Хада-пiрге тоғынар оңдайлар ӱзӱрiлген
08.07.2026
Хабарлар
Александр Новьюхов
Тоғазығ. Хакасия пазы Валентин Коновалов Россия Федерациязының Ханты-Мансийск автоном округынаң – Юградаң сенаторы, Россияның Алтынзарығының, Сибирьнiң паза Ыраххы Востоктың ас саннығ тоң чоннар ассоциациязының президентi Александр Новьюховнаң тоғасхан
Тоғазығда iдӧк Хакасияның сенаторы Олег Земцов паза республика пазының чоннар аразындағы хайызығлар сурығларынаң айғасчатхан орынҷызы Богдан Павленко араласханнар. 2026 чыл хазнабыста Россияның чоннары пірікчеткен чыл тіп чарлалған, республикабыста – Хакасиядағы чоннарның ынархазы чылы. Аннаңар даа iкi устағҷының тоғазии пу сурығларға чарыдылған, анда тоң чоннарға хабазар оңдайлар ӱзӱрiлгеннер.
Валентин Коновалов республикабысты кiчiг Россия тiп адаан. Сынап таа пӱӱнгi кӱнде Хакасияда 100 азыра аймах-пасха национальностьтығ чон саналча. Оларның ынағ, удур-тӧдiр пiлiзiп чуртирына улуғ хайығ айландырарға кирек.
Александр Вячеславович iдӧк пу чыл прай хазнаа танығлығ полча тiп таныхтаан. Пӱӱл Россияның Алтынзарығының, Сибирьнiң паза Ыраххы Востоктың ас саннығ тоң чоннар ассоциациязы пастаанынаң президент Хазнабыстың тоң чоннарының кӱнiн пастағызын на чарлаан. Аның тӧстелгенi хазна ӱлгӱлерiнiң тоң чоннарның сидiксiнiстерiне хайығ айландырарға, хада-пiрге тоғысты тӱзiмнiг апарарға полызар теен ассоциацияның устағҷызы.
– Пiс регионнарның кӧбiзiнде тоғыс хайди апарылчатханын кӧрчебiс. Мында Хакасияны алынҷа таныхтирға чарир. Пiстiң улуғ делегациябыстың чорығының пӧгiннерiнiң пiрсi Хакасиянаң, iстiндегi туризмнең палғалыстығ объектнең чiли, танызары полча. Пiс нинҷе-де танығлығ орында пол килгебiс, ол санда Сойан-Сус ГЭС-та, форель ӧскiрчеткен фермада паза пасха даа орыннарда, – чоохтаан Александр Вячеславович.
Iдӧк ол Хакасияның делегациязы «Алтынзарыхтың ипчiлерi» форумда ӧткiн араласхан ӱчӱн алғызын читiрген. Паза тоғазығда федеральнай законодательство кирексiнiстерi хоостыра тӧстелген халых чӧптернiң полномочиелерiн алғыдар сурығ ӱзӱрiлген. Хакасияда тоғынчатхан чӧптiң тоғызына хай пiрее алызығлар кирерге кирегӧк тiп таныхтаан Александр Новьюхов. Андағ чӧптерде пiрее регионнарда араласчыларның 95 %-i тоң чуртағҷылары полча, пiрее регионнарда, хомзынысха, андағ чӧптер пiр дее чоғыл. Пiреезiнде, тiзең, ӱлгӱ органнарының кiзiлерi кирiлген полчалар, андағ ниме полбасха кирек. Сағынчам, Хакасияның андағ чӧптерге кирер кiзiлерi, ол санда халых пiрiгiстерiнең, пар.
Александр Новьюхов пӱӱл Россияның Алтынзарығының, Сибирьнiң паза Ыраххы Востоктың ас саннығ тоң чоннар ассоциациязы «Народный доклад» проекттi чуртасха кирче тiп искiрген. Аны хоостыра хазнаның тархынынаңар сын искiрiглер пiр орында чыыларлар, оларнаң полған на кiзее тузаланарға чарир. Александр Вячеславович Хакасияны ағаа хозыларға хығырған.
Валентин Коновалов Александр Новьюховты республикаа хайығ айландырчатхан, хабазығ пирчеткен ӱчӱн алғыстаан. Iдӧк ол Хакасияның пасха регионнарынаң хада-пiрге тоғынарға, пiлiстернең алызарға тимде полчатханын искiрген.
Сом r-19.ru сайттаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
