Ӱзӱрігде ‒ чылығ пирҷең тусха тимненіс
04.06.2026
Хабарлар
Россия президентінің Сибирьдегі федеральнай округтағы полномочиеліг кізізі Анатолий Серышев килер чылығ пирҷең тусха тимненіске чарыдылған округтағы чыылығны иртірген.
Хазнабыстың прай регионнарында чылығ пирҷең тус тузында пасталған паза, тиксі алза, кöрілілген оңдайҷа ирткен. ТЭЦ-тарда паза ГРЭС-тарда хара тастың чыындызы кöрілген синнең 6 хати кöп полған. Чурт-коммунальнай хоных объекттерінің кöбізінде ідöк топливоның кирек сині тудылған.
Анатолий Серышев чылығ пирҷең сетьтерде, алындағы чылығ пирҷең туснаң тиңнестірзе, полған саайлар саны хызырылған тіп таныхтаан. Ол халғанҷы чылларда чылығ пирҷең сетьтерні нааҷылирынҷа тӱптестіріп апарылған тоғыстың салтары. Округтың прай регионнарында ведомстволар аразындағы хада-пірге тоғыс иптелген, анзын президенттің полномочиеліг кізізі позы хайығда тутхан. Че сағам сайбағлар поларынаң саңай озарға киліспинче ‒ Иркутск паза Омск облазында, Кемеров, Новосибирск паза Томск городтарда чылығны пирері нинҷе-де хати хызырылған.
Суғ паза чылығ пирҷең сетьтердегі саайлар ӧскені таныхталған. Иркутск облазындағы саайлар иң кӧп хайығ тартханнар. Улуғ коммунальнай саай Хакасияның улиинаң ікінҷі орындағы городта ‒ Харатаста - полған. Пу киректерні чох идерінде президенттің полномочиеліг кізізіне позына аралазарға паза тоғыстар апарылчатханын полпредтің аппарадына, сыныхтағлығ органнарға хайығда тударға киліскен.
Анатолий Серышев коммунальнай системаны нормативтерге килістіре идерге кирек полчатханына Иркутск облазының губернаторының хайиин айландырған. Прай тоғыстарны чайғызына толдырыбызарға кирек, кӱскӱ-хысхы пасталыбысса, инфраструктура тохтағ чох тоғынзын тіп таныхтаан ол.
«Сетьтернің айғазарын иң соона салдырарға чарабас ‒ аның тоғызынаң кізілернің чуртастары палғалыстығ, мында пір дее хоза чоох чоғыл. Піс прайзыбыс хада ла инфраструктураның тоғызын чахсыландыр поларбыс, алныбыста турчатхан пӧгіннерні толдыр поларбыс», ‒ чоохтанған полномочиеліг кізі.
Анатолий Серышев 2026-2027 чылдағы чылығ пирҷең тусха тимненіс округтың прай регионнарында кӧрілген синҷе апарылча тіп таныхтаан. Планнар муниципальнай пӱдістернің 91 процентінде чарадыл парғаннар. Иркутск паза Кемеров областьтарында тоғысты айныдарға кирек. 480 котельнай, чылығ пирҷең сетьтернің 539 километрі паза суғ пирҷең сетьтернің 626 километрі нааҷылалар тіп пӧгінілче.
Президенттің полномочиеліг кізізінің таниинаң, тоғыстарның амғы туста апарылчатхан сині читкіҷе нимес. Кӧзідімге, суғ пирҷең сетьтер нааҷылалчатханының кӧзідии 0,8 %-ке тиңнелче, че кирексіністер хоостыра ол 5 % поларға кирек. Анатолий Серышев регионнар ӱлгӱлерін инфраструктураны нааҷылир планнарны хатап сыныхтирға, сетьтернің иргілен парғанын паза сайбағлар полчатханын санға алып, кирек тӱзедіглерні кирерге чахаан. Ростехнадзорның танығларына улуғ хайығ айландырарға, читпестерні чох идерге кирек тіп хосхан ол.
Россияның пӱдіріг паза чурт-коммунальнай хоных министрінің орынҷызы Алексей Ересько чыылығ араласчыларының хайиин сетьтерде сайбағларны чох идеріне чарыдылған тренировкаларны тӧреміл иртір турарға кирек полчатханына айландырған. Андағ мероприятиелер муниципалитеттерге саайлығ киректернің салтарларын чох идерінҷе тоғыстың читпестерін ілезіне сығарарға полысча тіп таныхтаан ол.
«Амғы туста хысхаа тимненіс ӧткін апарылып пастапча. Сибирьдегі климатта пістің кӧп ле тус чоғыл. Аннаңар, алындағы опытты санға алып, пар читпестерні, сидіксіністерні тӱзедерге кирек. Олар отрасльның тоғызына харығ полбасха киректер. Регион ӱлгӱлерінең, орындағы пос устаныс органнарынаң паза чылығ пирчеткен организацияларнаң хада-пірге тоғынғаны ла пу улуғ сурығны пӧгерге полызар», ‒ салтарлар иткен Анатолий Серышев.
Чыылығда Россияның ӧӧн прокурорының орынҷызы Сергей Зайцев, Сибирьдегі федеральнай округтың прокурорлары, регионнар пастары паза оларның орынҷылары, Ростехнадзорның Сибирьдегі паза Кимдегі устаныстарының устағҷылары, Сибирьдегі улуғ энергетическай компанияларның кізілері араласханнар.
Сомнар sfo.gov.ru сайтта
Автор :
Тимнеен Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
