Чааҷыларға – наа чоллар
06.05.2026
Хабарлар
Наа ӱгредігліг проект араласчылары
Матырлар тузы. Пу наада Хакасияның тиліс чыындызы – «Минің пос киреем» кiн ӧнетін чаа операциязы ветераннарына, оларның сӧбірелеріне наа ӱгредігліг проект азыбысхан
Хакасияның тиліс чыындызы ӧнетін чаа операциязы чааҷыларына, ветераннарына паза оларның сӧбірелеріне сыбыра полызарға кӱстенче. Аннаңар пос киреене хабасчаң кіннің устағҷызы Екатерина Эклер «Ада чир-суубыс арачылағҷылары» чыындының Хакасиядағы пӧлиинең, Хакасияның істеніс паза социальнай арачыланыс министерствозынаң сыбыра палғалыс тутча. Полған на тоғазығда ол чааҷыларға наа ӱгредігліг проекттеңер искір турған. Іди тиліс чыындызы «Мой бизнес. Свой вектор открытий» наа ӱгредігліг проект тӧстебiскен.
Амды регион синіндегі ӱгредігліг программада 23 кізі араласча. СВО-ның араласчылары паза оларның туған-чағыннары ікі ай аразына пос киреен хайди апарарға киректеңер піліп аларлар. Ідӧк оларға тегiлек столлар, пӧзік чидіглерге читкен идiнҷектернең тоғазығлар иртірілер.
Наа ӱгредігліг программа пайрамни азылчатханда, чыылған чон алнынзар наа проекттің тӧстегҷізі, пос киреене хабасчаң кіннің устағҷызы Екатерина Эклер сыххан.
– Пӱӱн «Мой бизнес. Свой вектор открытий» наа ӱгредігліг программа азылча. Анда аралазып, СВО ветераннары пос киреенең айғазарға ӱгренерлер. Чоохтирға кирек, араласчыларның хай піреезі ӱр ниместе ле пос киреенең айғас сыххан. Оларға пу ӱгредігліг программа ідӧк тузалығ полар. Сірерге мында тузалығ тоғазығлар кӧп иртiрілер. Iдӧк сірер аймах предприятиелернің тоғызын пос хараанаң кӧріп аларзар, – теен Екатерина Эклер.
Ідӧк чыылған чонзар Хакасия Ӧӧркі Чӧбінің депутады, идінҷек Олег Гавловский айланған:
– Чир-суубысха арачылағҷылар кирек полғанда, сірер, сағынмин даа, аны арачылирға турыбысхазар. Амды сірерге амыр чуртасха кӧнiгерге полыс пирерге кирек. Піс полғанына ла полызарбыс, пілістерібіснең ӱлезербіс, – теен ол.
Мындағ чахсы проектте араласчатхан чааҷыларның пірсі Харатас городтың чуртағҷызы Виталий Лобанов полча. Ол ӧнетін чаа операциязында ікі чыл азыра араластыр. Чааҷы СВО алнында тимір хабыстырҷаң полып істентір. Холнаң тоғынарға кӧнік парған ирен амды іди парыстан полбас. Махачы чааҷы, позының алнында турғызылған чахығларны чахсы толдырыбысхан ӱчӱн, «За отвагу» медальнаң таныхтаттыр. Хатығ чаалазығларда ирен пис хати палығлаттыр. Ирткен чылда аар палығлатхан соонаң аны ибзер ызыбысханнар. Ибінзер айланғанда, ол «Ада чир-суубыс арачылағҷылары» чыындының Хакасиядағы пӧлиинең пик палғалыс тут сыххан. Анда ағаа амыр чуртаста пос орнын таап аларға чахсы хабастырлар. Чыынды пастыра ол пу ӱгредігліг проектте аралас кӧрерге чараттыр.
– Мин аар палығлатхан соонаң тоғысчы профессияҷа тоғын полбаспын. Чааҷы полар алнында мин аймах профессияларҷа істенгем, токарь даа полғам. Че амды хазиим мағаа андағ оңдайнаң парыстанарға оңдай пирбинче. Аннаңар мин пу проектте аралас кӧрерге чаратхам. Мағаа мында алған пілістер тузалығ полар тіп ізенчем. Паста сағыстар кӧп, пу ӱгредігліг проект мағаа чуртазымда наа чол таап аларға хабазар тіп сағынчам, – теен СВО ветераны Виталий Лобанов.
Сом Хакасияның тиліс чыындызының архивінең
Автор :
Ольга Томочакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
