Хабазығ ӱчӱн алғыс читіріп
03.07.2026
Хабарлар
Россия президентінің СФО-дағы полномочиеліг кізізінің орынҷызы Олег Денисенко
Тоғазығ. Республиканың 35 чыллығ пайрамына удур Хакасияда Россия президентінің Сибирьдегі федеральнай округтағы полномочиеліг кізізінің орынҷызы Олег Денисенко ааллапча
Киҷее Хакасия пазы Валентин Коновалов паза аның орынҷызы – республиканың Москвадағы тӧреміл кізізі Юлия Исмагилова – Россия президентінің Сибирьдегі федеральнай округтағы полномочиеліг кізізінің орынҷызы Олег Денисенконаң тоғасханнар.
Тоғазығны пастап, Валентин Коновалов Хакасияның ӧӧн музейінзер А.С.Пушкиннің адынаң Хоос искусствозының хазна музейінің чыындызынаң «Искусство впечатления. Импрессионизм» кӧзідігні ағылар улуғ тоғысты апарған ӱчӱн Олег Денисенконы алғыстаан. Хакас Республиканың 35 чыллығ пайрамын таныхтапчатханына удур аның чуртағҷыларына пӧзік искусствонаң чағын танызар оңдай пирілчеткені – уғаа аарлығ, олох туста ол уғаа нандырығлығ кирек, теен Валентин Олегович.
Олег Ивановичтің таниинаң, от айының 3-ҷі кӱнінде Сибирьде ікі республика пайрамын таныхтапча – ол Алтай паза Хакасия. Олар ікізі пір кӱнде республика атха турысханнар, аннаңар пӱӱн ікізіне 35 чыл толча. Олег Денисенко пістің республиканы пу пайрамнаң позы алғыстирға чаратхан.
Устағҷылар республиканың чуртас-экономика тилізінің, национальнай проекттерні паза хазна программаларын чуртасха кирерінің, туризмні тилідерінің паза пасха кӧcтеглернің сурығларын ӱзӱргеннер.
Пӱӱн Хакасия – ол кӧп экономика кӧcтегліг паза табырах тиліпчеткен регион. Тастындағы теелістерге хайбин, республика чыл сай позының чуртас-экономика кӧзідімнерін чахсыландырча.
– Пістің регионның ӧӧн кӧстеглерi ӧткін тиліпчелер: ниме-нооны тимнирі паза сығарары, аал хонии, туризм, пӱдіріг. Амғы пӧзік технологиялығ сығарыстарның инвестиция ачыхтары тӧстелче, ол санда «Хакас технология ойымы» алынҷа экономика орны, индустриальнай паза агропромышленнай парктар, – таныхтаан искіриинде республика пазы.
Валентин Коновалов Олег Ивановичке пістің республикаа хайығ салчатхан ӱчӱн, республикаа кирек сурығларны федеральнай синде пӧгерге полысчатхан паза пірге тоғынчатхан ӱчӱн алғызын читірген.
Сом Хакасия пазының паза Хакасия правительствозының пресс-службазыни
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
