Илиморзар чол чабых
30.04.2026
Хабарлар
Кӱн сурии. Хакасияҷа ГИБДД искіриинең, Ӱс чул – Илимор чолның кизегін суғ таллабысханнаңар, аныңҷа чӧрҷең оңдай чоғыл. Чол чабых
«Хакас чирі» республика газетазы сағыбаан киректі чох идерінҷе хайдағ тоғыстар толдырылчатханын чарыт пирерге Асхыс аймааның Ӱс чул аал чӧбі пазы Занета Ултургашевазар айланған. Аал чӧбі пазы искіриинең, Ӱс чул – Илимор чол аймахтың чолларына кірче, аннаңар таллалған чолны тыхтирынҷа прай тоғыстарнаң Асхыс аймааның устағ-пастаа айғасча. Киректі хайығда тудып, аймах устағ-пастааның, прокуратураның, ГИБДД-ның кізілері штаб чыылиин иртірче. Аал чӧбі Тӧӧ суғ синін хайығда тутча.
– Пу хысхызын Ӱс чул аал ӧтіре ахчатхан чулыҷах тасхан, ол хости турчатхан тураларға суғ кірерінең хорғыс ағылған. Піс аннаң тоғыр тоғыстарны толдырғабыс. Амды Тӧӧ суубыс хайнабысты, – тіпче Занета Ананьевна. – Алында андағ киректер полҷаңох. Че халғанҷы чылларда часхы суғ иптіг ине халҷаң. Пӱӱл тайғада хар чахсы чағаннаңар, суғ ідӧк пілдірте кӧдірілче. Ағаа хоза тайға суу наа ла иніп пастабысты. Мының соонда паза пір салғах поларын сағыпчабыс. Аннаңар штаб чыылиинда Ӱс чул – Илимор чолның сайбалған кизегінде тыхтағ тоғыстарын толдырарға маңзырабасха чарадылған. Сағам аймах устағ-пастаа Хакасияның инженер арачыланыс пӱдіріглері устанызынаң хада ол тоғыстарға смета-проект пічіктерін тимнепче паза хорадығларға ахча тілепче. Пӱӱнгі кӱнде пос ахчазы чоғыл, аны прайзы пілче. Аннаңар сурығны пір хати саңайға пӧк саларға чарадылған. Чолны ӱр нимеске тыхтабасха, суғ позына салып алған орында улуғ труба салып, ағаа иртчең орын тӧстеп, тиксі тыхтирға киректелчеткенінең прай кӧстегліг ӱлгӱ органнары чарасхан.
Чоохтирға кирек, Илимор аал чуртағҷылары Ӱс чул – Илимор чол сайбалған ӱчӱн, аалдаң сых полбин одырбинчалар. Оларның Кызлас аалзар чол пар, ідӧк чуртағҷылар, Политов аалҷа парып, Индіркі Тӧӧзер сығып алчалар. Анда чол хомай даа полза, ол Ағбан – Ах тобырах чолынзар сыхчатхан иң чағын чол, аннаңар чуртағҷылар аннаң удаа тузаланчалар.
Пу тынағ кӱннерінде ізіг кӱннер турары кӧрілче, аннаңар Хакасия правительствозы, город-ааллар пастары суғ кӧдірілерінең, ӧрттер сығызынаң хорғыстар парынаңар сизіндірчелер. Узах чолға сыхчатса, хайди даа орындағы хабарларнаң таныс турыңар.
ГИБДД кӧзідии:
Кӧзідіг ГИБДД сайтынаң алылған
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
