Ӧрттер сығары паза суғлар тазары – сыбыра хайығда
24.04.2026
Хабарлар
Чыылығ. Хакасияның сағыбаан саайларны сизіндірерінҷе паза чох идерінҷе, ӧрттердең хорғыс чох поларын тӧстирінҷе комиссия суғлар тасчатханын паза чазылар кӧйчеткенін хайығда тутча
Пу неделяда Хакасия пазының орынҷызы Дмитрий Бучениктің устаанынаң комиссияның теестегі чыылии ирткен. Кӱн суриина Абазада суғ тасханы паза аның салтарлары, ӧрттернең киректер хайди парчатханы паза муниципалитеттерде чазы ӧрттерінең кӱрезіг оңдайлары ӱзӱрілген. Аннаң пасха, сілкер айындағы тынағ кӱннерiнде ӧрттердең хорғыс чох поларына алынҷа хайығ айландырылған.
Чыл пасталғаннаң республикада 649 ӧрт сығысхан, ол санда чир-чайаанда 160 ӧрт. Ӧрттерде 14 кізінiң чуртазы ӱзілген, 11 кізі палығлатхан. Чир-чайаандағы ӧрттер саны ирткен чылның пуох тузынаң 7 %-ке асхынах саналча, че тиксі Хакасияҷа килкім ӧрттер ам даа санға алылчалар. Иң кӧп ӧрт сығысханы саналча: Ағбан пилтірі аймаанда – 41 ӧрт, Харатаста – 33 ӧрт, Ағбанда – 27 ӧрт.
Муниципалитеттер пастарына город-аалларны паза ибіркі чирлерні манёвр, патруль-манёвр, патруль, патруль-сыныхтағ ӧмелері сыныхтап чӧрерін тыыдарға, чир-чайаанда сығысхан ӧрт ілезіне сығарылзох, аннаңар сағба пирерге чӧп пирілген. Уламох город-аалларда, хайда ӧртті ӧнетін сығарчатханы іле таныхталча. Андағ сайбағҷыларны тудары паза ілезіне сығарары толдырығлығ ӱлгӱ органнарының паза право хайраллаҷаң органнарның алынҷа хайиинда тудылча. Ӧрттердең тоғыр алынҷа режим кирілген туста город-аймахтар устағ-пастаана сӧп-сапты чыы тартчатса паза чир-чайаанда тынанчатса, азых отнаң тузаланарға чарадылбинчатханнаңар чоннаң тоғыс апарарға киректелче.
Пӱӱнгі кӱнде республикада ағын суғлар азылчатханынаң палғалыстығ суғ тазарының ікінҷі чардығы тоозылча. Абаза городта суғ кӧдірілчеткені алынҷа хайығда тудылған. Анда 11 хосхарда 7 километрге пус тығылыс парған. Аның сылтаанда «Лесник» паза «Черемушки» дача пірігістерінде тиксі 241 чир участогы суға кір парған. Городха суғ кірбеен. Пис кізі кӧзірілген. Город устағ-пастаа сағыбаан саай режимін кирген.
Пӱӱнгі кӱнде пус тығылысханы пос алынҷа чох иділген паза хорғыс ағылбинча, суғ cин парған, дача участоктарынаң суғ ідӧк парыбысхан.
Алнында, тізең, суғ тазарының ӱзінҷі чардығы сахталча. Ол Хакасияның тағларында, тайғаларында хар хайыларынаң палғалыстығ. Кирек тӧреміл хайығда тудылча.
Чыылығ регионның сағба пирҷең системазының тоғызында чахсы салтарлар кӧзіткен, чӧптіг паза чапчаң тоғынған ӱчӱн, Хакасияның информатизация паза наа технологиялар кінінің тӧрт тоғынҷызына алғыстас пічіктерін читірерінең тоозылған.
Сом Хакасия правительствозының пресс-службазыни
Автор :
Хакасияның ГО, ЧС паза ПБ хазна комитедінің пресс-службазы
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
