Хада-пiрге тоғынғаны чонны пiрiктiрче
17.04.2026
Хабарлар
СВО ветераннары Алексей Саражаков паза Цырен Димчиков паркты сӧп-саптаң арығлапчалар
«Ынағ чон – кӱстіг хазна». Пу наада Ағбан городтың Культура паза тынағ паркында «Ада чир-суубыс арачылағҷылары» чыындының Хакасиядағы пӧлии «Кӱстенiстернi пiрiктiрiп: хумартхылас паза пiрге тудынар ӱчӱн» субботник иртiрген
Ол Россияның чоннары пiрiкчеткен чылға паза Хакасиядағы чоннарның ынархазы чылына чарыдылған. Мындағ субботниктi иртiрерi республиканың ӧӧн городында кибiрге кiр парған тирге чарир. Анда республика правительствозының, Ӧӧркi Чӧптiң паза Ағбан городтың устағ-пастаа, «Ада чир-суубыс арачылағҷылары» чыындының кiзiлерi, СВО ветераннары, оларның сӧбiре кiзiлерi паза «Хакасия матырлары» проект араласчылары араласханнар.
– Пiстiң чон ынархазынаң паза пiрге тудынчатханынаң хаҷан даа кӱстiг полған – ол чааларда чиңiс тутхан, хазнаны хатап кӧдiрген, науканы, ӱгредiгнi паза имнег киреен тилiткен. Пӱӱнгi мероприятие чонның пiрге тудынчатханын паза чахсы пiлiсчеткенiн киречiлепче. Анзы хада-пiрге тоғыс толдырчатханынаң, удур-тӧдiр хабасчатханынаң, чағыннарға сағыссырапчатханынаң паза пiстiң тархыныбысты пiлчеткенiнең кӧрiнче, – таныхтаан Хакасия пазы Валентин Коновалов.
Городтың Культура паза тынағ паркы олаңай ла тынанҷаң орын нимес, ол Ағбан город чуртағҷыларының паза аалҷыларның тусты чахсы иртiрҷең хынған орны полча. Иртiрiлчеткен субботник – паркты уламох арығ паза истiг идерiне хаалағ. Ӧӧркi Чӧп кнезi Сергей Сокол пӱӱнгi араласчыларның тоғызы тикке парбас тiп таныхтаан. Арығ паза иптiг кӧрiмнiг парк, чайғы тоозылғанҷа кiзi хараан ӧрiндiрiп, арығ поларына iзенчеткен. Анаң, тусты тикке иртiрбин, прайзын тоғынарға хығырған.
Устағ-пастағ чоох тутхан соонаң прай араласчылар, тырбостар паза хаптар тудынып, тоғынып пастааннар. Тоғынчатхан улустың кӧңнiн кӧдiрiп, паркка толдыра чир-суубысха чарыдылған кӧглер «чайылған».
Субботник араласчылары тоғынчалар
Пу мероприятие Ағбанның Культура паза тынағ паркында олаңай ла иртiрiлбинче. Халғанҷы чылларда парк «Городтың истiг орыннарын тӧстирi» федеральнай проектте араласча. Iди олған паза спорт площадкалары нааҷылалған, парк iстiндегi чолыҷахтар иптелген, наа сцена паза трибуна пӱдiрiлген паза сомҷаң орыннар иптелген. Таныхтирға кирек, ӧӧнi – парктың иптелгенi ле нимес, че iдӧк ол орыннарны андағох хайраллап халары паза иптiг тудары.
– Кибiрли часхы мероприятиелерiн пiс субботниктернең асчабыс. Пiс аны Ағбан городыбысты арығлирынаң пастабысхабыс. Ағаа хоза, мероприятие, прай араласчыларны пiрiктiрiп, удур-тӧдiр чағын танызып, чоох алызарына паза арығ киинең тынып аларына кӧстеглiг. Хай пiрее сағыссыратчатхан сурығларға нандырығлар алып аларға чарир, арса, оларны пирерге килiспинче. Ол санда сурығларны устағ-пастаға пирер оңдай полар. Пӱӱн мында аарластығ устағҷылар Хакасия пазы Валентин Коновалов, Ӧӧркi Чӧп кнезi Cергей Сокол паза Ағбан город пазы Алексей Лёмин араласчалар.
Мындағ оңдайнаң иртiрiлчеткен субботниктер республиканың муниципальнай пӱдiстерiнде иртерӧк. Полған на СВО ветераны, анда аралазып, позының хозымын ит полар, – чарытхан «Ада чир-суубыс арачылағҷылары» чыындының Хакасиядағы пӧлиинiң устағҷызы Оксана Трусова.
Субботник араласчылары Культура паза тынағ паркының пастағы тахта кистiндегi ачығын сӧп-саптаң арығлааннар. Кем-де тырбоснаң пӱрлер тырбаан, кем-де чирде чатчатхан салааларны теерген, хайзы-да похсахты хаптарға суххан. Паркта тоғыс чох турчатхан кiзi чох полған, прайзы хайынған.
Тоғыс аразында СВО ветераны паза «Хакасия матырлары» регион программазының араласчызы Цырен Димчиковнаң танызып алғабыс. Ол, регион проектiнде аралазып, Хакасияның юстиция паза регионға хорғыс полдыртпас киректерҷе министерствозында стажировка иртче.
– Минi кiчiгдең сығара тоғысха кӧнiктiргеннер. Олған туста пiс сыбыра субботниктерде араласчаң полғабыс. Таныхтирға кирек, мындағ мероприятиелерде прай даа палалар хынып араласчаңнар. Субботниктiң пӧгiнi чир-чайаанны арығлап салары ла нимес, iдӧк ынағлазып, ӧменең пiр чӧптiг тоғынғаны полча. Мин мындағ мероприятиелерде хынып араласчам, че пу чӧрiмге пастағызын на хозылдым. Мыннаң мындар сыбыра аралазарға сағыс тутчам. Культура паза тынағ паркында субботник иртiрiлчеткенi ӧрiндiрче, мин хонғанымнаң паза палаларымнаң пеер сыбыра килчем. Арығ паркта тынанарға даа истiг, аннаңар ол арығ ползын тiп сағынчам, – чоохтаан СВО ветераны Цырен Димчиков.
Iдӧк субботник тузында СВО ветераны Алексей Саражаковнаң танызып алғабыс. Ол Ағбан городтың чуртағҷызы полтыр, чӧрiмде пастағызын на араласпинча. Ол, ӧнетiн чаа операциязында служба апарған таныс ветераннарнаң чӧптезiп, субботникке кил парчаттыр. Мында пасха СВО ветераннарынаң танызып, оларнаң тоғазып, чоохтазып аларға оңдай полча. Ӧнетiн чаа операциязына Алексей Саражаков 2022 чылда оолғынаң хада парыбыстыр. 2024 чылда тың палығлатхан соонаң аны ибзер ызыбысханнар.
– «Ада чир-суубыс арачылағҷылары» чыындаа кiрчем, минiң анда кураторым пар. Iдӧк пiстiң пар организация «Ассоциация ветеранов СВО», мин аның тӧстегҷiлерiнiң пiрсi полчам. Ассоциация туза ағылчатхан улуғ тоғыс апарча тiп санапчам. Пiс СВО ветераннарына аймах социальнай, юридическай сурығларны пӧгерге полысчабыс паза даа пасха оңдайнаң хабазарға кӱстенчем. Имнег киреенең палғалыстығ сурығлар сығысча, оларны пӧкчебic. Iдӧк СВО-зар гуманитарнай хабазығ апарарында араласчабыс.
Субботниктер иртiрiлчеткенi орта тiп сағынчам. Мының алнында сыбыра иртiр турғаннар, анзын айландырчатханы – чахсы кирек. Чииттернi прайзын пу тоғысха тартарға кирек, чир-чайаанны хайраллирына нандырығлығ хайарға ӱгрензiннер. Мында кiзiлер чағын полчалар паза пiлiзерге дее оой пiлдiрче, – чоохтаан СВО ветераны Алексей Саражаков.
Тасхар чылығда паза кӱн салчатханда, тоғынарға даа истiг пiлдiрчеткен. Ырах нимес, ағастар аразында, «чазы кухнязы» турған. Анда iзiг чей паза чааҷылар кашазы тимнелген. Тоғыс соонаң прай араласчылар iзiг паза татхыннығ чиис чiп алғаннар.
Сомнар Илона Каковани паза Хакасия пазының пресс-службазыни
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
