Школа тоосчатханнар пірге хазна сыныхтағларын тутчалар
03.06.2026
Хабарлар
11 класстағы ӱгренҷілер
ЕГЭ-2026. Пу кӱннерде школа тоосчатхан ӱгренҷiлернiң хазна сыныхтағлары иртче. Пӱӱл ЕГЭ-ны 11 класстағы 2500 азыра ӱгренҷi тутча, ОГЭ-ны – 9 класстағы читi муң азыра ӱгренҷi
Пiр хандыхта тархын, литература паза химия предметтерiн таллап алған 11 класстағы ӱгренҷiлер пiлiстерiн сыныхтааннар. Ағбанда пу предметтерҷе ЕГЭ тӧрт ӱгредiг организациязында ирткен. Ол городтың 12, 20, 24 паза 25№№ школаларында. Республиканың муниципалитеттерiнде сыныхтағ тутчаң орыннар азылғаннарох. Итсе-де, Л.А.Третьякованың адынаң Таштыптағы 1№ паза Н.П.Князевтiң адынаң Пиидегi ортымах школаларда тыхтағ тоғыстары парчатханда, андағы выпускниктер ЕГЭ-ны Cаяногорск, Абаза городтардағы паза Асхыс аймаандағы школаларда тутханнар.
Ағбандағы 20№ школада тархын паза литература предметтерiн таллап алған 117 ӱгренҷi сыныхтағ ирткен. Ӱгренҷiлер Ағбанның аймах школаларынаң чыылысханнар. Iдӧк школа тоосчатханнарның аразында ортын профессиональнай ӱгредiг организацияларының студенттерi полғаннар. Оларға пу предметтер вузсар кiрерге киректелче.
– Мин сағынчам, олғаннар чахсы пiлiс кӧзiт пирерлер. Тархынны паза литератураны олар постары таллап алғаннар нооза. Пу предметтер хоостыра олар таңдағы профессияны таллирға пӧгінчелер. Аннаңар олар матап тимненгеннер. Литература экзаменінде олғаннарға орфография сӧстiгiнең тузаланарға чарадылча. Оларны пiс прай тимнеп салғабыс. Имҷiлер чыл сай дежурство апарчалар. Пӱӱл олар iдӧк олғаннарның хазиин хайығда тутчалар, – чоохтапча 20№ школадағы сыныхтағ ирткен орынның устағҷызы Ирина Соловьева.
Школада ЕГЭ-ға сигiс аудитория тимнелген. Полғанында ла бланктар сығарҷаң оборудование паза видеокамералар турғызылғаннар. Аудиториязар иртер алнында олғаннар кибiрли тимiр сыныхтаҷаң детекторҷа ирткеннер, телефон, смарт-частарын артысханнар. Оларға обложка чох паспорт, хара гелевай ручка, суғ алып аларға чарадылған. Iдӧк олғаннарның холларында шоколадтар кӧрiнгеннер. Сыныхтағ ӱс час артиинаң иртче нооза, пу тус аразына олғаннарға хапланып аларға кирек ле полча.
Хайди ӱстӱнде таныхталған, школа тоосчатханнарнаң хада ЕГЭ-ны iдӧк ортын профессиональнай ӱгредiг организацияларының чииттерi тутханнар. Виктория Торокова Олимп резерві училищезiнде (техникумда) халғанҷы курста ӱгренче. Пӱӱл диплом алар. Ол ас-тамах тимнеҷең усха ӱгренген. Чиит хыс хаҷан даа хоостирға хынҷаң. Аннаңар пӱӱл сағынған сағызын толдырарға пӧгiнче. Санкт-Петербургтағы хоос-анимация университедiнзер кiрiп, ӱгредиин узарадарға сағынча. Андар кiрер ӱчӱн ағаа литератураҷа ЕГЭ тудыбызарға кирек.
– Тоғыс класс соонаң хазна сыныхтағларын хомай нимес тудыбысхам, че пасха городсар ӱгренерге парарға чочыныстығ пiлдiрген, аннаңар техникумзар кiргем. Чиис тимнирге мин iдӧк хынҷаңмын. Амды ӧӧн сағызымны толдырарға пӧгiнчем. Андар кiрер ӱчӱн ЕГЭ-ға пос алынҷа тимненгем, ӧнетiн курстарға чӧргем, произведениелернi кӧп хығырғам. Cыныхтағны чахсы ирт тудыбызарына iзенчем, – чоохтапча Виктория.
Хайди искiрче Хакасияның ӱгредiг паза наука министерствозы, пӱӱл тиксi республикада пу предметтерҷе сыныхтағны 900 азыра ӱгренҷi тутхан: химияны 414 ӱгренҷi таллап алған, тархынны – 407, литератураны – 96. Оларға сыныхтағ тутчаң 12 орын тимнелген.
ЕГЭ-ның ӧӧн чардығы соонаң оларға хоза резерв кӱннерi кӧрiл парған. Пу туста балларнаң чараспинчатхан оол-хыстарға сыныхтағны хатап тудыбызарға чарир. Пу кӱннерде 11 класс тоосчатханнар iдӧк ӧӧн предметтерҷе ЕГЭ тударлар – ол математика паза орыс тiлi. Аны 2500 азыра ӱгренҷi иртер.
Тиксi алза, пӱӱл хазнада 700 муң азыра ӱгренҷi ЕГЭ тудар, ол санда школаны пӱӱл тоосчатхан 600 муң азыра оол-хыс. Школалардаң пасха, чуртас оңдайлары хоостыра олғаннар iдӧк сыныхтағны имнег тураларында паза ибде тутчалар. ЕГЭ-ны иртiрерiне 300 муң азыра специалист тартылған паза сыныхтағ иртчең алты муң азыра орын тимнелген.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
