Пӱдiрiглер тузында тимге сығарға кирек
19.05.2026
Хабарлар
Устағ-пастағ модульлығ стационарның пӱдiриин тӧремiл хайығда тутча
Тоғыс чорығы. Хакасия пазы Валентин Коновалов тоғыс сурығлары хоостыра Боград аймаандағы Тадар Тис аалда пол килген. Пӱӱнгi кӱнде Боград аймаанда ӱс социальнай объекттiң пӱдiрии парча. Прайзы хазна программалары хоостыра пӱдiрiлче
Республика пазы Тадар Тис аалзар 14 сiлкерде чӧрген. Пастап аал тастындағы суғ арығлаҷаң комплекстi кӧрген. Ол «Аалларның тиксi тилiзi» хазна программазынҷа пӱтче. Аның пӱдiрии ирткен чылда кӧрiк айында пасталған, пӱӱнгi кӱнде ол 85 %-ке тимде. Подрядчик сағам оборудование турғысча паза ибiркiзiн иптеп пастабысхан, пӱдiрiг тастын сендвич-панельнең чабарынҷа тоғыс узарадылча. Суғны арығлап ағысчаң ӧӧн система, 2026 чылның кiчiг хырлас айында тимге сығып, тоғынып пастир тiп пӧгiнде турча.
Анаң республика пазы Валентин Коновалов кӧп кӧстеглiг наа спортзал пӱдiрiлчеткен орынзар чол тутхан, анда тоғыс хайди апарылчатханын паалаан. Таныхтирға кирек, наа спортзалның пӱдiрии iдӧк «Аалларның тиксi тилiзi» хазна программазы хоостыра чуртасха кирiлче. Амғы туста спортзал 60 %-ке пӱдiрiл парған: тура тимде тирге чарир, подрядчик iстiндегi тоғыстарны толдырып пастабысхан. Кӧп кӧстеглiг спортзалның ибiркiзiн иптирiнҷе тоғыстар апарыл сыхханнар. Объект пӱӱл чыл тоозылғанҷа тимге сых парарға кирек.
Iдӧк Валентин Коновалов тоғыс чорығында 30 орғанға кӧрiлген модульлығ стационарның пӱдiриине теелчеткен сурығлар хоостыра: табырах пӱдiрiлчеткен модульлығ конструкцияларны турғызарынаңар паза садызарынаңар сурығларҷа чыылығ иртiрген. Наа имнег учреждениезi Т.И.Ануфриеваның адынаң Боград аймааның имнег туразының хыринда пӱдiрiлче.
Таныхтирға кирек, пу объект хоостыра заказчикке подряд организациязынаң госконтрактты азынада тохтадарға килiскен. Подряд организациязы кӧрiлген тоғыс обязательствозын толдырбаан. Амғы туста наа подряд организациязы табылған, ол тоғыстарны толдырып пастабысхан. Пӱдiрiге чир участогы тимнел парған, бетон блоктарын ағыл килгеннер. Пӱдiрiгҷiлер свайлар саап парирлар. Чыылығда iдӧк Хакасияның сенаторы Олег Земцов араласхан. Ол пӱдiрiг тоғыстары кӧрiлген график хоостыра толдырылчатханын таныхтаан.
Хакасия пазы Валентин Коновалов чыылығда таныхтаан, сайбағлар полып, тоғыс тузы тикке хорадылғаннаңар подрядчикке прай тоғыстарны чапчаң апарарға паза объекттi тузында тимге сығарарға прай кӱзiн саларға килiзер. Правительство, тiзең, хайдағ-да сидiксiнiстер сығысса, оларны пӧгерiнҷе оңдайлар таап полызарына iзендiрче.
– Ӧӧнi – тоғыс графигiн сайбабасха. Пiлчем, сiрер чарым чылға соона халчатхан тоғысты алып апарчазар. Сiрерге, прай кӱстерiң салып, аны толдырарға килiзер. Киртiнчем, тоғысха тӱгеде пирiн салып iстензер, прай ниме килiзер, – чыылығны тоозып, чоохтаан Хакасия пазы Валентин Олегович.
Cом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
