Наталья Малышева – Россияның алты хати чемпионы
01.07.2026
Хабарлар
Пьедесталда чоннар аразындағы класстығ спорт узы Наталья Малышева
Поғдархас. Пістің хыстар ипчілер кӱрезінҷе Россия чемпионадынаң медальлығ айланғаннар
Арға-мӧрій Татарстанның ӧӧн городында 26-27 хандыхта ирткен. Кибісте чиңіс ӱчӱн 34 регионның кӱресчілері харбасханнар. Абахай спортсменнер 10 кӧдірімде кӱстерін сынааннар: 50 кг, 53 кг, 55 кг, 57 кг, 59 кг, 62 кг, 65 кг, 68 кг, 72 кг паза 76 кг. Хакасия алнын алғаннар чоннар аразындағы класстығ спорт устары Наталья Малышева паза Наталья Пудова.
Наталья Эдуардовна 2002 чылда тӧреен. Ол Тӧӧ чирінең сыххан. Чир-суғҷыбыс 50 кг узын сынапча. Пудова – кӱстіг спортсмен. Анзын чидіглер киречілепче. Наташа 2024 чылда Россия чемпионадында хола медаль утхан, пылтыр, тізең, чиңіс тутхан. Ідӧк хакас хыс – тилекей первенствозының кӱмӱс призеры (2024 чыл), Европа первенствозының чемпионы (2025 чыл). Пӱӱл Наташаа хатығ чуғар тіп пірдеезі ікінҷілебеен. 50 кг кӧдірімде пӧзік устығ кӱресчілерге Елизавета Смирнова (Дагестан) паза Надежда Соколова (Нижегородскай область) саналчалар. Ікізі дее Европа паза тилекей чемпионаттарында Россияа хола медальлар ағылғаннар. Ағаа хоза Соколова 2024 чылда Олимп ойыннарында аралазарға кирек полған. Пылтыр тың кинеп парып, кӱресчі илееде тус марығласпаан. Наташа Пудова аннаң хада чарым финалда тоғастыр. Пістің хысха оң полбаан. Утыр салып, чир-суғҷыбыс кічіг финалда Алдынай Даржаанаң (Тува) харбасхан. Салтарында ол ӱзінҷізі полыбысхан.
50 кг кӧдірімде азах меетте Смирнова паза Соколова харбасханнар. Тоғазығ 7:7 саннаң тоозылған. Утырчатхан Смирнова халғанҷы секундаларда «ыырҷызын» чиңіп алған.
Наталья Малышеваа (53 кг) пӱӱлгі чемпионат драма чох ирткен тирге чарир. Таштып аймаанаң сыххан спортсмен, ӱс тоғазығ иртiрібізіп, ол синох хати чиңіс тутхан. Азах меетте ол пазох Анжелика Ветошкинанаң харбасхан. Ікі абахай Россия чемпионадының финалында алында 2023, 2025 чылларда тоғасхан. Мында пасха ниме таңнатча. Наталья Малышева хазна синінде иртчеткен марығда алтынҷы хати чиңіс тутты. Пу чидіг чир-суғҷыбысты саблығ спортсменнер санына кирче. Аннаңар ТАСС, РИА Новости паза спортха чарыдылған СМИ-лар искіргеннер. Малышева чоннар аразындағы марығларда позын турыстыра кӧзітче. Ол Тилекей кубогында (2014) кӱмӱc медаль холға кирген, Европа нацияларының кубогында (2013, 2014) чиңіc тутхан. Ідӧк ол Европа чемпионаттарының кӱмӱс паза хола призеры (2017, 2025, 2026) полча.
53 кг кӧдірімде ӱзінҷі орынға сыхханнардаң чоннар аразындағы класстығ спорт узы Валерия Тюкпиекованы таныхтирға кирек. Валерия – шор чонның хызы, кӧп чыл Кемеров облазы ӱчӱн турысхан. Халғанҷы чыллар Пермь крайының алнын алча. Аның амғы тренері – Владимир Чучунов.
Пӱӱлгі чемпионаттың ахчалығ сыйыхтың чыындызы 15 миллион салковайға тиңнелген. Чемпионнарға 500 муң салковай читіргеннер, призерлар ахча алғаннарох.
Таныхтирға кирек, Хакасияда спорт кӱрезі пазох ӧӧн спорт кӧрімнерi санына кірче. Мында Республиканың аймах оңдайлығ харбазығларҷа олимп резерві cпорт школазының хозымы улуғ. Учреждениенің ӧмезі директор Сергей Смирновтың устаанынаң кирек пічіктер тимнееннер. Амғы туста пістің республикада спорт кӱрезінең хада алты ӧӧн спорт кӧрімi саналча: бокс, дзюдо, ниик атлетика, стол теннизі паза аар атлетика.
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
