельгия турыстыра арачылан полбаан. 88-ҷі минутада сан 2:1 пол парған. Таныхтирға кирек, команда хаҷаннаң «хызыл айналар» сола ат ал чӧрче. Пір туста ӧмедегілер най уйан ойнаптырлар. Андада ачығ тілліглер футболисттерні «хызыл хойыҷахтар» тіп адап сыхханнар.
Тӧртінҷі чардығының халғанҷы ойыннары 12 отта ирткеннер. Ол кӱн Норвегиянаң Англия тоғасханнар, анаң Аргентинанаң Швейцария ойнааннар.
Норвегияның командазын чемпионаттың матырларына санирға чарир. «Викингтер» арға-мӧрійде тӧртінҷі ле хати араласчалар. Иң улуғ чидии – 1938 паза 1998 чылларда мундиальның 1/8 чардығында араласханы. Пӱӱл олар ӧмелер мариинда Сенегалны чиңіп алғаннар, плей-оффта – Кот-д’Ивуарны, марығның 1/8 чардығында – Бразилияны. Халғанҷы команда – футболҷа пис хати тилекей чемпионы. Итсе, бразилиядағылар «викингтерні» пір дее утып полбинчаттырлар. Олар футбол чазызында пиc хати тоғасханнар, ікі ойын хайымнаң тоозылған, ӱс матч – Бразилияның утырызынаң.
Пір cӧснең, 12 отта Норвегия Англиянаң тиңни ойнирына пірдеезі ікінҷілебеен. Пастағы чарым час «ыырҷылар» китенгеннер. 36-ҷы минутада харбазығ тузында «викингтер» сан асчалар. Гол норвегиядағыларның кӧңнін кӧдірче, олар атаканың соонҷа атакаа парчалар. Че 45-ҷі минутада сан 1:1 пол парған. Аны «викингтерге» Джуд Беллингем кире тебіскен. Пу меспектеңер чоохтар ам даа парча. Ол камераа тееп партыр, аннаңар чарғыҷы голны санға албасха кирек полтыр. Ойын 1:2 саннаң тоозылған. Ікінҷі меспек – Беллингемніңӧк чидии. Тоғазығның ӧӧн салтары: «ӱс арсыл аң» чиңісті оғырлап алған.
2026 чылның чемпионады Швейцарияа уғаа танығлығ. «Хызыл крестоносецтер» 72 чыл пазынаң пазох арға-мӧрійнің тӧртінҷі чардығында ойнааннар. Аргентинанаң тоғазығ киречілеен: Швейцарияның амғы ӧмезі пӧзік устығ паза пик хуйахтығ. «Альбиселетсе» пастағы меспекті 10-ҷы минутадох «ыырҷының» хаалхазынзар кире тебіскен. Тайм тоозылча, сан андағох. Матчтың ікінҷі чардығында Швейцария ӧткін арах ойнап сыххан. Кӱстеніс тикке парбады, 67-ҷі минутада олар санны тиңнестірібіскеннер. Ӧрініс ӱр полбаан. Тӱрчедең «хызыл крестоносецтер» пір футболист чох халғаннар. Сайбағ ӱчӱн команданың спорт «чылтызы» Брель Эмболо ойыннаң сығардырыбысхан. Овертаймда Швейцарияа удурлазарға кӱзі читпеен. «Альбиселетсе» 112-ҷі паза 121-ҷі минуталарда хоза ікі гол позының адына пас салған.
Пӱӱл чарым финалға тилекейнің иң кӱстіг командалары сыхханнар. ФИФА-ның рейтингінҷе Аргентина пастағы орында парча, Испания – ікінҷі орында, аның соонда Франция паза Англия. Ойыннар 14 паза 15 отта иртче. Франция Испаниянаң ойнир, Аргентина – Англиянаң.
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
