Кем алай ниме иң аарлығ: чағын кiзi алай ис-пай?
06.05.2026
Хабарлар
Писательнің ис-пайын ээленібізерге хара сағыс тутчалар
Тун ойын. Хосхар айының халғанҷы кӱннерiнде «Читiген» Хакас национальнай драма паза хакас чонның кӧг театры республиканың чуртағҷыларын «Наследники» хормачы ойыннаң ӧрiндiрдi
Наа ойынны Хызылчардаң килген режиссёр Андрей Пашнин француз драматург Пьер Шеноның «Будьте здоровы!» пьесазынҷа турғысхан. Ирткен чылда Андрей Иванович позының театрынаң хада «ЧитiгенФест» фестивальда кӧрiгҷiлерге «Слово за слово» спектакльны кӧзiткен. Анда ол iдӧк артист чiли араласхан. Фестиваль тузында «Читiген» театрның устағҷызы Ирина Чустугешеванаң, чоох алызып, наа ойынны турғызарға чӧптезiп алғаннар. Iди пiр чыл даа иртпедi, iкi хонҷых регионның чайаачылары «Наследники» хынығ спектакльны тимге сығарыбыстылар.
Пу олаңай ла хормачы ойын нимес. Ол кiзiнi хара сағыстығ, харам полбасха ӱгретче. Саблығ писатель ӱреп парғанын пiлiп алғандох, туған-чағыннары, тигiлгеннер чiли, аның ис-пайын китеп сыхчалар. «Читiген» театрның артисттерi матырларның омаларын хынығ, киртiстiг толдырчалар. Оларны аалҷы-режиссёр позы хылых-оңдайлары хоостыра таллаан. Ойында Хакасияның чон артизi Валерий Топоев, Хакасияның саблығ артизi Вероника Тинникова, артисттер Юрий Ткачёв, Каскар Чаптыков, Юлия Минина, Вячеслав Тороков, Алина Дъячук, Алина Капсаргина, Юлия Калачева араласчалар.
– «Наследники» спектакльда мин Людовиктi ойнапчам, ӱреен кiзiнiң кiзӧзi полчам. Чазырбин чоохтапчам, рольым аар, анда кӧп чоохтанарға киректелче. Пастап Людовик хасты ӱреенiне чобалча, че аның пазында кинетiн хара сағыс тӧрiп парча, ипчiзi наследстваа кiрiбiссе, аның чуртазын алыстырыбысчаң оңдай пол килер, килкiм алымнардаң озып алар. Аннаңар, кiзi ӱреенде, минiң матырым тың ӧрiнче. Илбек писатель ӱрееннеңер тылаасты чонға тарадыбысчалар, че анзы айыл килче. Аннаңар Людовикке аймах-пасха оңдайлар тiлирге, сағынарға килiсче. Уғаа хынығ спектакль. Аның сюжедi табырах алысча. Ол француз комедиязы. Французтар кӧп паза табырах чоохтанчалар. Хакас артисттерге анзы сидiк. Мында, тiзең, пicке, французтар чiли, табырах чоохтанарға килiскен.
Мин пастағы репетицияларда полбаам. Хазыхтанғам. Тоғысха сыхханымда, репетиция хыызында парчаттыр, аннаңар мағаа ойынға чапчаң кiрерге килiскен. Уғаа кӧп текст ӱгрен салғам. Режиссёр Андрей Иванович матырның хылиин, тудынызын кӧзiт пирче, анаң пiс iдӧк итчебiс, че пос оңдайынаң. Спектакльны пiр ай тимнеебiс. Режиссёрның позының даа итчең тоғыстар полған. Андрей Пашнин Хызылчар крайының театр деятельлерi пiрiгiзiнiң кнезi полча, аннаңар чорыхтарға удаа сығыбысча. Ойын тимнелчеткен туста ол Хызылчарзар, Ачинсксер, Минсуғзар чӧрген. Андағ даа полза, тоғызыбыс оой парған.
Пу хормачы ойын, че олох туста тирең сағысха тӱзiрче. Анда хынығ кӧрерге, хайди, кiзi ӱреенде, туған-чағыннары таласчалар, аның чуртас тооза чыынған, пӱдiрген, тӧстеен ис-пайын ӱлестiрчелер, пыласчалар. Мындағ киректер олаңай даа чуртаста пол парча. Килiңер, кӧрiңер наа ойынны. Кӧрiгҷiлер хатхырзалар, пiске ойнирға оой, – кӧңнiнең ӱлесче артист Каскар Чаптыков.
Аалҷы-режиссёр Андрей Пашниннiң чооғынаң, хакас театры ӧмезiнең истенiп тоғынған. Артисттернiң чайаачы устары пӧзiк паза прайзы тоғысха нандырығлығ хайча тiпче ол. Ағаа хоза, Андрей Иванович Хакасиязар кил парарға хынча. Мындағы чон амыр, азых чӱректiг тiпче ол. Аның театры Ағбандағы чииттер ӧргезiнде ойыннарны удаа кӧзiтче. Мындағы кӧрiгҷiлер кӧңнiлерiн чазырбинчалар тiп таныхтапча режиссёр.
«Наследники» спектакль орыс тiлiнең iкi часча парча. Аның пастағы кӧрiгҷiлерi ойын тооза тосханҷа хатхырғаннар. Олар режиссёрны паза артисттернi пу оой нимес туста чӱректерiн часхыр пирген ӱчӱн чылығ сӧстернең алғыстааннар.
Сом Акай Албычаковти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
