Хазнаның ӧӧн ӱлӱкӱнi
10.06.2026
Хабарлар
Ағбан городта 11 – 13 хандыхта аймах кӧглер чайылар. Iди Хакасияның ӧӧн городы Россия кӱнiн алғым таныхтир.
Ағбандағы библиотека тоғынҷылары «Россия полза – мин дее поларбын» темаҷа илееде мероприятие тимнеп салғаннар. Кибiрли, 11 хандыхта 11.00 часта «Победа» культура кiнi алнында «Пiс Россиядаңар хоостапчабыс» чӧрiм полар. Анда олғаннар асфальтта хазнадаңар чарых хоостарын чайирлар.
Олох кӱнде 18.00 час иирде Ағбандағы Чииттер ӧргезiнiң ачығында «Чайғы-2026» чииттер дискотеказы полар. Программазар чайаачы кӧзiдiглер, «Россияның триколоры» паза «Пiс Россия» чӧрiмнер, кӧглiг лото, чоннарның пiр теелбегi паза диджейлернiң ойын-ӱтертiстерi кiрчелер.
12 хандыхта 10.00 часта Ф.Е.Пронскихтiң адынаң Ағбандағы хоос галереязында «Алтын кисточка» кӧзiдiг-марығның салтары идiлер. Пӱӱл пу марығ 25-ҷi хати иртче паза Ағбан городтың пайрамнығ 95 чылына чарыдылча. Анда городтың искусство паза хоос школаларының, студияларның 100 ӱгренҷiзi араласхан. Олар чайаачы тоғыстарында Ағбанның иң хынған пулуңнарын хоостааннар.
Олох туста Хызыл Ағбандағы «Баранка» паркта «Сӧбiре ФИШказы» палыхтығ ас-тамах фестивальы полар. Анда сӧбiрелер палыхтығ ӱгренi пызырарлар, палых идiн отта сiстирлер паза палыхтаңох татхыннығ пирогтар идерлер. Город чуртағҷыларына паза аалҷыларына чапсых ас-тамахты амзап кӧрерге оңдай полар. Пу фестивальда олғаннарға чапсых ойыннар иртер. Чииттер мастер-класстарда аралазарлар. Iдӧк прай сӧбiренең сомға суурынҷаң орыннар полар.
Олох кӱнде, 12 хандыхта, 14.00 – 22.00 частарда Ағбандағы Культура паза тынағ паркында Россия кӱнiнiң ӧӧн пайрамы таныхталар. Сценадаң чылығ алғыстастар читiрiлер паза городтың иң артых ӧмелерi сарнирлар паза теелбектенерлер. Чайаачы иир «Радио Искатель» кӧг фестивальынаң тоозылар.
Спортха хынчатханнарға ӧнетiн мероприятиелер тимде: Чиңiс паркында баскетбол паза волейбол ойнирлар, стол теннизiнҷе турнир полар, ниик атлетикаҷа марығлар иртер.
13 хандыхта ӱлӱкӱн аннаң андар узарадылар. 12.00 часта «Орлёнок» паркта «Сӧбiре компазы» проектче «Россияның хороводы» полар. Iдӧк олғаннарға аймах ойыннар, марығлар иртер.
Сом «Хакас чирі» газетаның архивінең
Автор :
Тимнеен Татьяна Тютюбеева
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
