Хоныхтарға пӱӱн хабасханы – хазнаның таңдағы тилiзi
19.06.2026
Хабарлар
Хакасия пазы Валентин Коновалов чиит фермер, СВО араласчызы Альберт Пакачаковнаң
Хазна хабазии. Хакасия правительствозының туразында аал хониинаң айғасчатханнар аразында хазна хабазиин аларына марығның чиңiсчiлерiне республика пазы Валентин Коновалов сертификаттарны пайрамни читiрген
Валентин Коноваловтың таниинаң, пӱӱл пирiлген субсидияларның тиксi синi 160 миллион салковайға чағын. Ахча ӧӧнiнде малларны ӧскiрерiнең, иттi сығарарынаң палғалыстығ кӧстеглерге парар.
– Пу кибiрге кiр парған марығ. Ол республикада чыл сай иртiрiлче. Пирiлчеткен ахча пос киреен наа ла пастапчатханнарға даа, илееде чыл тоғын париғаннарға даа чахсы хабазығ полча. Марығның ӧӧн пӧгiнi – фермерлерге паза аал хонии сығарызынаң айғасчатхан кiзiлерге наа оборудование аларға, азахха турып аларға, пос киреен тилiдерге хабас пирерi. Пирiлген ахча кӧптелiп одырзын, прай сағынған сағыстарың толзын, – алғаан чыылысхан чонға Хакасия пазы.
«Агромотиватор» грантты алғаннарға алынҷа хайығ айландырылған. Пӱӱл аны iкi кiзi алған – Асхыс аймаанаң Альберт Пакачаков паза Шира аймаанаң Александр Попович.
Альберт Михайлович Асхыс аймаандағы Картой аалдаң. 11 классты Кызластағы школада тоосхан. Пӧзiк ӱгредiгнi аларға юриспруденция кӧстегҷе Хакас хазна университедiнзер кiрген. Анда iкi чыл ӱгренген, академическай отпуск алып, армияа парыбысхан. Срочнай службаны Челябинск облазында танк войсколарында ирткен, 2021 чылда контрактча служба иртерiнеңер чӧптезiг идiбiскен. 2022 чылда ӧнетiн чаа операциязы пасталыбысхан. Альберт Пакачаков ол иртчеткен чирлерде пастағыох кӱннердең сығара полған, аның ӱчӱн ағаа Россия президентi Владимир Путиннiң алғызы читiрiлген.
Чиит оолға Чернигов облазында, Луганск паза Донецк Чон республикаларында поларға килiскен. Чарым чыл пазынаң ол саназыбысхан. Тӧреен чирiнзер айланып, ӱгредиин узаратхан. Ирткен чылда пабазы СВО-да чат халған, аннаң сығара Альберт Михайлович аалынзар айланған. Аның iҷезi кинек, ағаа малларны кӧрерге, туңмаларын ӧскiрерге полызарға киректелген. Сӧбiреде олар пизӧлеңнер – тӧрт оол паза пiр хыс. Альберт – улии, ам ол туңмаларына ӱгредiг аларға полысча. Пiр оол туңмазы ХГУ-да хакас кафедразында ӱгренче, хыс туңмазы – Ағбанда колледжте. Кiчiглерi школада ӱгренчелер.
Мындағ хабазығ парына паза аны алғанына чиит оол ӧрiнче. Ол пирiлген ахчаа итке ӧскірчеткен герефорд породалығ малларны, тракторны, пресс-подборщиктi, от сапчаң тирiгнi паза дисктiг порананы аларға пӧгiнче.
Грант аларына марығның кирексiнiстерi аразында садызарға пӧгiнчеткен малны тударға чир читкiҷе полары полған. Альберт Михайлович пу сурығны аал чӧбiнде пӧгерге полыс пиргеннер тiп таныхтапча. Ағаа ӱр тусха арендаа чир пирiлген. Сыйыхтаста А.М.Пакачаков прайзына алғыс сӧстерiн читiрген.
Сертификаттар читiрiлген соонаң сӧс Хакасияның аал хонии паза ас-тамах министрi Сергей Труфановха пирiлген. Ол залда айғасчатхан киреене хынчатхан, аны тилiдерге кӱстенчеткен улус чыылыс парған, прайзы олар пасхазына кӧзiдiм полчалар тiп таныхтаан. Ол адааннарның санында Аркадий Бондаренко полған. Фермер, ХГУ-наң чӧптезiг тимнеп, студенттерге практика иртчең орыннар пирче. Сергей Иванович пасхазына чииттернең тоғыс апарарына iдӧк хайығ айландырарға чӧптеен.
Сом Илона Каковани
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
