Хакасияның прай город-аалларынҷа парарлар
29.04.2026
Хабарлар
Чорыхха сыхчатхан автомобильлер
Автомобильлер чӧрізі. Ағбандағы Чиңic паркындағы Чааҷылар сабланызы мемориал хыринаң Илбек Ада чаа тоозылғанына, iдӧк Россияның чоннары пірікчеткен чылға чарыдылған автомобильлер чӧрізі чорыхха сығыбысхан
Чыл сай республикада Илбек Чиңic кӱні алнында Ағбаннаң автомобильлер колонназы город-аалларҷа чорыхха сыхча. Кибірге кір парған оңдайнаң анда ветераннар, Хакасияның министерство-ведомстволарының, регионның чааҷы комиссариадының, ДОСААФ-тың республикадағы пӧлиинің, чаа-патриот клубтарының паза чииттер чӧрімнерінің кізілері араласчалар.
Тӧрт кӱн аразына автоколонна Хакасияның город-аалларынҷа пір муң азыра километр иртер. Пастағы кӱнде колонна, Ағбаннаң сығып, Алтай аймааның Хубачар аалынҷа иртер, Саяногорскта, Харатаста пол парыбызар. Iкінҷі кӱнiнде – Пии, Асхыс, Таштып аймахтарында, Абазада. Ӱзінҷі кӱнінде колонна Сорығ городсар чидер, Ағбан пилтірі аймаандағы аалларҷа парар. Тӧртінҷі кӱнiнде Боград паза Шира аймахтарындағы аалларҷа иртер. Полған на орында автоколоннаны пайрамни удурлирлар, хумартхы тастарзар, обелисктерзер чахайахтар саларлар. Ағаа хоза, ӧсчеткен чиит тӧлнің иң артыхтарын юнармеецтерге аларлар.
Чиңic паркы алнында ДОСААФ-тың ікi «Урал» автомобильі паза улуғ автобус чорыхха тимде турчатханнар. Машиналар ӱстӱнде Россияның, Хакасияның, Чиңic паза Россияның Чаа-тархын пірігізінің флагтары чилге чалбырапчатханнар, борттары баннерлернең чазалғаннар, оларда «Чиңicчі чонға – сабланыс!», «Чиңicчі чон!» пазылых.
Россияның паза Хакасияның гимннері толдырылған соонда, чыылған чон алнынзар чааҷылар паза юнармеецтер Россияның, Юнармияның флагтарын строевой хаалағнаң ағылғаннар. Сӧс Хакасия пазының орынҷызы Владислав Мингелаа пирілген. Ол теен:
– Аарлығ ветераннар, республика чуртағҷылары паза аалҷылар, чааҷылар, чииттер! Пӱӱн піс Илбек Чиңicке паза Россияның чоннары пірікчеткен чылға чарыдылған автомобильлер чӧрізін мыннаң позытчабыс. Пістің ветераннарыбыстың саны хызырылып ла одырча, тус оларға айабинча. Пістің пӧгінібіс – оларны ундутпасха, амғы чорыхтың полған на километрі оларға чарыдылзын. Олар Илбек Чиңic тутханнар, фашисттернің концлагерьлерiн ирткеннер, амғы чааҷылар ӧнетін чаа операциязында нацизмнең, бандеровецтердең тоғыр кӱрезіг апарчалар. Мында ӧсчеткен чииттерні кӧрерге ӧріністіг. Ӧбекелерібістің махачыланызын турыстыра апарыңар! Прайзын чағдапчатхан Чиңic кӱнінең алғыстапчам. Автомобильлер чӧрiзін пастирға чахығ пирчем!
Митингте iдӧк чоох тутханнар республиканың Ветераннар чӧбі кнезінің орынҷызы Василий Будылин, Ағбандағы паза Хакасиядағы епархияның протоиерейi Александр Ильин паза ДОСААФ-тың Хакасиядағы пӧлии кнезінің тоғызын толдырчатхан Айдыс Сат.
Аның соонда стройда турчатхан юнармеецтер Чир-суубысха хынарға, патриот поларға, Юнармияның пӧгіннерін сыбыра чахсы толдырарға сӧс пиргеннер. Владислав Мингела, Василий Будылин, Айдыс Сат, Александр Ильин паза Хакасияның культура министрі, Россияның Чаа-тархын пірігiзінің региондағы пӧлиинің кнезі Светлана Окольникова полған на юнармеецке Юнармияның танығларын (значоктарын) читіргеннер.
Илбек Ада чаадаң паза кизек чаалазығлардаң айланмааннарны сағысха киріп, пір минута сым турары чарлалған. Чааҷылар, автоматтардаң тигiрзер ӱс хати пір саңай атып, салют иткеннер. Чааҷылар сабланызы мемориал тӧзінзер веноктар паза чахайахтар салылған. Знамялар апарҷаң ӧмелер флагтарын строевой хаалағнаң апарыбысханнар. Митинг тоозылғанда, автомобильлер колонназы чорыхха сығыбысхан.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
