Олар чоллардағы чӧрiстi хорғыс чох итчелер
08.07.2026
Хабарлар
Пайрамнығ мероприятие араласчылары хада-пірге сомға суурынғаннар
Хазна автоинспекциязына – 90 чыл. Республиканың ӧӧн музейiнде ГИБДД тоғынҷылары постарының профессия ӱлӱкӱнiн паза хазна автоинспекциязына пайрамнығ 90 чыл толчатханын таныхтааннар
Пайрамнығ мероприятиеде араласханнар Хакасия пазы Валентин Коновалов, Ӧӧркi Чӧп кнезi Сергей Сокол, Ӧӧркi чарғының, прокуратураның паза кӱс структураларының устағҷылары, iдӧк ГАИ-ның устаанда кӧп чыл тоғын салған ветераннар.
Россияның паза Хакасияның гимннерi толдырылған соонда сӧс пирiлген Хакасияҷа МВД министрi, полицияның генерал-майоры Владимир Генераловха. Пастап министр Хазна автоинспекциязының тоғынҷыларын паза ветераннарын служба тӧстелген кӱннiң 90 чылынаң алғыстаан.
Хайди ол чоохтаан, ГАИ-ның тархындағы чолы 3 отта 1936 чылда СССР-ның Чон Комиссарлары Чӧбi алған чарадығдаң пасталған, хаҷан «СССР-ның тоғысчы-кресен милициязының ӧӧн устааның Хазна автомобиль инспекциязынаңар положение» чарадыға алыл парған. Че аның соонда подразделениенiң ады хайди даа алыс турза – ГАИ-даң ГИБДД-ға теере – аның тоғызы алыспаан: чоллардағы чӧрiстi хорғыс чох идерi паза чӧрiс араласчыларының чуртазын арачылиры. Амғы технологиялар тилiпчетселер дее, иргi чоллар тыхталчатса, наа чоллар пӱдiрiлчетсе, видеокамералар турғызылчатса, инспекторның тоғызы пiр дее алыспинча.
Алынҷа хайығ айландырарға чарир Хакасияның Хазна автоинспекциязының ирткен чылдағы тоғыс салтарларына: инспекторлар чолларҷа чӧрҷең правилолар сайбалчатханын 400 муң азыра хати тохтатханнар, ол санда iзiлiк полған ӱс муңҷа водитель руль кистiнең хыйа идiлген, правазын алдыртыбысхан тӧрт муңҷа кiзi тутырған. «Пу олаңай ла саннар нимес, – таныхтаан министр, – ол муңарлап арачылалған чуртас. Халғанҷы 10 чылда саайларда ӱрееннер паза палығлатханнар саны регионда iкi хати хызырыл парған».
Аның чооғынаң, Хазна автоинспекциязындағы служба, профессияда тирең пiлiстер кирексiпчеткеннең пасха, оой нимес туста кирек чарадығ табырах алыбысчадар оңдай, кiзiлерге тузында полызығ пирерге тимде поларын кирексiпче. Пу профессияа ноо даа туста полызарға тимде кiзiлер килчелер.
МВД устағҷызы алынҷа алғыс сӧстерiн читiрген службаның ветераннарына, хайзылары пай опыдын паза кибiрлернi чиит инспекторларға пирчелер. Ол прай тоғынҷыларға паза ветераннарға пик хазых, профессияда пӧзiк чидiглер паза хорғыс чох чоллар алғаан.
Владимир Генералов, салтарлығ паза алғыстастығ чооғын тоозып, службада пӧзiк чидiглер кӧзiтчеткен тоғынҷыларға ведомствоның сыйыхтарын паза алғыстас пiчiктерiн читiрген.
Мероприятиенi апарчатхан тоғынҷының искiриинең, Хазна автоинспекциязы тӧcтелгеннең cығара улуғ тилiс чолын ирткен. 1936 чылда Хакасияда служба тӧcтелгенде, iкi ле тоғынҷы iстенiп пастаан, орамаларда чол танығлары паза светофорлар чох полғаннар. Пастағы светофор Ағбанда 1971 чылда ла турғызылған, аның соонда служба тыып сыххан, аның кадрлар паза техника саны ӧс сыххан.
Амды Хазна автоинспекциязы МВД-ның иң улуғ подразделениелерiнiң пiрсi полча, хайзында Хакасияда 350 азыра тоғынҷы служба апарча. Кӱннiң сай орамаларзар паза чолларзар дежурстваа 80 патруль автомобильi сыхча, чоллардағы сайбағларны iлезiне сығарҷаң наа видеокамералар комплекстерi турғызылчалар, ӧнетiн техника тоғыс апарча.
Ведомство амды мындағ ӧӧн пӧгiннер толдырча: чолларҷа чӧрҷең правилолар хайди толдырылчатханын сыныхтағда тудары, саайлар полдыртпас профилактика тоғызын апарары, чолларҷа чӧрчеткеннернең чарыдығлығ тоғыс апарары, транспортты санға турғызары, сыныхтағлар иртiрiп, водитель удостоверениелерiн пирерi, iдӧк сӱр парыбысхан автомобильлернi тiлирi паза чол инфраструктуразын сыныхтағда тудары. Алынҷа хайығ салылча ӧсчеткен тӧлнең тоғыс паза чолларда олғаннарны саайға кирбес профилактика тоғызын апарарына. Iди Хакасияда чол чӧрiзiнҷе олған инспекторларының (ЮИД) 168 отряды тоғынча, оларзар 2300 азыра ӱгренҷi кiрче. Олғаннар чайаачы марығларда, чӧрiмнерде, чоллардағы чӧрiстi хорғыс чох идер аймах ӱгредiг программаларында араласчалар, чолларда орта тудынарға ӱгретчеткен чӧрiмнер иртiрчелер.
Анаң залдағы чонзар Хакасия пазы Валентин Коновалов айланған:
– Хазна автоинспекциязының аарлығ тоғынҷылары паза ветераннары! Мин сiрернi ведомствоның пайрамнығ 90 чылынаң паза республиканың 35 чылынаң алғыстапчам! Пiстiң Хазна автоинспекциязы чонның улуғ аарлазынаң тузаланча, аның штаттар санын ам даа ӧскiрерге кирек. Ол Хакасияҷа МВД-ның иң улуғ подразделениелерi санына кiрче, чолларда саайлар полдыртпас профилактика тоғызын кӧп апарча. Сiрернiң тоғызыңар пiстiң региондағы амыр чуртасха iзенic пирче. Техника хайдағ даа чахсы полза, че сiрернiң тоғызыңарда ӧӧнi – кiзiлер. Сiрернiң, посха айабин, служба апарчатханыңар чоллардағы чӧрiстi иптiг итче, сидiксiнiске кiр парғаннарға сiрер иң пурнада полызарға килчезер, халых чонға нандырығның кӧзiдiмi полчазар. Алынҷа алғыс сӧстерiн читiрчем ветераннарға, хайзылары службаның иң чахсы кибiрлерiн тӧстееннер. Сiрернiң пай опыдыңар чиит тӧлге iзестiг тӧстег полча. Пик хазых прайзыңарға паза сӧбiреңерге! Ӱлӱкӱннең! – чооғын тоосхан Хакасия устағҷызы.
Ол iдӧк чахсы тоғынчатханнарға алғыстас пiчiктерiн читiрген. Ӧӧркi Чӧп кнезi Сергей Сокол Хазна автоинспекциязы тоғынҷыларын паза ветераннарын парламенттiң депутаттары адынаң алғыстаан. Хайди ол таныхтаан, ГАИ-ның ӧӧн тоғызы – кiзiлерге тузында полызығ пирерi. Мин позым даа, чолларҷа парчадып, удаа саай полған орыннарға урун парчам, анда чахсы кӧрчем, хайди ГАИ тоғынҷылары ол саайларда тоғынчатханын. Ӧӧнiнде чолларда кiзi кӧрбинчеткен малларнаң саайлар пол парча. Пу сурығны iдӧк пӧгерге кирек. Сiрер кiзiлерге сыбыра полысчазар, чоллардағы чӧрicтi иптiг итчезер. Улуғ алғыс сiрерге, службаңар ӱчӱн! Амды ГАИ-ның тоғызына кӱстiг, табырах ойлаҷаң мотоцикллер кирек, пiс сiрернi аннаң тирiндiрерге полызарбыс!
Пик хазых, чахсы чуртас прайзыңарға!
Сергей Сокол ГАИ-ның тоғынҷыларын Ӧӧркi Чӧптiң алғыстас пiчiктерiнең таныхтаан.
Хакас филармониязының солисттерi Хазна автоинспекциязының чайаачы тоғынҷылары паза Орджоникидзе аймааның «Крутой поворот» ЮИД ӧмезi чыылған чонға концерт кӧзiткеннер.
Сом Илона Каковани
Автор :
Николай Султреков
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
