Улуғ чидiглiг чайаачы тус
03.06.2026
Хабарлар
«Айас» теелбек студиязының хызыҷахтары сiлiг теелбек салчалар
Культура. С.П.Кадышевтiң адынаң чон чайаачызының национальнай кiнi «Пiс кiзiлерге часка сыйлапчабыс» концертнең 87-ҷi чайаачы сезонын чапты
Чайаачы сезонның халғанҷы концертi полызығлығ оңдайнаң ирткен. Билет садып, чыылған ахча Дагестан Республиканың культура учреждениелерiне полызарына «Россияның Хызыл Кiрезi» тиксi Россияның халых организациязынзар ызылар. Ағаа хоза, улуғ залның фойезiнде ахча чығҷаң ӧнетiн харачах турғызылған. Концертке килген аалҷылар андар пос кӧңнiнең нинҷе хынғанни ахча салғаннар.
87-ҷi чайаачы сезон пасталғанда, «Айас» олған теелбек студиязы Хыдатсар «Золотая площадь» чоннар аразындағы фестивальда аралазарға чӧрген. Фестиваль Россияны паза Хыдатты культура пастыра пик ынағластырар пӧгiннең иртiрiлген. Анда пiстiң хазнадаң iкi муңҷа чайаачы араласхан. «Чылтызахтарыбыс», хакас чонның культуразын сiлiг кӧзiдiп, андартын тӧрт пӧзiк сыйых ағылғаннар, iди Чир-суубысты тилекейге сабға сығарғаннар. «Айас» теелбек студиязынаң Хакасия культуразының саблығ тоғынҷызы Фаина Киштеева устапча.
Пылтыр Хазан городта «Россия – Восток» чоннар аразындағы национальнай культуралар фестивальы ирткен. Хакасиядаң парған «Кӱн чахайағы» ансамбль позын турыстығ кӧзiт пирген, чир-суғҷыларыбыстың кӧзiдии ӱлӱкӱннi сiлiг чазаан. Ынағ ӧменi иптiг тут парча Хакасияның саблығ артизi Анна Бурнакова.
Владимир городта «СО-творчество» чоннар аразындағы фестиваль полған. «Час ханат» олған эстрада студиязының iкi хызыҷағы, Софья Самрина паза Наталья Сагалакова, андартын лауреат полып айланған. Пу улуғ ӧменең Россия культуразының саблығ тоғынҷызы, Хакасия искусствозының саблығ деятельi Игорь Боргояков илееде чыл устапча.
Ханты-Мансийскте ирткен «Возьмёмся за руки, друзья» чоннар аразындағы национальнай культуралар фестивальында «Ынархас» теелбек студиязы чиңiсчi паза аарластығ араласчы полыбысхан. Ӧменiң устағҷызы полча Россия паза Хакасия культуразының саблығ тоғынҷызы Елена Шарай.
Ирткен чайаачы сезон пайрамнарға пай полған. Чиит кӧрiгҷi театры (ТЮЗ) 60 чылын таныхтаан. Пу тус аразына артисттер республика чуртағҷыларын аймах чапсых ойыннарнаң тӧремiл ӧрiндiрчелер. «Саяночка» ансамбльға 50 чыл толған. Ӧме пайрамын таныхтапчатханда, ағаа «Хакасияның чон чайаачызының саблығ ӧмезi» пӧзiк ат пирiлген. «Медуница» орыс сарыннар ансамбльы паза Михаил Шрамконың адынаң орыс чонның хоры iдӧк аймах мероприятиелерде ӧткiн араласханнар, ол санда «Самоцветы Минусинского уезда» (Минсуғ город) паза «Сибирская глубинка» (Хызылчар город) чайаачы марығларда.
Чайаачы сезон чабылчатханда, республиканың ӧӧн культура учреждениезiнiң артисттерiн Хакасияның культура министерствозының пӧлiк чӧпчiзi Елена Кругова алғыстаан.
– Харындас чоннар, хада-пiрге тудынып, удур-тӧдiр полыссалар, андада пiстi пiрдеезi чиң полбас. Илбек Ада чаа тузында даа пiс прайзы хада тудынғабыс. Пӱӱл Илбек Чиңiстiң 81-ҷi чылын улуғ поғдархаснаң таныхтапчабыс. Аны хоостыра хазнада муңарлап аймах мероприятие иртiрiлче. Хакасия ла 400 азыра мероприятие иртiрiбiскен. С.П.Кадышевтiң адынаң чон чайаачызының национальнай кiнiнiң ӱлӱкӱннерi пӧзiк синде полча, – теен Елена Александровна.
«Пiс кiзiлерге часка сыйлапчабыс» концерт iкi часча парған. С.П.Кадышевтiң адынаң чон чайаачызының национальнай кiнiнiң прай ансамбльлары паза студиялары залға толдыра чыылысхан кӧрiгҷiлерге чапсых наа сарыннарын паза теелбектерiн сыйлааннар. Амды культура тоғынҷылары паза артисттер чағдапчатхан Тун пайрамға тимненерлер. Ол Сағай чазызында 20 хандыхта полар.
Сом Олег Ковалёвти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
