«ПМЭФ-2026» форумда Хакасияның Свердловск облазынаң социально-экономическай кӧстегҷе хада-пірге тоғынардаңар чӧптезігде хол салылған.

Ӏкі регионның хада тилир чахсы оңдайлар пар. Мында алынҷа туризм кӧстеен таныхтирға чарир. Пӱӱл хосхарда Хакасия Екатеринбургта ирткен «ЧАЙҒЫ-2026» чоннар аразындағы турист кӧзідігде, регион-партнер полып, араласхан. Анда араласханы республикабысха уғаа тузалығ ‒ кӧзідіге таңдағы туристтердең пасха турбизнестің улуғ опыттығ специалисттері килгеннер,  оларнаң танысханы чахсы оңдайлар пирче.

Сілкер айында, «ПМЭФ-2026» форум алнында, Хакасиязар Свердловск облазындағы туроператорларның кізілері кил парғаннар. Пу тоғазығ оларны хайхастығ чирібісче наа, хынығ чорыхтарны тӧстирге кӧӧктірер тіп ізеніс пар, андада, тізең,  Урал чуртағҷылары Хакасияа хайығларын айландырарҷыхтар.  Уламох 2025 чылның часхызынаң сығара Ағбаннаң Екатеринбургсар самолёт учух чӧрче.

Ӏдӧк пістің регионнарыбыс ӱгредіг паза наука кӧстеглерҷе хада-пірге тоғынчалар, библиотека киреенде мероприятиелерні хада иртірчелер. 2025 чылның орғах айында Хакасия Свердловск облазының культура министерствозы полызиинаң иртірілген «Книга народов Сибири на Уральской земле» регионнар аразындағы социокультурнай чӧрімде араласхан.

Хакасия пазы ПМЭФ-та ікі регион аразында иділген чӧптезіг туризмде, культурада, экономика тилізінде паза пасха даа кӧстеглерде хада тоғынар оңдайларны алғыдар тіп таныхтаан.