Ӱгредiг узарадылча
19.05.2026
Хабарлар
«Хакасия матырлары». Пу проект араласчылары ӱзінҷі ӱгредiг модульын иртчелер. Ол регион паза муниципальнай устаныс темаларына чарыдылча
Ӱзiнҷi модульның ӱгредии Н.Ф.Катановтың адынаң Хакас хазна университедiнiң ректоры лекциязынаң пасталған. Экономика наукаларының докторы, профессор Татьяна Краснова ХГУ-ның кадрлар квалификациязын кӧдірер, пасха даа специализацияа тимнир институдында «Государственные меры поддержки и инструменты развития территорий» лекция хығырған.
Анда национальнай проекттердеңер, экономиканың ӧнетін орыннарынаңар, промышленнай кластерлердеңер, индустриальнай парктардаңар паза даа пасха кӧстеглердеңер чоох парған. Татьяна Краснова национальнай проекттер хоостыра республикада чуртасха кирілчеткен регион проекттеріне ӧӧн хайығ айландырған. Іди, кӧзідімге алза, «Узах паза ӧткін чуртас» проект салтарлары хоостыра ікінҷі чылы ӱгренчеткен 39 ординаторны имҷі-стажерлар тоғызына алғаннар, оларның 23-i – Хакас хазна университедінiң студентi.
Лекцияда iдӧк пос киреенең айғасчатханнарға хазна хабазиинаңар чоох парған: льготалығ кредиттердеңер, налогтардаңар, займнардаңар, лизингтеңер, кӧні инвестициялардаңар, хазна гарантияларынаңар паза даа пасхазынаңар. Ректор промышленнай предприятиелерге паза аал хонии производительлерiне хабазығ оңдайларына алынҷа хайығ салғанох.
– Аал хонии производствозы паза агропромышленнай комплекс хазнаның ӧӧн кӧстеглерi полчалар. Ӧӧнiнде Хакасияа, хайда чуртағҷыларның 30 проценті аалларда чуртапча. Республикада чир ис-пайын аниры алғыдылчатханда, аал хонии киреенің сині тӱс парған, – таныхтаан Татьяна Григорьевна. – Піске ол улуғ сидіксініс. Пӱӱн аал хониин тилідеріне федеральнай субсидиялар пирiлче, регион ахча хосса. Хакасияда андағ ресурстар чидiспинче. Пістің регионның продукциязы чахсы качестволығ даа полза, пу отрасль улуғ хайығ кирексіпче.
Лекция тузында исчеткеннер сурығлар пиргеннер, аал хониина теелчеткен сағыстарын искіргеннер. «Хакасия матырлары» проекттің ӧткін араласчызы, чааҷы имҷi Игорь Арчимаев таныхтаан:
– Ӧзімнер ӧскірері чирге нинҷе удобрение кирілгенінең палғалыстығ. Сурығ читкiҷе удобрениелiг орыннар таап аларында. Пӱӱн Хакасияда орын даа, инвестор даа пар.
Лекцияда «Ағбан» аэропорттың тиліс оңдайларын, «Долина Менделеева» наука-техника кіні істінде дата-кін тӧстирін паза предприятиелер пӱдірерін ӱзӱргеннер.
Тоғазығ араласчыларының пірсі СВО араласчызы, производствода тоғысты хайраллирынҷа квалификациялығ специалист паза ікінҷі пӧзік ӱгредігҷе юрист Станислав Зайцев полған. «Матырлар тузы» проект хоостыра ол Хакасияның ӱгредіг паза наука министерствозында стажировка ирткен.
– Мин пос регионы тилізіне хозым идерге, кічіг чир-cуубысха полызарға сағынчам, – тіпче Станислав. – Минің тоосчатхан квалификация тоғызымның темазы чииттернің патриот ӱгредиине чарыдылған. Мыннаң мындар Хакасияның ӱгредіг паза наука министерствозында пу тоғысты узарадарға паза позымның пілізімні ӧсчеткен тӧлге читірерге сағынчам.
Тоғазығда iдӧк РАНХиГС ВШГУ институдының ӧнетін программалар паза проекттер кінінің проект директоры, запастағы полковник Игорь Игнатович араласхан. Нинҷе-де кӱн изере проект араласчылары аннаң хада проектті тилідер сурығларны паза чӧптерні ӱзӱргеннер.
Сом авторни
Автор :
ХГУ-ның хабарлар пӧлии
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
