Хайызығлар наа проекттернең тыыдылар
24.04.2026
Хабарлар
Хакасия пазы Валентин Коновалов паза Хыдат Чон Республиказының Иркутск городтағы ӧӧн консулы Лю Юй В.И. Лениннің хумартхызына чахайахтар салчалар
Тоғазығ. 22 хосхарда Хакасияда Хыдат Чон Республиказының Иркутск городтағы наа турғызылған ӧӧн консулы Лю Юй пастағызын на ааллады
Иң пастап Хыдат Чон Республиказының Иркутск городтағы ӧӧн консулы Лю Юй, Хакасия пазы Валентин Коноваловнаң тоғазып, хада-пірге тоғынар, хайызығларны уламох тыыт полар кӧстеглерні ӱзӱрген. Тоғазығда ідӧк Россия МИД-ының Хызылчардағы кізізінің тоғызын толдырчатхан Денис Макин паза Хакасияның экономика тилізі министрі Роман Ковтун араласханнар.
Хакасия пазы Валентин Коновалов ӧӧн консулға, пістің регионға хайығ cалып, ааллап килген ӱчӱн республика чуртағҷылары адынаң алғызын читірген паза чооғында Хыдат Чон Республиказының паза Россияның чӧптіг хайызығлары сылтаанда Хакасия Хыдатнаң ідӧк тӱзімніг тоғынчатханынаңар искірген. Анзын Хакасияның пасха хазналарнаң апарчатхан садығ сині киречiлепче. Тиксі айланыстың пизінҷі чардығы Хыдатха килісче. Пістің чирдең Хыдат хара тасты, алюминийні, тайға чистектерін, мискелерні паза хузухты, хой тӱгін, тадылығ чиисті паза изірткі чох сӱзӱннерні хынып алча, піс, тізең, Хыдаттаң – химия ниме-ноозын, промышленность тиріглерін паза пасхазын Хакасия правительствозы Хыдаттың провинцияларынаң хада-пірге тоғызына алынҷа хайығны салча. Іди 20 чыл азыра Хэйлунцзян провинциянаң хада садығ-экономика паза культура кӧстеглерінҷе хада-пірге тоғынардаңар чӧптезіг тоғынча. Аннаң пасха культурада, ӱгредігде паза наукада хайызығлар тыып турча. Хакасияның паза Хыдаттың чайаачы ӧмелері, удур-тӧдір ааллас чӧріп, культура мероприятиелерінде араласчалар.
Лю Юй Хакасия пазынаң чарасхан паза мыннаң мындар амғы хайызығларны алғыдар оңдайларны хоза адап пирген. Ӧӧн консулның кӧрізінең, аал хониинда, ниме-ноо тимнирінде, ас-тамах промышленнозында, ідӧк туризмде, хада-пірге тоғынып, наа проекттерні чуртасха кирерге чарир. Ангара – Ким макрорегиондағы ӧңніг, ас паза арам учурапчатхан чирдегі металлардаң ниме-ноо сығарызының кластерін тӧстирінде Хакасия араласчатханы хыдаттарның хайиин тартча. Аннаңар хайзы даа сари пу килкім экономика проекті чахсы оңдайлар пирчеткенінде ікінҷілебеен.
Тоғазығны тоозып, Хакасия пазы Валентин Коновалов Хыдат Чон Республиказының Иркутск городтағы ӧӧн консулы Лю Юйға, пістің республиказар чорых сағыста халған ӱчӱн, орындағы оттар чейін паза сыын идінең тимде ас-тамахты читірген. Аалҷыбыс ідӧк пос сыйиин читірген.
Таныхтирға кирек, Хыдат Чон Республиказының Иркутск городтағы ӧӧн консулы Лю Юйның Хакасиязар чорығы 22 хосхарға, В.И.Лениннің тӧреен кӱніне, киліс парған. Владимир Ильич 1870 чылда тӧреен. Ол тиксі тилекейнің аймах хазналарында социализм политиказының тӧстегҷізіне саналча. Хакасияда ӱлгӱ партиязы КПРФ полчатханы аны Хыдат Чон Республиказына ідӧк чағын итче тирбіс, тигір алтындағы хазнада ӱлгӱ партиязы iдӧк коммунистическай партия полча. Мындағ танығлығ кӱнде КПРФ-тың орындағы пӧлии Пастағы май ачығында турчатхан В.И.Лениннің хумартхызына чыл сай чахайахтар салча. Пӱӱл ол кибірге хыдаттағы аалҷылар хозылғаннар.
Олох кӱн хыдат аалҷыбыс, Хакасиянаң танызарын узарадып, Ирт тағдағы мемориал комплексінде паза Л.Р.Кызласовтың адынаң Хакас национальнай чир-суғ ӱгренҷең музейде пол килген.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
