Пик хуйахтығларны чеестееннер
05.06.2026
Хабарлар
Киндірліг пилтіріндегі «Ала парыс» хоккей ӧмезі
Спорт. Хакасияда хоккеисттер 2025/2026 чылларның cезонын чапханнар
Меспектіг хоккейҷе Хакасияның федерациязы 29 сілкерде спортсменнерні сезонның халғанҷы мероприятиезіне чыған. Ол Олимп резерві училищезінде (техникумында) ирткен. Cпорт пайрамының ӧӧн пӧгіні – артыхтарын чеестирі паза сыйыхтиры. Анда хоккеисттер ле нимес, iдӧк паба-іҷелер, тренерлер, ветераннар, кӧрігҷілер араласханнар.
Мероприятиені республиканың спорт министрі Пётр Макарчук асхан. Хайди Пётр Анатольевич чооғында таныхтаан, меспектіг хоккей – Хакасия чуртағҷыларының иң хынчатхан спорт кӧрімі. Анзын кӧрігҷілер санынаң даа сизінерге чарир. Кізілер, соохты соох тібин, командалар ӱчӱн «ағырарға» тимделер. Хоккеисттернің полған на чидии – республика спортының таңдағызына хозым. Олар пасхазына кӧзідім полчалар. Ідӧк чылығ сӧстерге хозылған федерацияның президенті Юрий Шпигальских. Юрий Александрович тренерлерге тӱзімніг тоғыстары ӱчӱн, паба-iҷелерге хабазығ ӱчӱн улуғ алғызын читірген.
Иң пурун сыйыхтааннар Хакасия чемпионадының чиңіcчілерін. Арға-мӧрійде алты хоккей ӧмезі кӱc cынаан. Хола призер полыбысхан «Полярник» команда (Ағбан). Ӧме тренер Виталий Ридингернің устаанынаң ойнапча. Кӱмӱс медальны холға кирген «ДЮСШ» (Ағбан), тренер Олег Крутиков. Чиңіc тутхан «Штурм» (Ағбан). Оларнаң хада тоғынча тренер Игорь Лопухин.
Анаң сезонның иң артых хоккеисттерін адааннар. Пӱӱл артыхтарның артығына сыхханнар хаалха хадағҷызы Владимир Домолего («Штурм», Ағбан), ойынҷылар Никита Швецов («Полярник», Ағбан), Виталий Шнайдер («Штурм», Ағбан) паза Макар Егерь («ДЮСШ», Ағбан).
Чиит хоккеисттер – Хакасияның таңдағызы. Республиканың первенстволары 2011 чылда паза 2014-2015 чылларда тӧрееннернің аразында ирткенннер. Пастағы ӧмеде прайзын «Саяны-Подсинее» команда (Кӧк хайа аал) ас парыбысхан. Олғаннар Евгений Тудвасовтың холында устарын тилітчелер. «Химик 2012» ӧме (Ағбан пилтірі, тренер Андрей Ефимов) кӱмӱc призер полыбысхан. Оолағастарға чиңіске кӧмес ле читпиндір. «Штурм» (Ағбан, тренер Игорь Лопухин) – хола призер. Ікінҷі ӧмеде пӱӱл оң полған «Саяны-Подсинее 2014» командаа (тренер Евгений Тудвасов), оларның соонҷа парған «Метеор», тренер Андрей Галеев, ӱзінҷі орынға сыххан «Саяны-Белый Яр», тренер Владислав Менжуренко.
Федерацияда ветераннар улуғ хайығда. Оларға иртчеткен марығларда 55 частығдаң аралазарға чарир. Пустығ чазы спортсменнерге кӱс хосча нооза. Хазыр харбазығда чемпион атха турысхан «Саяны 80», оларны марыға тимнепче тренер Виталий Лазицкий. Виталий Александрович «Саяны» команданың пастағы тренері полча. Пӱӱл кӱскӱзін ол 82 чазын таныхтир. Кӱмӱс медальны холға киргеннер аалҷылар. Команда адалча «Енисейская Сибирь» (Хызылчар), аның тренері – Андрей Орлов. Ағбандағы «Космостың» хола медаль, тренер Владимир Пузяков.
Хакасияның ӧӧн командазы «Саяны» полча. Мероприятие тузында сезонның иң артых ойынҷызын адааннар. Аны «ағырчатхан» улус ӱн пиріп таапча. Кӧрігҷілернің кӧңніне кірерге оой нимес. Кізілер, полған на ойынға чӧріп, хоккеисттернің устарын паалапчалар. Оларның чӱрее-паарын пазох хаалха хадағҷызы Яков Гах хайылдырған. Анзы тиктең нимес. Спортсмен «Саяны» ӱчӱн прай кӧңнін cалып турысхан. Владислав Атапинге паза Тимофей Ващукка «Россияның спорт узы» аарластығ атты киречілепчеткен танығлар читірілгеннер. Ващук «Саяны-2» ӧмеде ойнапча.
Хакасиядағы аалларда меспектіг хоккейҷе командалар парох. Олар фестивальда кӱстерін сынапчалар. Иреннернің аразында чиңіс тутхан «Тасхыл» ӧме (Асхыс), тренер Денис Кулумаев. Киндірліг пилтіріндегі «Ала парыс» кӱмӱс призер полыбысхан. Команданың тренері – Игорь Чебодаев. Хола медальны утхан «Аршаннар» ӧме, тренер Егор Сагалаков.
Олған ӧмелерінiң аразында оң полған «Саяны-Подсинее» ӧмее, тренер Евгений Тудвасов. Евгений Николаевич чемпионнарны ла тимнепче. Ікінҷі орынға сыххан «Олимп» (Шира). Пу команданың тренері Василий Талановты алынҷа таныхтирға кирек. Василий Борисович – СВО ветераны, амғы туста Шира аймаа пазының орынҷызы полып істенче, че тыс пілбес кізі меспектіг хоккейдеңер ундубинча. Ӱзінҷізі полыбысхан «Саяны-Асхыс» команда, тренер Вячеслав Симонов.
2025/2026 чылларның cезоны меспектіг хоккейге хынчатхан улусха кӧп ӧрініс ағылған. Командалар ойын тоозылғанҷа чиңіс ӱчӱн харбасханнар, кӧрігҷілер ӱн чідіргенҷе оларның ӱчӱн «ағырғаннар». Килер сезон хайдағ поларын пустығ чазы кӧзідер.
Сом авторни
Автор :
Дарья Слабко
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
