Iкi тӧстег – хайдағ кӱннер турары паза биржа
01.07.2026
Хабарлар
Таарығ тузында
Аал хонии. Хакасияның аал хонии паза ас-тамах министерствозы 2026 чылдағы таарығ кампаниязының салтарларын иттi
Пӱӱл тоңастығлар 70 муң азыра гектар чирде одыртылғаннар, хайахтығлар – 34,3 муң гектарда. Тиксi республикада таарылған чирлернiң улии 122 муң гектарға тиңнелче.
Халғанҷы чылларда рапсты паза лӧннi кӧптең кӧп одыртчалар. Че олох туста пуғдай салылчатхан чирлернiң улии хызырылбинча. Пӱӱл гречиха ирткен чылдағызынаң кӧп салылған.
– Ол-пу культураларны салар чирлер синiн хосчатса алай хызырчатса, аграрийлер iкi прогнозха тӧстенчелер – хайдағ кӱннер турарына паза биржадағы. Культуралар аал хонии чырғалында кирексiнiсте поларға киректер. Че хайдағ кӱннер турарын хайығ чох артызарға чарабазох. Кӧзiдiмге, пiс Шира аймаанда лӧн одыртылчатханының хызырылчатханын кӧрчебiс. Пу культура тӧрт чыл чахсы ӧскiрiлген паза хоныхтарға маңат парыс ағылған, че ирткен чылда кӱскӱзiн хар ирте чаап парған – кизiлбеен хыралар халған. Гидрометцентрнiң ӱр тусха прогнозын кӧрiп, аграрийлер лӧн салылчатхан чирлернiң улиин хызырчалар. Олох туста Алтай аймаанда пу культураны ӱс муң гектар чирде таарып салғаннар, анзы кӧрiлген синнең 25 процентке кӧп. Тиксi алза, Хакасияда 27 муң гектарда рапс одыртыл парған, лӧн – 5,3 муң гектарда. Пӱӱл 1342 гектарда соя салылған, 500 гектарда – сал хузуғы, – таныхтаан Хакасияның аал хонии паза ас-тамах министрi Сергей Труфанов.
Тоңастығлардаңар чоохтаза, таарылған чирлернiң чарымызында пуғдай салылған – 34,3 муң гектарда, сула – 21,5 муң гектарда, гречиха – 3,3 муң гектарда.
Мал азыраҷаң ӧзiмнер одыртылғаннар: пiр чыл ӧсчеткен оттар – 12 муңа чағын гектарда, силосха кукуруза – 3,3 муң гектарда. Чир тамаа 400 гектар чирде одыртыл парған, яблах – 230 гектарда.
2026 чылда таарығ кампаниязын иң чахсы толдырғаннар санына Орджоникидзе паза Алтай аймахтары кiрчелер, оларда кӧрiлген чирлернiң 112 % паза 105 % таарыл парған. Планда кӧрiлген саннарға Пии, Шира паза Боград аймахтарында читкеннер. Тоңастығлар салылған чирлернiң улиинаң Шира аймаа (22,3 муң га) паза Орджоникидзе аймаа (19 муң га) асчалар.
Сом Илона Каковани
Автор :
Хакасияның аал хонии паза ас-тамах министерствозының пресс-службазы
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
