Тылаастар, ойыннар паза чиңістер
10.07.2026
Хабарлар
Англия командазының футболисттері Гарри Кейн (сол саринаң) паза Джуд Беллингем
Футбол. Чемпионаттың 1/8 чардығы чӱрексіндірген паза таңнатхан
Мундиаль тилекейнің ӧӧн марығларның санына кірче. Кибір хоостыра андағ арға-мӧрій тылаастарға пай поладыр. Піреезі, тархында халып, турнирнің оңдайларын алыстырча. Амғы чемпионаттың иң улуғ тылаазы США-ның футболизі Фоларин Балоганнаң палғалыстығ. Босния-Герцеговинаның командазынаң ойнаанда, ол Тарик Мухамеровичтің ээҷік-табанына пазыбысхан. Cайбағ ӱчӱн арбитр Балоганға хызыл карточка кӧзіт пирген. Хызыл карточка – ол теестегі ойынға дисквалификация. Че 5 отта ФИФА Балоганға Бельгиянаң ойнирға чаратча. Rӱғtӱrs, Associatӱd Prӱss агентстволарның искіриинең, ФИФА-ның устағҷызы Джанни Инфантиноға CША-ның президенті Дональд Трамп сығдыратхан.
Ол чарадығдаң прай хазналар тоғыр полғаннар. Оларға хозылған УЕФА. Килер чылда Инфантиноның табығлар. Пу кӱннерде футбол тилізі ӱчӱн нандырчатхан пірігіcтер ФИФА-ның устағҷызына наа кізіні тілеп пастабысханнар.
США-наң Бельгия 7 отта футбол чазызында тоғасханнар. «Хызыл айналар» турнирнің ээзін, ойын пасталғандох, чабыра пас сыхханнар. США-ның пір ле хати нандыр пирер кӱзі читтір. Ікінҷі таймда футбол чазызы Бельгияни полған. Аалҷылар 4:1 саннаң чиңіc тутханнар. Пір сӧснең, Фоларин Балоган ойнаанынаң США-ға туза чох полған.
Мундиальның 1/8 чардығы 4 – 7 отта ирткен. Прайзы Португалиянаң Испания хазыр ойнирлар тіп cағынған. «Валидоллығ» матчты чон сахтап полбаан. Португалиядағылар, 0:1 саннаң утыр салып, ибзер наныбысханнар. Сынап ікі тоғазығ таңнатхан: Мексика – Англия паза Аргентина – Египет.
«Ӱс арсыл аңның» командазы ойын алнында тың чӱрексіптір. Пастағызы, Мексиканың ӧмезінең тоғазығ «Ацтека» стадионда ирткен. Ол, Тиңіc талай ӱстӱнең синезе, 2240 метр пӧзікте орныхча. Андағ пӧзікте кізее кии чидіспинче, аннаңар ойнирға сидік. Ікінҷізі, «Ацтекада» 1986 чылда Англия Аргентинаа чемпионаттың тӧртінҷі чардығында утыр салған. Кӧрігҷілер «Худай холы» парын піліп алғаннар. Ағаа хоза мексиканецтер амғы мундиальда турыстыра кӧрінгеннер. Тоғазығ алнында чоохтар кӧп полғаннаңар, ікі ӧменің футболисттері, чарғыҷы сығырзох, атакаа парарлар тіп сағынғаннар. Сынында пастағы чарым час командалар, алҷааc ит саларға чочынып, китенгеннер. Че 36-ҷы минутада «ӱс арсыл аң» сан асча. 38-ҷі минутада пазох гол! Ікізі дее – 23 частығ Джуд Беллингемнің чидии. Голлар соонда Мексика «усхун» килген тирге чарир. 42-ҷі минутада Англияның хаалхазынзар меспек учухча. Сан – 2:1. Ээлер утырчатса даа, оларның чиңіc тудар оңдай пар. Тайм тоозылғанҷа Мексика ӱс хати гол сабызарға кӱстенген. Англиядағылар чахсы арачыланғаннар.
Ікінҷі таймда сайбағлар кӧп полған. Ол сылтағнаң «ӱс арсыл аңның» футболизі Джарелл Куансаны ойыннаң сығарыбысханнар. Арбитр, тізең, ікі пенальти чарлаан. 60-ҷы минутада Гарри Кейн 11 метрдең Мексиканың хаалхазынзар меспекті кире тебіскен, 69-ҷы минутада Рауль Хименес – аалҷыларның хаалхазынзар. Сан – 3:2. Ойын тоозылғанҷа ол алыспаан. Англияның командазының пик хуйағына морсынарға халча. Ікінҷі таймда ӧмеде 38 минута 10 на кізі ойнаан. Іди дее полза, олар чиңіc тутханнар. Амғы чемпионат «ӱс арсыл аңа» cидік иртче. Алында англиядағылар ДР Конгоны чадап утып алғаннар, Мексиканаң ойын ідӧк аар парды.
Аргентинанаң Египет 7 отта ойнааннар. Пу тоғазығны Бельгия – Сенегал матчнаң тиңнестірерге чарир. Хысхаҷахти чоохтаза, Аргентина, 0:2 саннаң утырчадып, салтарында 3:2 cаннаң чиңіc тутхан. Лионель Месси пазох 11 метрдең гол кире саап полбаан. Алында, Австриянаң хада ойнап, уйатха кірген. Аргентина Египетнең уйан ойнабысханның ӧӧн сылтаа – «фараоннарны» нимее салбааны.
Мундиальның тӧртінҷі чардығынзар Европаның алты ӧмезі ирт парыбысхан: Франция, Испания, Бельгия, Норвегия, Англия паза Швейцария. «Хара» континенттің алнын алар Марокко, Ӱстӱнзархы Американың – Аргентина. Турнирнің ӱс ээзі ойнирға тоос салған.
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
