«Ноған марафон» – полызығлығ чӱгӱріc
03.06.2026
Хабарлар
Олғаннар – «Ноған марафон» акцияның ӧӧн араласчылары
Хазых чуртас. Пӱӱл тиксі хазнада Сбербанктың «Ноған марафон» полызығлығ чӧріміне Россияның 59 городы хозылған, оларның санында Ағбан
Пістің республикада пик хуйахтығ, чағбан чӱректіг чон чуртапча. Орындағы улус полызығлығ чӧрімнерде ӧткін аралазадыр. Кем-де СВО араласчыларына тӧреміл хабасча. Культура учреждениелері, улуғ саайға кірген Дагестанға полызып, концерттер иртірчелер. Хазых чуртасха тартылчатханнарға, тізең, Сбербанктың «Ноған марафон» чӧріміне хозылып, хазии уйан паза ӧкіс палаларға полыс пирер оңдай пирілген.
«Ноған марафон» – кибірліг мероприятие. Алында Сбербанк, чӱгӱрісті иртіріп, экология сурығларын пӧгерге кӱстенҷең. Чӧрім араласчылары дистанцияларны чӱгӱрібіскен соонда ағастар одыртчаңнар. 2023 чылдаң банк «Таңдағызына хозым» полызығлығ фонднаң палғалыс тутча. Анзы чӧрімнің пӧгінін алыстырған. Амды чыылған ахча имнер, кирек оборудование садызарына, тың ағырчатхан палаларға полызарына парча. Ідӧк ахчаның чардығы онкология кіннеріне кӧрілген. Полызығлығ чӧрімде аймах оңдайнаң аралазарға чарир. Москвадағылар чӱгӱрісте араласчатхан ӱчӱн ахча тӧлепчелер. Кізілер ӧнетін cчётха ахча ысчалар. 2026 чылда хоза пір оңдай пирілген. Сбербанк пӱӱл 185 чылын таныхтапча. Полған на чӱгӱрібіскен километр ӱчӱн организация 185 салковай тӧлеен.
Амғы чӱгӱрістер киречілееннер: спортнаң пик хуйахтығ улус айғасча. «Чилдең табырах» фестиваль ирткен кӱнде сӧрӧн полған полза, «Ноған марафон» чӧрім тузында наңмырлығ соох кӱн турған. Араласчылар пис дистанция тобырғаннар: 10 километр, 4,2 километр, 100 метр, 400 метр. Хазии уйан палаларның алынҷа пас меет полған. Оларға 400 метр кӧрілген. «Ноған марафон» чӧрім оңдайынаң «Чилдең табырах» фестивальға тӧӧй арах полтыр. Мында ідӧк пастап 10 километр чӱгӱрчеткеннерге чол пиргеннер. Олар дистанцияны тоос салғанда, мероприятие пайрамни азылған. Аарлығ аалҷылар санында полғаннар Хакасия пазы Валентин Коновалов, Ағбанның пазы Алексей Лёмин паза «Сбербанк» ПАО-ның Ағбандағы пӧлиинің устағҷызы Дмитрий Полулех. Пастыхтар чӧрімге пӧзік паалағ пиргеннер. Хайди таныхтаан Валентин Олегович, «Ноған марафон» кізілерні спортха хынарға, чир-чайаанны хайраллирға паза хазии уйан улусха полызарға ӱгретче. Чылығ сӧстер сыйыхтаснаң узарадылған.
Спортсменнердең иң пурун азах меетке читкен ниик атлетикаҷа Россияның спорт узы Артём Попов. Чир-суғҷыбыстың таниинаң, ол илееде тус 10 километрге чӱгӱрбиндір. Амғы сезонда ӧӧнінде 21,1 алай 15 километр тобырарға килісче. Ідӧк Попов ӧрінізінең ӱлескен: аның арғызы Денис Чертыков тағлығ чӱгӱрісче тилекей чемпионадында алтын медаль холға кирген. Арға-мӧрій Сербияда ирткен, анда чааҷылар кӱстерін сынааннар.
Саналығ чӱгӱрісче тренер Александр Карачаков Таштыптаң. Ол, «Ноған марафонда» пастағызын аралазып, иң узун дистанцияда пизінҷізі полыбысхан. Хакас иреннің чӱгӱреріне 36 артиинаң минута парыбыстыр. Александр Иванович ӱгренҷілері ӱчӱн чӱрексіпчеткен. Ол чоохтаан:
– Ағбанзар чӧрімге Алёна Сипкинанаң Саша Арыштаеваны ағылғам. Ікізі 4,2 километр чӱгӱрер. 24 сілкерде «Чилдең табырах» фестивальда араласхабыс. Алёнаны махтирҷыхпын. Ол, 10 километр чӱгӱріп, ипчілер аразында пизінҷізі азах меетке читкен. Ӱгренҷім 10-ҷы классты тоос салды. Саша 2012 чылдаң, секцияа пастағы чыл чӧрді. 3 километрде ол он иң артых спортсмен санына кірген.
Зинаида Шагаева «Командор» садығ туразында улуғ администратор полып істенче. Ипчі чӱгӱріснең тӧртінҷі чылы айғас парир. Узын тилідер пӧгіннең ол «НеПешком» клубсар пазын салған. Аны апарча тренер Светлана Овчинникова. Зинаида полған на чӱгӱріcте аралазарға харасчаттыр. Пӱӱл тыс пілбес кізі «Чилдең табырах» фестивальда, «Ноған марафон» чӧрімде араласхан, «Пас меетке прайзы сыхча» проектте кӱзін сынапча. Килер чылда аның ӧӧн пӧгіні – чарым марафон чӱгӱрiбізері.
Павел паза Ольга Ултургашевтер Хубачарда чуртапчалар. Ікізі дее имҷі полып істенче, ынағ ирепчінің ӱс хыс: 16 частығ Азалия, 7 чаcтығ Вероника паза пір частығ Диана. Сӧбіре пазы Оңхак аалдаң, хада хонғанының тӧреен-ӧскен чирі – Ис пилтірі аал. «Чилдең табырах» фестивальда Ольга Анатольевна Азалиянаң паза Верониканаң хада араласхан. Че «Ноған марафонға» ирепчі Верониканы ла сығарыбызарға чаратхан. Пала, 400 метр тобырып, саңай тооп партыр. Итсе, ылғабаан. Iҷезі теен:
– 16 градус чылығ полар тіп искіргенде, паланы араластырғабыс. Улии 9-ҷы класста, сыныхтағларға тимненче. Хызымның медальына ӧрінерге халча.
Инклюзия дистанциязы «Ноған марафонның» иң чӱрексіністіг чӱгӱрізі. Аның араласчылары – хазии уйан палалар. Пӱӱл пас меетке ӱc пала сыххан: Александра Хегай, Дарина Канзычакова паза Владимир Яблонцев. Прайзы «НьюСкул» хазнани нимес школаның ресурс клазында ӱгренче. Ол аутизмніг олғаннарға кӧрілген. Чӱгӱріс оңдайынҷа палалар дистанцияны паба-іҷелерінең хада тобырчалар. Екатерина Хегай – класстың устағҷызы. Ол чоохтаан:
– Палаларны чон аразына кирерге кирек. Ол сағыснаң «Ноған марафонда» араласчабыс. Чӱгӱріске пазынғанда, хызыма сидік арах пілдірген. Че чӱгӱрерге аның кӧңніне кірче.
Константин паза Татьяна Канзычаковтар чӧрімге полызығлығ пӧгіннең хозылтырлар. Ирепчінің ӱc пала. Дарина – оларның очы хызы. Татьяна Васильевна, сағыстарынаң ӱлезiп, теен:
– Позыңның палаңның хазии уйан полза, пасхазының кирексіністерін чахсы оңарчазың. Сӧбіренең улуғ нимес хозым идерге чаратхабыс. Хада хонғаным кӱс структураларында істенче, ағаа чӱгӱрерге оой арах полған. Мин спортнаң айғаспинчам. Пу 400 метрге чадап сыдастым. Даринаның кӧңні ачых-чарых. Анзы уғаа чахсы. Позым «НьюСкул» школада тьютор полчам. Чӧрімде араласхан палалар – минің ӱгренҷілерім.
«Новые Известия» СМИ-ның искіриинең, Cбербанктың «Ноған марафон» полызығлығ чӧрімінде 290 артиинаң муң кізі араласхан, дистанцияларға 150 артиинаң муң араласчы сыххан. Олар 1 миллион километр чӱгӱрібіскеннер. Чыылған ахчаның тиксі сині 250 миллион салковайға тиңнелче, пылтыр 60 миллион салковай полған. Пу чидігде хакасиядағыларның хозымы парох.
Сом абакан.рф сайттаң
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
