Полза – пастағы поларға
20.05.2026
Хабарлар
Сергей Бобрик «Конвейерные технологии» ООО-ның роботтар линиязын кӧртісче
Тиліс чолынҷа. Хакасияның промышленность ниме-ноозы сығарызында маңнаныстығ паза тӱзімніг тоғынчатхан пірігістернің санында – «Конвейерные технологии» ООО. Піске завод тоғызын кӧртізіп, аның тиліс чолынаңар ӧӧн директор орынҷызы Сергей Бобрик чоохтап пирген
«Полза – пастағы поларға» пу совет тузындағы лётчик-испытатель Валерий Чкаловтың сӧстері – «Конвейерные технологии» ООО-ның ӧмезінің хыйғызы. Ӧӧн директор Владимир Потехин предприятиені иң артыхтар санына кӧдіреріне прай кӱзін салча. Аннаңар Хакасияның экономиканаң палғалыстығ аймах тоғазығ-чыылығларында удаа «Конвейерные технологии» ООО-ның адын истерге чарир. Пірдең, чахсы ла саринаң. Заводты сабға сығарар ӱчӱн улуғ тоғысты аның тӧcтегҷізі паза ӧӧн директоры апарча. Ол санда позының ӧмезіне ізестіг тоғынҷыларны алып. Андағ кізілернің санында аның орынҷызы Сергей Бобрик полча.
Сергей Бобрик «Конвейерные технологии» ООО-зар 2017 чылда кладовщик тоғызына килген. Аның алнында, тізең, ирен 17 чыл чааҷы службазына пир салған. Тынаға сыхханда, Хызылчар крайынаң Саяногорск городсар чуртирға кӧскен. Пір чыл пазынаң предприятиенің ӧӧн директоры Владимир Андреевич аны сығарысча директорға турғысхан, паза пір чыл пазынаң – позының орынҷызына. Іди Сергей Иванович предприятиеде тоғыс чыл тоғын салды, ол санда устағҷы тоғызында – читі чыл.
«Конвейерные технологии» ООО позының тархынын 2013 чылның 22 хосхарынаң пастапча. Ол чыл Ымай тас посёлокта пастағы завод азылған. Аның тӧстегҷізі паза ӧӧн директоры Владимир Потехиннің кӱстенізінең предприятие пӧзік технологиялығ сығарыснаң айғазып пастаан. Аның ӧӧн тоғыс кӧcтее – конвейер роликтерін паза оларға хоза чардыхтарны сығарары. Полған на ниме-ноо сертификат алча паза ГОСТ-ха килістіре сығарылча. Аның ӱчӱн предприятие ГОСТ хоостыра техническай оңдайларны тимнепче. Салтарында роликтер пӧзік синде сығарылчалар.
– Роликтер – промышленность предприятиелерінің иң табырах ӱрепчеткен хоза чардығы, аннаңар ол улуғ кирексініснең тузаланча, – чарытча Сергей Иванович. – Роликтер конвейерлерні тузаланчатхан промышленность предприятиелеріне кирек полча, ол санда хара тас, чир ис-пайын аныпчатхан, аал хонии предприятиелеріне, имнег киреене паза пасха кӧстеглерге. Пістің предприятиенің ниме-ноозын алчатхан регионнар паза хазналар саны алғып ла одырча. Пӱӱнгі кӱнде «Конвейерные технологии» ООО сығарған ниме-ноо Россияның прай даа регионнарына, Ыраххы Востоктаң пасти кидеркі регионнарға читіре, ідӧк Казахстанға паза Беларусьха читірілче.
Че конкуренттер парох. Сергей Ивановичтің таниинаң, пӱӱнгі кӱнде Россияда предприятиенең тиңнес полар ӱсче предприятие тоғынча. Экономикаа сидік тустар пу даа кӧcтеге теелгеннер. Аннаңар чырғал алызығларына прайзы ла сыдаспаан, чабыл парғаннар тіпче ӧӧн директор орынҷызы. «Конвейерные технологии» ООО, тізең, хазнабыста пу кӧстегнең айғасчатхан иң артых ӱс предприятие санына кірче.
Владимир Андреевичтің кӱстенізі паза ырах кӧрізі сылтаанда предприятие алғып одырча. Іди 2017 чылда айда 12 – 15 муң ролик сығарылған полза, пӱӱл сығарыс тӱзімі айда 30 – 35 муң роликке тиңнелче, пірееде 40 муңа даа читче. Ӱс чыл мының алнында предприятие пастағы миллион ролигін сығарыбысхан. Амды ікінҷі миллионын сығарарға тимненче. 2017 чылда Хакасиядағы предприятие хоза пір заводты Челябинск городта асхан. Ӱс чыл мының алнында, тізең, Ымай тастаң пасха, Нымырттығда наа цех азылған.
Полған на тоғынҷы роликтернi чыырына нандырығлығ хайча
– Пістің предприятие пӧзік технологиялыға саналча. Чылдаң чылға піс тоғыс тӱзімін чахсыландырарға паза пос алынҷа тоғындырарға кӱстенчебіс. Іди заводта роботтар тоғынчатхан линия азылған. Анда прай тоғысты роботтар толдырча, пір ле оператор оларның тоғызын хайығда тутча. Тирігнің чардығы Россияда алылған, ӧӧн чардығы – Хыдатта, – чидіглернең ӱлесче Сергей Бобрик.
Пілдістіг, мындағ улуғ проекттерні пос ахчазына ла чуртасха кир полбассың, банктарда, тізең, кредиттер пӧзік проценттіг пирілчелер. Аннаңар предприятие республика паза хазна синіндегі хабазығларнаң тузаланарға прай кӱзін салча. Андағ полызығ сылтаанда предприятие кӱзін хосча паза сығарыс тиріглерін нааҷылап одырча.
Іди Хакасияның промышленность тилізі чыындызы искіриинең, «Конвейерные технологии» ООО-ға бизнес-проектін чуртасха кирерге «Регионның тиліс проекттері» программаҷа льготалығ проценттіг (чылда 1 %) ікі алым пирілген: 2021 чылда улуғ хырлас айында – 13 миллион 700 муң салковай паза 2022 чылның чарыс айында – 34 миллион 264 муң салковай. 2023 чылда сілкер айында, тізең, заводта наа тиріглер турғызылған цех азылған.
2024 чылда алынҷа цехта роботтар полызиинаң тоғынчатхан сығарыс азылған. Роботтар подшипниктернің корпустарының штамповказынаң айғасчалар. Пу проектті чуртасха кирерге тиксі 68,5 миллион салковай хорадылған, ол санда 32,2 миллион салковай алымға алған ахча. Пуох проектче пірігіс таарлағ машиналарын Россияда сығарылған машиналарға алыстырып алған.
Мыннаң предприятиенің инвестиция проекттері тоозылбинча. Амды предприятие, Хакасияның алынҷа экономика орнының резиденті полып, аның чирінде «Саяногорсктағы подшипник заводын» пӱдірерге пӧгінче. Наа проектнең Хакасия правительствозы таныс паза «Конвейерные технологии» ООО-наң хада андағ пӧгін тутчатханынаңар чӧптезігде хол салған. Ноға ол подшипниктер сығарызынаң айғазарға пӧгінче? Пӱӱнгі кӱнде завод роликтернің сығарызына кирек ниме-нооны прай позы тимнеп алча, подшипниктердең пасха. Аны ол Хыдат чирінең алча. Аннаңар Владимир Потехин пу улуғ пӧгінні чуртасха кирерге сағыныбысхан.
Пӱӱнгі кӱннің паза пір сидік сурии – ӱгредігліг специалисттер чидіспинчеткені. «Конвейерные технологии» ООО тоғынҷыларны кирек тоғысха позы тимнепче.
– Пістің туста токарьға, сварщикке алай фрезировщикке тың на ӱгренминчелер, – тіпче Сергей Иванович. – Тоғынҷылар, тізең, улуғ кирексініcнең тузаланчалар. Аннаңар піс позыбысха кирек тоғынҷыларны позыбыс тимнепчебіс, ӱгретчебіс, анаң, ол тоғысха тимде полза, станок кистіне турғысчабыс. Хомзынысха, хатығ тустар пістің предприятиее ідӧк теелчелер. Аның ӱчӱн тоғынҷылар санын хызырарға киліскен. Алындағы чылларда 100 азыра кізі тоғынған полза, амды СВО араласчыларынаң хада 62 кізі саналча.
Чоохтирға кирек, предприятие хараа-кӱнӧрте тоғынча, ӱлӱкӱннер, тынағ кӱннер чох. Наа чылға ла предприятие тоғызын нинҷе-де кӱнге тохтатча. Полған на сменаның, андағ тӧрт бригада, тоғыс тӱзімінің сині пар. Ол сменада 1000 ролик тимнеп саларға кирек, салтарында айда кӧзіділген синге чидер ӱчӱн.
Сергей Ивановичтің сӧстерінең, предприятие тоғынҷыларға чахсы тоғыс оңдайларын тӧстирге кӱстенче, тоғыс кип-азаан пирче, аны чуупча, тоғынҷыларның азыранҷаң паза тынанҷаң пӧліктер пар. Аннаң пасха, прай социальнай гарантиялар кӧріл парған, ол санда санаторий-курорт имнеен иртері. Пілдістіг, чал ахчазының сині ідӧк тоғынҷының тиксі кӧңніне теелче. Предприятиеде ортымах чал ахчазы республикаҷа ортын синнең сала пӧзік тудылча. Анзы тоғынҷыларға артых сағыссырастар чох тоғынарға оңдай пирче. Пастағызынаң ала тоғынчатхан нинҷе-де тоғынҷы пар, ол санда орынҷы токарь-фрезировщик Алексей Имщековты паза бухгалтер Евгений Сущенконы адапча. Тиксі алза, тоғынҷыларның ортымах стажы – 9-10 чыл. Пір-ікі чыл тоғын салған кізілер саннығ ла.
«Конвейерные технологии» ООО-ның устағ-пастаа позының ӧмезіне ле нимес іди нандырығлығ хайча. Предприятие Саяногорсктың, Ымай тастың паза Нымырттығның социальнай учреждениелеріне, чуртағҷыларына, оларның айланыстарына хаҷан даа удур парча паза полысча.
Предприятие Хакасия синінде иртчеткен марығларда тӧреміл араласча. Андағ марығларның пірсі – «Хакасияның идінҷегі». Ол 2022 чылдаң ала марығның аймах номинацияларының чиңісчізі полча, ол санда «Хакасияның промышленнигі», «Чыл инвесторы» номинацияларда.
– Пістеңер республикада даа, Россия синінде дее пӧзік синде пілчелер сағынчам, – тіпче Сергей Иванович. – Хазнабыста хайдағ даа сидік тустар ползын, пістің предприятие устағҷыбыс Владимир Андреевич Потехиннің кӱстенізінең тоғынған, тоғынча паза тоғынар!
Сергей Иванович піcке сығарыс цехтарын кӧртіс пирген. Пастағы цехта тоғынҷылар роликтерні чыыпчалар. Полған на тоғынҷының позының пӧзік технологиялығ станогы – ӧӧн тоғыс орны – пар. Чоохтирға кирек, роликтер пір синніг полбинчалар. оларның диаметрі 76 миллиметрдең пасталып 219 миллиметрге читче, узуны, тізең, хайдағ даа поларға айабас. Аймах конвейерлерге пасха-пасха синніг роликтер кирек. «Конвейерные технологии» ООО чахығлар хоостыра хайдағ даа роликтерні паза оларға килістіре хоза чардыхтарны тимнепче. Роликтерге пастап хоза чардыхтар тимнелче. Полған на тоғынҷы позының киреенең, хоза чардыхтарнаң айғасча. Кем-де тимір чардыхтарны хабыстырча, кем-де оларны килістіре кӧрімніг итче. Пір тоғынҷы сырлирға киректелчеткен чардыхтарны прай сырлапча. Тоғыста олаңай нимес, порошок кӧрімніг сыр тузаланылча. Халғанҷы хаалағда токарь-фрезировщик прай чардыхтарны роликке чыыпча.
Пасха цехта роботтар тоғынча. Олар изере турчалар. Пір пазында роботтарға пір синніг тоғылах тимір пластиналар пирілче. Анаң полған на робот, аны алыстырып, пазағызына пиріп одырча. Халғанҷы робот тӱгенҷі алызығларны кирче. Тимде корпустар пір харачахха чыылчалар. Олар анаң кізілер тоғынчатхан цехха пирілчелер, анда роликтер сығарызында тузаланылчалар.
Нымырттығда орныхчатхан заводтаң Сойан-Сус ГЭС-тың тулғоры кӧрінче. Пір саринда илбек Ким суғ ахча, чол кизіре пӧзік мрамор хайалығ тағлар турча. Мындағ сіліг чир-чайааннығ чирде «Конвейерные технологии» ООО-ның ынағ ӧмезі, пастыхтары турғысхан хыйғыдаңар – «Полза – пастағы поларға!» – ундутпин, позының тоғызын апарча.
Сомнар Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
