Сарима Асочакова паза Светлана Дударева хакас тілінің иң артых ӱгретчiлері!
29.04.2026
Хабарлар
Хакасияның ӱгредіг паза наука министрі Анатолий Бутенко марығның финалына сыхханнарнаң хада: Алевтина Карамчакова, Вера Шулбаева, Сарима Асочакова, Светлана Дударева, Виктория Сагатаева паза Вера Чебодаева
Марығ. Пу наада хакас тiлi программазынҷа ӱгредiг апарчатхан ӱгретчiлер паза воспитательлер марииның республика синi ирткен
Пӱӱл анда 18 кiзi араласхан, оларның аразында читi воспитатель, пасталығ класстарның алты ӱгретчiзi, хакас тiлiнiң паза литературазының тӧрт ӱгретчiзi. Iдӧк пӱӱл пу марыға ортын профессиональнай ӱгредiг организациязының ӱгретчiзi пастағызын на хозылған. Лариса Аскаракова Харатастағы отрасльлар технологиялары техникумында студенттернi хакас тiлiне ӱгретче.
Марығның финалына кибiрли ӱс ӱгретчi Виктория Сагатаева, Светлана Дударева паза Вера Чебодаева паза ӱс воспитатель Алевтина Карамчакова, Сарима Асочакова паза Вера Шулбаева сыхханнар.
Алевтина Карамчакова Асхыстағы «Чахайах» олған садында iстенче. Алевтина Алексеевна тоғызына чайаачы оңдайнаң хайча. Ол олғаннарны тiлге мозаика пастыра ӱгретче. Тоғыс ағаа часка, хыныс ағылча. Сарима Асочакова Ағбандағы «Дашенька» олған садында воспитатель полып тоғынча. Сарима Романовна пӧзiк чидiглерiнең cабланча. 2021 чылда Ағбан городтың сыйиина турысхан паза «Чыл кiзiзi» ат алған. Ол iдӧк профессиональнай марығларның тӧреміл араласчызы полча, сыйыхтарға турысча. Вера Шулбаева Ағбандағы «Кристаллик» олған садында iстенче. Вера Юрьевна палаларны хакас тiлiне наа технологиялар пастыра ӱгредерге кӱстенче. Аның занятиелерi хынығ паза тузалығ иртчелер.
Виктория Сагатаева Ағбандағы 32№ школаның пасталығ класстар ӱгретчiзi полча. Виктория Викторовна ӧсчеткен тӧлнiң таңдағызынаңар сағыссырапча, аның ӱчӱн хакас тiлiн тилiдерге кӱстенче. Светлана Дударева Н.Ф.Катановтың адынаң хакас национальнай гимназияда хакас тiлiн паза литературазын апарча. Светлана Михайловна «Iҷе-паба тiлi – тӧреен тiлiм» хыйғыға тудынып тоғынча. Ол олғаннарны пос тiлiне кӧнiктiрер кӧп тоғыс апарча. Вера Чебодаева Н.П.Князевтiң адынаң школа-интернаттың филиалы полчатхан Улуғ Ноныптағы школада iстенче. Вера Максимовна ӱгредiг киреенде 24 чыл iстен парир. Ол уроктарын аймах оңдайнаң апарарға кӱстенче. Олғаннар аның хакас тiлi паза литература уроктарына хынып чӧрчелер. Iдӧк улуғ опыттығ ӱгретчi профессиональнай марығларда тӧремiл араласча.
Чоохтирға кирек, финалға сыххан ӱгретчiлер паза воспитательлер прайзы чииттер, чапчаңнар, хыйғалар, абахайлар. Олар прайзы даа хаҷан-да Н.Ф.Катановтың адынаң хакас филология кафедразын тоосханнар. Хайди таныхтаан кафедра устағҷызы Марина Медведева, хаҷан-да ХГУ-да ӱгренген студенттер, устарын тилiдiп алып, амды профессиональнай марығда араласчатханын, оларның ӧсчеткенiн кӧрерге уғаа поғдархастығ паза ӧрiнiстiг. Аннаңар мыннаң мындар хакас тiлiн саблирға, аны ӧңнендiрерге чоллары азых ползын, кӱстерi читciн, пик хазыхтығ ползыннар.
Чарғыҷылар санына кiрген Нина Челтыгмашева марығ тӧстегҷiлерiн килчеткен чылда пу марыға ӱгретчi-иреннернi тартарға хығырған паза ӱгретчiлер Вера Чебодаеванаң Виктория Сагатаеваа «Виктор Зиминнiң адынаң чыындызынаң» ахчалығ полызығ читiрген.
«Хакас чирi» республика газетазының ӧӧн редакторы, филология наукаларының кандидады Радион Сунчугашев чиит воспитательлерге паза ӱгретчiлерге профессияда пӧзiк чидiглерге чидерге алғаан паза, хайдағ даа пӧзiк ӧс парзалар, «Хакас чирi» газетаа пазынарға ундутпасха сизiндiрген. Iдӧк Радион Дмитриевич оларға сыйыхтар читiрген.
Хайди таныхтаан чооғында Хакасияның ӱгредiг паза наука министерствозының национальнай ӱгредiг паза наука пӧлиинiң устағҷызы Ольга Доможакова, чылдаң чылға марығда наа методикалар кӧрiп аларға чарир.
– Пӱӱл пiс «Нейро ойыннаң» танысхабыс, iдӧк «Колорама» ниме полчатханын пiлiп алғабыс. Ӱгредiге мындағ хынығ технологиялар кирiп, пiстiң воспитательлер палаҷахтарны хакас тiлiне ниик оңдайнаң ӱгредерге кӱстенчелер, – теен Ольга Васильевна.
Ӱгретчiлер аразында иң артых Светлана Дударева полыбысхан. Чиит ӱгретчi Хакас гимназиязар, ХГУ-ны тоозып, тоғынарға килген. Анда ол алты чылҷа iстен парир. Воспитательлер аразында Сарима Асочакова чиңiс тутхан, iдӧк «Народное признание» интернет пастыра ӱн пирic чиңiсчiзi полча. Сарима Романовна 10 чыл азыра олған садында тоғынча. Нинҷе-де чыл мының алнында пу марығда аралазып, республика синiнде иң артых полыбысхан, Россия синiне сыххан. Анда ол алынҷа номинацияда сыйыхтығ орын алған.
Хакасияның ӱгредiг паза наука министрi Анатолий Бутенко чиңiсчiлерге Россия синiнде Хакасия адын турыстыра кӧзiдерге алғаан паза андар тимненерге ахчалығ сертификат читiрген. Марығның халғанҷы чардығы пӱӱл кӱскӱзiн Липецкте иртер.
Хазнада пос тiлiн апарчатхан ӱгретчiлер марииның тархыны 2009 чылда пасталған. Хакасияның ӱгретчiлерi анда сыбыра араласчалар. Республика паза Россия синiнде постарын турыстыра кӧзiт пирiп, сыйыхтығ орыннарға турысханнар Мария Кызласова (Кызлас аал), Лариса Чекурова (Ӱс чул аал), Рустам Канзычаков (Калинин аал), Игорь Албычаков (Ӧӧк пилтiрi аал), Кира Сагалакова (Асхыс аал), Светлана Кочелакова (Хызыл хара суғ аал), Клавдия Чебодаева (Алахтайлар аалы), Наталья Трунова (Ағбан город), Елена Сагатаева (Хакас национальнай гимназия), Надежда Сагалакова (Киндiрлiг пилтiрi аал), Вера Чепчигашева (Ӱс чул аал), Егор Мамышев (Чарков аал), Светлана Чебокчинова (Асхыс аал), Тарика Албычакова (Ағбан город), Татьяна Казанаева (Хакас национальнай гимназия) паза даа пасхазы.
Марығны Хакасияның ӱгредiг паза наука министерствозы устаанынаң республиканың ӱгредiг тилiзiнiң паза квалификация кӧдiрерiнiң институды иртiрче.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
