Олар таңда Чир-суун сабға сығарарлар
24.04.2026
Хабарлар
«Шейк» ансамбль «Родина-мать» теелбекті толдырча
Чайаачы иир. В.Г.Чаптыковтың адынаң Хакас филармониязында Хакасияның искусство колледжiнiң ӱгретчiлерi паза студенттерi «Пiстiң Чир-суубыс – Сибирь» сан пирiстiг концерт кӧзiткеннер
Кӧрiгҷiлер залына кiзi илееде чыылысхан, олар – студенттернiң туғаннары, арғыс-ӧӧрелерi паза сiлiг кӧглернi истiп аларға сағынчатхан чуртағҷылар. Чайаачы иир Россияның чоннары пiрiкчеткен чылға паза Хакасия чоннарының ынархазы чылына чарыдылған. Аны республиканың культура министрi Светлана Окольникова асхан.
– Пӱӱн пӧзiк устығ ӧмелернi паза кӧгҷiлернi истiп аларбыс. Хакасияның искусство колледжi ол олаңай ла ӱгредiг заведениезi нимес, iдӧк ол республиканың культуразына кӱстiг специалисттер тимнепче. Чииттер, улуғ опыттығ ӱгретчiлернiң холында ӱгренiп, соонаң тiспен тоғынып, тӧреен чир-суун тилiдерлер, сабға сығарарлар, – таныхтаан министр.
Iдӧк Светлана Окольникова чахсы хабарнаң ӱлескен. Хакас искусство колледжiнiң студенттерi, тиксi Россиядағы джаз ӧмелерi аразында иртiрiлген марығда аралазып, чиңiстiг орынға сығып алғаннар. Чоох «БигБэнд» ӧмедеңер парча. Аннаң Хакасия искусствозының саблығ деятельi Евгений Лях устапча. Пiстiң чиит музыканттар хазыр марығда постарын турыстығ кӧзiт пиргеннер. Тиксi хазнадаң 2000 азыра айланыс кiрген, че 103 ӧме ле чиңiсчiлер санына кiрiп алған. Амды 9 – 13 хандыхта Хакасияның студенттерi Москвадағы джаз фестивальында аралазарлар.
Анаң Хакасияның культура министрi, ӱр чыллар тiспен тоғызы, республиканың культуразына улуғ хозымы ӱчӱн, искусство колледжiнiң ӱгретчiзi, хакас кӧг тирiглерi оркестрiнiң устағҷызы Вячеслав Албычаковты Хакас Республиканың Аарластығ пiчиинең таныхтаан.
– Вячеслав Вадимович сынап кӱстiг ӱгретчi полча. Аның устаанынаң хакас кӧг тирiглерi пӧлии кӧрiндiре ӧсче. Пӱӱнгi кӱнде пу пӧлiксер кiрiп аларына улуғ марығ парча.Чахсы устың холында ӱгренерге поғдархастығ, – теен министр.
Вячеслав Албычаков Асхыс аалда тӧреен-ӧскен. Андох музыка школазында баян клазын тоосхан. 1998 чылда Ағбандағы музыка колледжiнзер хакас кӧг тирiглерiнең ойнирға ӱгренерге килген. Аның соонаң пӧзiк ӱгредiг алған. Ол саблығ «Ӱлгер» ансамбльда ӱр чыллар тоғынған. Ам «Хайджи» ӧменiң ӧткiн араласчызы полча. 2008 чылдаң сығара чайаачы студенттернi чатханнаң, хомыснаң, ыыхнаң ойнирға ӱгретче.
Iдӧк сан пирiстiг чайаачы иирде искусство колледжiнiң ӱгретчiзi Галина Крыловаа, ӱр чыллар тiспен тоғызы паза Хакас Республиканың культуразында паза искусствозында кӱстiг ӱгредiгнi кӧдiрчеткен ӱчӱн, Хакасия пазының алғыстазы читiрiлген.
Концертте чиит кӧгҷiлер, теелбекчiлер паза оларның ӱгретчiлерi махалығ устарын кӧзiткеннер. Чайаачы иир тиктең нимес, Россияның чоннары пiрiкчеткен чылға чарыдылып, «Пiстiң Чир-суубыс – Сибирь» адалған. Кӧрiгҷiлер залында одырчатхан аалҷылар хакас, орыс, тува паза алтай чоннарның кӧг искусствозынаң iкi час ӧкерсiнгеннер.
– Хакасияның искусство колледжiнде хызым Ирина Араштаева ӱгренче. Пiс позыбыс Таштыптаңмыс. Хызым школада ӱгренчеткенде, Культура туразынзар театр кружогына чӧрген. Аның ӱчӱн 9 класс соонаң Ағбандағы искусство колледжiнзер режиссёрға ӱгренерге кiрiбiскен. Ам iкiнҷi курс тоос парир. Пӱӱнгi концертте «Тiрiг сӧс» театр мастерскойының араласчыларынаң хада улуғ нимес ойын кӧзiттi, – кӧңнiнең ӱлескен кӧрігҷі Сталина Араштаева.
Сом Антон Литвиненкони
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
