Наа министр
10.06.2026
Хабарлар
Галина Адыгаева
Тоғазығ. Хакасия пазы Валентин Коновалов республиканың национальнай паза территориальнай политика министрінің тоғызын толдырар Галина Адыгаеванаң ӱлгӱ туразында тоғасхан
Хакасияның национальнай паза территориальнай политика министрі Лев Сафьянов тоғыстаң пос кӧңнінең парыбысханда, аның орнына кем не килерін чидікпин сағып сыххабыс. Хайзыбыс таа чапсых хабарны иң пурун истіп-піліп аларға сағынча.
Аннаңар хабарҷыларны ӱлгӱ туразынзар наа министрнең танызарға хығырғанда, сах андох андар маңзыраабыс. Хакасия пазы Валентин Коновалов наа министрні ағаа хайдағ тоғыс толдырарға килізерінең хысхаҷахти таныстырған. Республиканың национальнай паза территориальнай политика министерствозы сыбыра прайзының хайиинда полчатханы таныхталған соонда, правительство устааны хоостыра Хакасияда чуртапчатхан чӱс артиинаң аймах тілліг паза киртіністіг чоннар пір сӧбіредегілер чіли ынағ, чӧптіг тудынчатханы искірілген. Ол кибір чылларнаң тыыдыл турған. Амды Галина Владимировнаа аны узарадарға килізер.
Тоғазығ тузында Валентин Олегович наа министрні тоғыс тузында, Хакасиядағы аймах национальнай пірігістердең пасха, республикадағы парчан партияларнаң, министерство-ведомстволарнаң, халых пірiгiстерiнең, орыннардағы муниципальнай пӱдістернең хада-пірге тоғынарға килізерін сизіндірген. Ынағ, пір чӧптіг тудынғаны хаҷан даа чахсы салтарларға ағылча.
– Пӧгіннер, ӧӧн кӧстеглер пілдістіг. Алнында улуғ тоғыс, Сірер ағаа сыданарзар. Сірернің пілістерің тоғысха нандырығлығ хайғаны киректелчеткен салтарларға чидерге полызар, – таныхтаан Валентин Коновалов.
Галина Адыгаева позының чооғында Валентин Коноваловтың паза республика правительствозының киртінізіне турыстығ тоғынарына кӱзін, пілізін салардаңар ізендірген, улуғ алғызын читірген.
Амды Галина Владимировна Адыгаеваның чуртас чолынаңар хысхаҷахти танығлар: ол 1968 чылда Асхыс аймаандағы Сафрон аалда тӧреен; ортымах школа соонаң Хызылчардағы аал хонии институдының экономика пӧлиин тоосхан; 20 чыл артиинаң финанс-экономика учреждениелерінде істенген; анаң санҷы, улуғ санҷы полған; республиканың налог службазында 17 чыл тоғынған; Таштып аймаандағы ӱгредіг пӧлиинең пис чыл устаан; Хакас политехническай колледжтің Ағбан пилтіріндегі пӧлиинiң устағҷызы полған.
2023 чылда Хакас Республиканың Аарластығ пічиинең таныхтатхан.
Сом r-19.ru сайттаң
Автор :
Анатолий Султреков
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
