Наа спорт «чылтыстарын» тамысчатхан турнир
26.06.2026
Хабарлар
Саяногорсктағылар эстафетада ікінҷі орынға сыхханнар. Оң саринаң Артём Тетюхин турча. Аның ікі кӱмӱc медаль
Суғда чӱзері. Ағбанда «Сибирь кубогы» регионнар аразындағы турнир ирткен. Медальлар ӱчӱн саарбахтар харбасханнар
Пу марығ 1993 чылдаң иртірілче. Аның тӧстегҷізі – CCCР-ның cпорт узы, суғда чӱзерінҷе Алтай крайы федерациязының президенті Сергей Кашников. Хомзынысха, Сергей Иванович изен нимес. Ол син тус аразына турнир кӧп оол-хысха улуғ спортсар чол асхан. Анда Сибирьнің иң кӱстіг спортсменнері – Владимир Морозов, Арина Суркова паза пасхазы – марығласханнар. Морозов – 2012 чылдағы Олимпиаданың хола призеры, кӧп хати тилекей рекордтарын турғысхан. Арина Суркова «хысха» суғда (25 метрліг бассейнде) тилекей чемпионы полча. Ідӧк Европа мариинда ікі хати чиңіс тутхан.
Ағбан «Сибирь кубогын» пӱӱл 12-ҷі хати удурлады. Кибір хоостыра мында арға-мӧрійнің ікінҷі чардығы ирткен. Пас меетке 11 – 13 частығлар паза 14-15 частығлар сыхханнар. 714 спортсмен, 24 медаль чыындызы ӱчӱн харбазып, 11 регион ӱчӱн турысхан. Иң хысха дистанция – 50 метр, иң узун – 1500 метр. Турнир двоеборье оңдайынаң ирткен. Андағ арға-мӧрійде спортсменнерге пір оңдайнаң, че аймах дистанцияларда чӱзерге киректелче. Полған на марығда олар саннар чыыпчалар. Иң кӧп сан чыып алған спортсмен чиңіс тутча. Ідӧк программада эстафеталар полғаннар.
Пылтырох кізі хайиин Антон Ачитаев тартхан. Хакас оолах арғыстарынаң хада ікі эстафетада Хакасияа алтын паза кӱмӱс медальлар ағылған. Пӱӱл чи кирек хайди парар? Саарбах 2012 чылда тӧреен, амды улуғларның аразында марығласчаттыр. Ол пос оңдайнаң 100 метр чӱзерге хынча. Ідӧк ӱзінҷі чылы баттерфляйда кӱзін сынапча. 18 хандыхта Антон пос оңдайнаң 200 метр чӱскен. Пастағы 100 метр ол «ыырҷыларның» алнында парған, че салтарында азах меетке тӧртінҷізi читкен. Саарбахнаң чоохтасханда, чӱзіснің ікінҷі чардығына аның кӱзі читпиндір. Антон Ачитаев – кӧні чоохтығ кізі. Хайди ол таныхтаан, пӱӱл ол эстафетаа таллағны ирт полбады. Арғыстары хай-хай табырах чӱсчелер нооза. Позы секцияа 5 частаң чӧрчеттір. Амды аның II разряд, спорт узына кандидат нормативін толдырыбызар пӧгін пар. 2025 чылда хакас спортсмен «Сибирь кубогының» прай чардыхтарында кӱзін сынаан. Сизінгенде, «хысха» суғда ағаа марығлазарға сидік арах. Антон 7-ҷі классты тоос салтыр, ол чахсы ӱгренче. Орғах айында саарбах сборларға парар. Аның тренері – Максим Бурмага.
Салтарлардаңар чоохтаза, Хакасиядағы спортсменнердең 14-15 частығларға оң полған. Олар эстафеталарда постарын турыстыра кӧзіткеннер. 17 хандыхта пос оңдайлығ чӱзісче эстафетада (4х100) саяногорсктағылар – Степан Дутов, Артём Тетюхин, Михаил Кожаев, Платон Клепов – кӱмӱc медаль холға киргеннер. Ағбандағылар, тізең, ӱзінҷі орынға сыхханнар. Командазар кіргеннер Семён Станчелов, Александр Коняхин, Артём Чеботарёв паза Александр Струговцев. 18 хандыхта наа чидіг. Матвей Парахин, Семён Станчелов, Денис Зуденко паза Александр Струговцев комплекс чӱзерінҷе эстафетада (4х100) кӱмӱc призерлар полыбысханнар. Алынҷа марығларда Артём Тетюхин не ӧріндірген. Тренер Елена Бобрикованың ӱгренҷізі, пастап брасс оңдайынаң (100 + 200) чӱзіп, ікінҷі орынға сыххан. Анаң комплекс чӱзерінде (200 + 400) олох чидіге читкен. Прайзы таланттығ Семён Станчеловтың медаль поларына ізенген. Чир-суғҷыбыс, 100 метрні баттерфляй оңдайынаң чӱзіп, ікінҷі орында парчатхан. Че 200 метрде ол 11-ҷізі ле полған. Семённың ӧӧн чиңістері алнында.
Ағбанның спорт школазының директоры Сергей Бережнойның таниинаң, 2026 чылның пастағы чардығы Хакасиядағы суғда чӱзеріне хомай нимес ирткен. Сергей Вадимович чоохтаан:
– Иң улуғ ӧрініс Диана Мирошниченконаң палғалыстығ. Ол пылтыр Россия первенствозында кӱмӱс медаль утхан. Амды Диана Россия чииттерінің піріктірілген командазынзар кірче паза школаа тӧрт чылға «олимп резерві» статус пирілген. Палалар чахсы марығласчалар. Часхызын Сибирь мариинаң Хакасияның командазы 9 медальлығ айланған. Пістің республика тӧреміл ікі улуғ марығ иртірче: «Сибирь кубогы» арға-мӧрійні паза «Чиңіc тудар тус читті» турнирні. Халғанҷы марығ Ағбанда тӧстелген, пӱӱл анда 951 кізі араласты. Ол рекорд полча. Марығлар календарьзар киріл парған. Пу чағында Сибирьнің чемпионадын паза первенствозын удурлап полбаспыс. Ікі чыл мының алнында марығ оңдайлары алыс парған. Хайди даа хоза разминка иртірҷең бассейн кирек. Тиксі Cибирьде андағ оңдайлар Томскта паза Иркутскта ла пар. Амғы туста школада 550 ӱгренҷі саналча. Пылтыр 70 паланы секцияа алғабыс, пӱӱл 40 кізіні сағыпчабыс. Искіріглер орғах айында поларлар. Россияның спортсменнері пазох тилекей арға-мӧрійлерінде араласчатханына ӧрінчебіс. Олар турнирлерде гимнніг паза флагтығ марығласчалар. Прайзы медальлар санирға хынадыр. Сынында спортшколаның ӧӧн пӧгіннерiнің пірcі ӧсчеткен тӧлнің хазиин пиктирі полча. Суғда чӱзері хаҷан даа кирексіністе полар.
Сом Ағбанның спорт школазыни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
