Чӱленҷең сетьтер палғапчалар, свечілер итчелер
29.04.2026
Хабарлар
Анна Шестакова
СВО-ға хабазығ. Таштыптағы 16 № ПУ-да «ДОБРОволец» волонтёр отряды пар. Андар кірчеткен ӱгретчілер паза студенттер социальнай полызығдаң пасха ӧнетін чаа операциязында араласчатхан чааҷы чир-суғҷыларыбысха хабасчалар. Олар хайдағ тоғыс апарчатханынаңар директорның воспитаниеҷе паза олған халых пірігістерінең хайызығларҷа чӧпчізі, волонтёр отрядының устағҷызы Анна Шестакова чоохтапча
Таштыптағы 16 № профессиональнай училищеде «ДОБРОволец» волонтёр отряды ӧнетін чаа операциязы пасталған чылдаң тоғынчаттыр.
– Отряд 2022 чыл соонзар тӧстелген, аның пастағы устағҷызы 16 № ПУ ӱгретчізі Елена Владимировна Верпетова полған, – чоохтапча Анна Ивановна Шестакова. – Анаң ол отряд минің холыма пирілген. Піс волонтёр тоғызынаң айғасчабыс, ол санда СВО-ға полызығнаң.
Ӱгретчілер паза воспитательлер студенттернең хада чӱленҷең сетьтер палғапчалар, ол кирекнең айғазарына училищенің общежитиезінде ӧнетін станок турғызылтыр. Андағ сетьтер СВО-да араласчатхан пістің чааҷыларыбысха уғаа киректер. Ідӧк производственнай ӱгредіг узы Елена Сергеевна Белялованың устаанынаң студенттер свечілер тимнепчелер.
– Мин ол чӧрімнең тиксі устирынаң айғасчам, – чарытча волонтёр отрядының устағҷызы. – Піссер СВО араласчыларының сӧбірелері дее айланчалар. Кӧзідімге, пӱӱн пістің олғаннар ӱӱҷікті арығлирға парыбысханнар. Оолғы СВО-да, пабазы кӧп чыл Гостехнадзорда тоғынған, пісте экзаменнер тӧреміл иртірҷең. Ол піссер айланған: «Полыс поларзар ба?» Хайди хабас пирбес, полысчабыс.
Ідӧк олар ветеран ӱгретчілерге полысчаттырлар. Полған на ӧменің андағ тынағдағы ӱгретчі пар осхас.
– Оларға хайдағ полызығ киректелчеткенін тӧреміл хайығда тутчабыс, – тіпче Анна Ивановна. – Ӧӧнінде кӱскӱ-часхы тустарында полызығ кирек полча. Ӱӱҷіктерні арығлабызарға, одың тимнеп пирерге.
Таштыптағы аал чӧбі оларзар полызығ сурап ідӧк айланча, аалда чалғыс чуртапчатхан улуғ частығлар, істеніс ветераннары пар. Аал чӧбінде тоғысчылар кӧп нимес, аннаңар олар волонтёр отрядынзар сурыныснаң айланчалар.
– Аннаңар пістің тоғынчатхан отряд, піс волонтёр тоғызыбысты тохтатпинчабыс, – искірче ол. – Прайзы пілче, полызығ киректелчетсе, піссер айланарға чарир. СВО-ға хабазығдаңар чоохтаза, піс Таштып аймааның КСВО-зынаң (Ада чир-суубыс чааҷылары сӧбірелерінің комитеді) паза Хакас Республиканың КСВО-зынаң хада тоғынчабыс. Людмила Иосифовна Круговых пістің чир-суғҷыбыс, ол Таштып аймаандағы комитеттің паза олох туста республикадағы КСВО-ның устағҷызы полча.
Чӱленҷең сетьтер палғирға аймахтың чуртағҷылары полысчалар – материаллар пирчелер, ахча чыыпчалар.
– Свечілерні, тізең, піс прай позыбыс кӱзінең тимнепчебіс, – чоохтапча Анна Шестакова. – Піс парафин садызып алчабыс, торымнарны чыыпчабыс. Мының алнында пастағы свечілерні картоннаң итчеңміс. Че олар, пістің чааҷыларның чооғынаң, тың ыстапча осхастар. Амды харағай торымнарынаң тузаланчабыс. Пастап оларны хурутчабыс, анаң тинте банкаларзар салчабыс, андарох кӧйҷең чіп салылча. Анаң парафинні, хайылдырып, андар урчабыс.
Ағаа хоза ӱгретчілер студенттернең хада, тайға оттарын чыып, аймах-пасха чейлер чыындыларын итчеттірлер. Ол чейлерні ярмаркаларда сатчалар, чыылған ахчаны ідӧк СВО-ға полызыға ысчалар.
«Чааҷаа пічік» чӧрім хоостыра Таштыптағы 16 № профессиональнай училищенің ӱгренҷілері СВО-да араласчатхан чааҷыларға пічіктер пасчалар. Училищеде ӱгренген чааҷылар палғалыстарны ідӧк ӱспинче осхастар. Отпуск тузында ааллап таа кил парчаттырлар.
– Кӧзідімге, ӱр ниместе Марк Щербаков кил парған, палығлатхан соонаң ибзер позыттырлар, – чоохтапча ӱгретчі. – Ол пістің училищеде ӱгренген, че тооспаан. 18 час тол парғанда, СВО-ға пос кӧңнінең парарға чарат салған. Ағаа академическай отпуск пирілген. Ол амды пазох «лента» озаринзар парыбысхан. Тиксі чоохтаза, пістің полған на ӱгретчінің, хайзы студент ӧмезінің кураторы алай мастері полған, андағ ооллар пар. Піс оларнаң тӧреміл палғалыс тутчабыс.
Таштыптағы 16 № ПУ-да Хумартхылас стенезі пар. Анда училищені тоосханнарның паза училищеде тоғынғаннарның сомнары ілілче – олар прайзы СВО чирінде чуртастарын пир салғаннар...
Хумартхылас стенезi
– Пу оол-иреннернің сӧбірелерін ӧӧн хайығда тутчабыс, – тіпче Анна Шестакова. – Оларға иң аар нооза. Прайзынаң тӧреміл палғалыс тутчабыс, пар кӱзібіснең полысчабыс.
Пу ӱгредіг чылында училищеде хумартхылас мероприятиезі ирттір. Прай студент ӧмелері істезігліг проекттер тимнееннер: чат халған чааҷыларның сӧбірелерінең тоғасханнар, оларның чуртас чолынаңар искіріглерні чығаннар. Анаң конференцияда олардаңар чоох тутханнар.
– Піс іҷе-пабаларны хығырып алғабыс, социальнай партнёрлар араласханнар, – ӱлесче «ДОБРОволец» волонтёр отрядының устағҷызы. – Таштып аймаа устағ-пастааның, Ада чир-суубыс арачылағҷылары чыындызының кізілері килгеннер. Мероприятие уғаа чӱрексіністіг ирт парған.
Аннаң пасха, Таштыптағы 16 № ПУ волонтёрлары «Чааҷаа посылка» чӧрімде тӧреміл ӧткін араласчалар.
– Ӧӧнінде хыйғы тастапчабыс: чааҷыларға иң кирек нимелерні чыырға, – чоохтапча Анна Ивановна. – Газ, сыхтығ салфеткалар. «Хан-Куль» суғ улуғ кирексіністе. Аннаңар КСВО-дағы хыстар чоохтааннар. Олар, ӧнетін чаа операциязы чирінзер парзалар, пасха регионнардағы оолларға «Хан-Куль» пирчелерӧк. Оларға суғ уғаа тадылығ пілдірче осхас, піди тіпчеттірлер: «Пістіңнерге чоохтирға кирек, «Хан-Куль» суғны тілезіннер, пасха суғ кирек чоғыл».
Таштыптағы училищедегі волонтёр чӧрімінің паза пір ӧткін араласчызы чиит ӱгретчі Вероника Васильевна Рабиханукаева полча. Аннаң хада ідӧк улуғ нимес чоох алызып алғабыс.
– Мин тиксі «Чиңіс волонтёрлары» Россиядағы халых чӧрімінің араласчызы полчам, – чоохтапча ол. – Ол тархындағы хумартхыласты хайраллирынаң айғасчатхан чӧрім. Мин Хакас региондағы пӧлиинің пресс-хачызы полчам.
Училищедегі студенттер «Чиңіс волонтёрлары» халых чӧрімінің Таштыптағы пӧлиинең пірге тоғынчалар, аймах-пасха акцияларда араласчалар.
– Ӱр ниместе «Хызыл гвоздика» чӧрімде араласхабыс, – тіпче Вероника Васильевна. – Ол акция Илбек Ада чаа ветераннарына полызарына ахча чыыр кӧстегліг. Тӱрчедең «Георгиевскай лента» чӧрім иртірербіс. Паза піс «Чиңіс кӧзенектері» акцияны иртірерге тимненіп пастабысхабыс. Чиңіс кӱні чағдап килир, аннаңар тоғыс кӧп.
Сомнар авторни паза Таштыптағы 16 № ПУ архивінең
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
