Имнег тоғынҷылары хазых чуртас ӱчӱн
10.06.2026
Хабарлар
Асхыстағы аймахтар аразындағы имнег туразының ӧмезі
Спартакиада. Ағбандағы «Локомотив» стадионда тиксi республикадағы имнег учреждениелерiнiң аразында, Имнег тоғынҷызы кӱнiне чарыдып, спорт марығлары ирттілер. 23-ҷi спартакиадада республиканың прай даа аймах-городтарының имнег учреждениелерi араласханнар
Аны Россиядағы хазых хайраллир киректегі тоғынҷылар профсоюзының республикадағы пӧлиинің кӱстенiзiнең иртiрiп пастааннар. Аннаңар спартакиада пасталар алнында аның кнезi Татьяна Рыбаченконаң чоохтазып алғабыс:
– Пiстiң профсоюз спартакиада иртiрерiнҷе чыл ибiре улуғ тоғыс апарча. Чыл сай араласчылар саны хозылча, пӱӱл спорт марығларында тиксi 25 ӧме араласча, ирткен чылда прай 22 ӧме полған. Чылдаң чылға спорт марығларының кӧрiмнерiн iдӧк алғытчабыc. Пӱӱл программа хоостыра прай 10 спорт кӧрiмi кӧріл парған, ирткен чылда 9 номинация полған. Ӧӧнiнде ниик атлетика паза ойын марығларын иртiрчебiс: баскетбол, эстафета, волейбол, стол теннизi, шахмат, узунға сегiрерi, дартс, скакалка, минифутбол паза канат тартары. Полған на команда марығларда аралазарына уғаа нандырығлығ хайча, олар чыл ибiре спартакиадаа тимненчелер.
Спартакиада имнег учреждениелерiнiң пайрамнығ чӧрізiнең пасталған. Полған на ӧменiң марығда араласчаң тӧӧй кип-азаа полған. Аннаңар командаларның парчатханын кӧрерге уламох ӧкер полған. Имнег учреждениезiнiң ады паза оларның тании хоосталған плакатты парчатхан ӧменiң иң пастағы кiзiзi апарған. Имнег тоғынҷылары, спорт марығларында сыбыра аралазып, саңай спортсменнер полыбысханнар. Спартакиада пайрамни азылған соонаң командалар стройнаң турыбысханнар. Трибунада «ағырчатхан» кӧрiгҷiлер, прайзы турып, стадионға толдыра тараан Россияның, Хакасияның паза имҷiлернің гимннерiн искеннер. Аның соонаң Хакасияның хазых хайраллаҷаң министрi Максим Максимов чоох тутхан.
– Пӱӱл 23 чыл, хайди Имнег тоғынҷызы кӱнi алнында пiс ынағ, пiр кӧстегҷе тудынчатхан паза спортнаң айғасчатхан иң чахсы имҷілер ӧмезiн табар ӱчӱн стадионда чыылысчабыс. Пу уғаа чахсы кибiр тiп санапчам. Пiлчем, кӧбiзi марығларға азынада паза нандырығлығ тимненче. Спартакиада полызиинаң пациенттерге кӧзiдiм полчабыс: спорт паза ӧткiн тудынчатханы – хазыхты хайраллап аларының ӧӧнi. Уламох ӧрiндiрче чыл сай араласчатхан ӧмелернiң саны хозылчатханы. Хазых марығлары кiзiнiң аралазар кӧңнін кӧдiрче паза чиңiсчi полыбызарға кӧӧктiрче. Мин алынҷа хазых хайраллир киректегі тоғынҷыларның республикадағы профсоюзының кнезiне паза республиканың спорт министерствозына марығларны чахсы тимнебiскен ӱчӱн алғызым читiрерге сағынчам, – таныхтаан Хакасияның хазых хайраллаҷаң министрi Максим Максимов.
Мындағ чапсых паза танығлығ мероприятие кибiрге кiр парған. Имнег тоғынҷылары, спортсменнер ле чiли, аймах спорт кӧрiмнерiнең айғасчалар, хай пiреелерi профессионалға даа ӧс парыбызарға айабас, неке. Че ӧӧнi – мындағ марығлар тиксi республиканың имнег тоғынҷыларын пiр улуғ паза ынағ ӧмее пiрiктiрчеткені. Спартакиадада имнег тоғынҷылары танысчалар, тусты тузалығ иртiрчелер. Ағаа хоза, олар сыбыра спортзалда алай ибде спортнаң айғасчалар, марығлар алнында уламох тың тимненчелер.
Асхыстағы аймахтар аразындағы имнег туразының ӧӧн имҷiзi Людмила Кичеева марығда аралазарға килгеннеңер хысхаҷахти чоохтаан:
– Ирткен чылда пiс сыйыхтығ ӱзiнҷi орынға турысхабыс, аннаңар пӱӱл сыйыхтығ орында халарына iзенчебiс паза марығласчаң кӧңнiлiг килгебiс. Пiстiң ӧмеде пӱӱл 35 араласчы, прай спорт кӧрiмнерiнде кӱзібіс сынирбыс. Пiстiң имнег тоғынҷылары уғаа ӧткiннер, спартакиадаа чыл сай килчелер. Чиңiсчi полыбызары ӧӧнi нимес, ӧӧнi – аралазары паза чон аразында полары.
Чыл сай марығларда араласчыларның саны хозылча, ирткен чылда 800-че кізі килген полза, пӱӱл оларның саны пiр муңнаң ас парған. «Локомотив» стадионда кiзi тығырама полған, трибуна ӱстӱнең кӧрчетсе, чон хымысха уйазында хайынчатханға тӧӧй пiлдiрген. Марығ араласчылары ӱчӱн «ағырарға» килген чон iдӧк илееде полған. Тасхар уғаа iзiг кӱн турчатхан, араласчылар, тiзең, анзына хайбин, прай кӱстерiн салып марығласханнар. Имнег тоғынҷылары, республика чуртағҷыларына турыстығ кӧзiдiм полар ӱчӱн, кӧбiзi хазых чуртас апарып, спортнаң айғасчалар. Пiс чахсы пiлчебiс, имҷiлернiң тоғызы уғаа маң чох, че iди дее полза, олар, пос хазиина тус таап, хайығ саларға кирек тiп таныхтапчалар. Iзiгде чӧрiп алған соонаң, шахматча марығ иртчеткен сӧрӧн чирзер кiргебiс. Анда iдӧк хатығ марығ парчатхан.
– Мин Таштыптағы аймахтар аразындағы имнег туразының ӧмезiнiң араласчызы полчам. Пiс спартакиадада чыл сай прай спорт кӧрiмнерiнде кӱзібіс сынапчабыс. Пӱӱл пiстiң ӧмеде 24 кізі марығласча. Мин сыбыра шахмат мариинда араласчам. Амғы чииттер шахмат ойнабинчалар, ӧӧнiнде улуғлар ла ойнапчалар. Пiстiң имнег туразының ӧмезi спартакиадада хынып араласча, мында, коллегаларнаң тоғазып, чоохтазып алчазың. Минiң кӧрiзiмнең, чиңiсчi полыбызары ӧӧнi нимес, чахсы тус иртiрер пӧгiн турғызарға кирек, – теен табырах имнег полызиинда фельдшер полып iстенчеткен Юрий Бутанаев.
Прай марығлар ирт парған соонаң жюридегiлер тиксi салтарларын искiргеннер. Пӱӱл спартакиада чиңiсчiзі Ағбандағы табырах имнег полызии службазының тоғынҷылары полыбысханнар. Олар, пастағы орынға турызып, ӧӧн сыйыхты алғаннар. Iкiнҷi орынға Ағбандағы аймахтар аразындағы имнег туразы турысхан. Ӱзiнҷi орынны Асхыстағы имнег туразы холға кирген.
Хакасияда имнег тоғынҷылары аразында мындағ спорт марығлары ӧӧнiнде оларны спортнаң айғазарға кӧнiктiрер ӱчӱн иртiрiлче. Олар, хазых чуртас апарып, спортнаң айғасса, пасхазына кӧзiдiм поларлар. Соонаң республиканың пасха даа чуртағҷылары мындағ чахсы кирекке тартыларлар. Андағ оңдайнаң чир-суғҷыларыбыс спортнаң айғазарға кӧнiгерлер.
Сом Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
