Полған на пасты санға турғызарға!
22.04.2026
Хабарлар
Пос хоныхтарында малларны санға турғызары – ӱлгӱ хайиинда
Чыылығ. Хакасия правительствозында кӧстегліг министерство-ведомство кізілері республика пазы Валентин Коноваловтың устаанаң пос хоныхтарның сын мал пазын санға турғызарын ӱзӱргеннер
Хомзынысха, халғанҷы чылларда мал ӧскірчеткеннер, чуғынҷах мал ағырығлары тарапчатханнаңар, улуғ ӱреге кір парчалар. Пір ағырығ соонаң хоныхтар, кӱс алынып, мал санын хозып аларға маңнанминчалар, хонҷых регионнарда наа чуғынҷах тарапчатханы истіле тӱсче. Андағ киректер федеральнай сыныхтағ органнарының хайии чох халбинчалар. Істезіглер кӧзітчелер, хайда хоных ээзі санитар паза ветеринар кирексініcтеріне тудынминча, малларның чардығын чазытта тутча паза прай тоғынҷыларын пічік чох тоғындырча, аннаң сығара аймах ағырығлар сығысча паза тарапча. Андағ читпестер чонға ас-тамах читкіҷе сығарызына хорғыс ағылбас ӱчӱн, оларны тиксі чох идерге киректелче. Андағ искірігнең пу чыылығны пастаан Россельхознадзорның Хакасия паза Тыва республикаларҷа устанызының устағҷы орынҷызы Геннадий Ульчугачев.
Андағ оңдайнаң сыныхтағҷылар амды ӧӧн хайығны пос хоныхтарына айландырчалар. Ноға? Хакасияда пос хоныхтарында мал пазын сурап, айланыстар республиканың город-аймахтарының паза аал чӧптерінің устағ-пастаанзар ызылған. Оларның искіріглері мал имнее службазының искіриинең пасхалалғаннар, піреезі, тізең, орта сан ыс полбаан. Анзы маллар читіре санға турғызылбинчатханын киречілеен. Кӧзідімге, аал чӧбінде похозяйственнай киндеде iкi ле пас санға турғызылған, хоныхта, тізең, 25 пас саналча. Итсе, пос хонии ээзі малларны позы санға турғызарға кирек. Аал чӧбінде апарылчатхан похозяйственнай киндедең пасха, тиксі хазнада «Хорриот» система тоғынча. Мал ээзі наа пасты, маркировка иртіріп, пис кӱн аразына ол системаа кир саларға кирек: хайда тӧреен-ӧскен, кемнең садысхан паза пасха искіріг кирілче. Андағ оңдайнаң, малның садыға читіре хайда ӧскірілгені хайығда тудылча. Че системаа искірігні ам даа прайзы кирбинче.
Ағаа хоза, 2024 чылдаң пасти Хакасияда нинҷе-де пос хонии мал имҷілерін дее, пасха сыныхтағ органнарын даа хазааларынзар кирбинче. Олар малларына чуғынҷахтардаң вакцина турғыстырбинчалар. Ағырығларға сыныхтаттырбинчалар. Хоныхтарның мал иді, сӱт ас-тамаа, тізең, садыға сығарылча. Малларның пасха аймахтарзар, регионнарзар садылчатханы ідӧк хайығда тудылбинча.
Хакасияда 27 азығдаң пасти пӧзік тимненіс режимі тоғынча, ол республиказар малларның хорғыстығ ағырығларын кирдірбезінең палғалыстығ. Боград аймаанда мал имнее сыныхтаа тоғынча, хайда хадағда турчалар мал имнее службазының, ГАИ-ның паза Россельхознадзорның тоғынҷылары.
Геннадий Юрьевич республика пазынзар сыныхтағ тоғыстарында БПЛА-наң тузаланарға чарадығ аларына хабас пирерге, муниципальнай пӱдістерге пос хоныхтарда малларны санға аларын алынҷа хайыға аларға чахирға сурыныстарнаң айланған.
Хакасия пазы Валентин Коновалов Россельхознадзорның Хакасия паза Тыва республикаларҷа устанызының искірии соонаң республика паза аймахтар синінде пос хоныхтарында малларны санға аларынҷа тоғыcчы ӧме тӧстирге чахаан. Аннаң республика пазының орынҷызы Михаил Побызаков устир.
Паза пір сидік сурығ: пос хониина мал ӧскіреріне 2,5 гектар чирнең тузаланарға чарир. Анзы федеральнай законда пазыл парған, че «Пос хониинаңар» законда нинҷе пас малны мындағ кӧрімніг хоныхта ӧскірерге чарадылчатханы пазылбаан. Салтарында фермер хоныхтары, хайда інектер ле саны 100 пасты ас парыбысча, пос хонии кӧріміне кірібісчелер. Мал саны законда кӧзіділбееннеңер, право хайраллаҷаң органнар хоныхтарны хатығлап полбинчалар. Мындағ кирекнең кӱресчең оңдайларның пірсі – мал имҷілеріне малларын санға турғыспаан хоныхтарға ит садиина пір дее чарадығ пічіктерін пирбин турарға. Пу сағыстарнаң ӱлескен Асхыс аймаа пазының тоғызын толдырчатхан Евгений Костяков паза чарасхан Ағбан пилтірі аймаа пазы Елена Егорова.
Таныхтирға кирек, Хакасия чуғынҷах дерматит соонаң маллар санын ағырығ тараан алнындағы кӧзідіглерге ам даа читіргелек. Аймахтар пастары, пос хоныхтарда маллар санын тиксі сыныхтап, санға турғызар тоғысха хозыларға паза пу сурығҷа тоғыс ӧме тӧстирге тимделер.
Сом Илона Каковани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
