Хынған урогы физкультура полча
28.05.2026
Статья
Тренер Аркадий Субраков, Наина Сазанакова, Полина Канзычакова (ортызында), Айлана Боргоякова
Кӱн матыры
Пiрсiнде «Хакас чирi» газетаның редакциязынзар Асхыс аймаандағы Индiркi Тӧӧ аал школазының ӱгретчiзi Нина Мамышева кил парған. Ол «Хола пырғыҷах» ӧнетiн сығарысха олғаннарның сiлiг хоостарын ағылған. Нина Леонидовнанаң танызып, тӱрче чоох-чаахнаң турыбысхабыс. Аның чооғынаң Индiркi Тӧӧ аалда чахсы кӱресчеткен хызыҷах Полина Канзычакова чуртапчатханын пiлiп алғам. Ӱгретчi мағаа ол иркеҷектiң iҷезiнең палғалыс тударға полыс пирген.
– Iкi чыл мының алнында Алексей оолағым Томсктаң кӱмӱс медаль ағыл килгенде, аннаңар «Хола пырғыҷахта» пасхазарох, – чалахай кӱлiмзiреп, теен мағаа Полинаҷахтың iҷезi Татьяна Алексеевна.
Татьяна Алексеевна паза Валентин Васильевич Канзычаковтар, читi пала ӧскiрiп, чон аразынзар иптiг, турыстығ кирчелер. Тун хыстары Елизавета, позының сӧбiрезiн тӧстеп, алынҷа чуртапча. Артём армия соонаң, iстенiс чолына кiрiп, иптiг ле тоғынча. Олег 11 классха сыхты паза спорт узына кандидат полча. Лидия 9-ҷы классты тоосты, Алексей – 8-ҷi классты, Полина – 4-ҷi классты, Владимир – 1-ғы классты. Чоохтирға кирек, прай палалар спортнаң айғасчалар, кӱреске чӧрчелер, чидiглерi улуғ.
– Полина, харындас-пиҷелерiн кӧрiп, школаа чӧр сыххандох, кӱреснең айғазып пастаан. Ағаа хоза, клубсар сарнирға чӧрҷең. Ам саңай кӱреске сабыл парыбысхан. Тренерi Аркадий Аверьянович Субраков полча. Ол палаларны микелерге чахсы ӱгретче, кӧнiктiрче. Аның кӱресчiлерi марығлардаң тӧремiл сыйыхтығ орыннар ағылчалар, – тiпче Татьяна Алексеевна.
Тренировкалар кӱннiң сай полчалар. Хызыҷах тынағ кӱннерiнде ле сала маңнығ полча. Ибде Полина харындастарынаң хада микелернi таптапча, пiрееде пабалары Валентин Васильевич ара кiрiбiсче. Ол iдӧк грек-рим кӱрезиинең айғасчаң, ам кӱснең сала тыыбысхан оолғы Олегнең ойын пазында харбазыбысча.
Тренерi Аркадий Субраковтың таниинаң, Полина Канзычакова спортха чайалған, кӱстенҷiк, чапчаң хызыҷах. Ол кӱресте Алексей харындазынаң халбасха тiп маңат сiренче. Марығларға чӧрiп, сыйыхтығ орыннар ағылча. Халғанҷы чидiглерiнеңер чоохтаза, кӱресчi хызыҷах, пӱӱл кӧрiк айында Таштып аймаандағы Улуғ Сии аалда ирткен «Сағаа, абахай, чарыдылча» марығда 11 – 13 частығ хызыҷахтарның аразында пастағы орын алып, ибiнзер алтын медаль ағылған. Ол турнир Ипчiлернiң чоннар аразындағы ӱлӱкӱнiне чарыдылған полған.
Iдӧк ӱр ниместе, 7 сiлкерде, Алтай аймаандағы Аршаннар аалында чоннар аразындағы класстығ спорт узы, тилекейдегi паза Россиядағы первенстволарның чиңiсчiзi, Россия чемпионы С.Г.Уксековтың сыйиина паза Аршаннар аал чӧбi устағ-пастааның сыйиина алғым марығ ирткен. Полина Канзычакова андартын iдӧк алтын медальлығ айланған.
Школада Полина Канзычакова чахсы ӱгренерге кӱстенче. Кӱресчi хызыҷахтың хынған урогы физкультура полча. Хакас тiлi паза ИЗО уроктарына хынча, англия тiлiне тартылча. Ачых-чарых паза ӧткiн хызыҷах иб аразында iҷезiне чахсы полысча.
– Тӱрчедең чайғы пасталар. Узун каникулларда сӧбiренең хада чир-чайаанзар тынанарға, ит сiстирге, суға сомарға чӧрерге хынчабыс. Тайғазар палых одын, аймах чистектер теерерге чӧрчебic. Пӱӱл андағох пӧгiннер халған, – чоохтапча Татьяна Канзычакова.
Сом Аркадий Субраковтың архивiнең
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
