Тӧремiл хайығда тударға
17.04.2026
Хабарлар
Муниципалитеттер устағҷылары чыылығда видеопалғалыс пастыра араласханнар
Селекторҷа чыылығ. Киҷее Хакасия правительствозының туразында республика пазы Валентин Коноваловтың устаанынаң муниципальнай пӱдiстер устағ-пастаанаң видеопалғалыс пастыра чыылығ ирткен
Ол суғ тазарынаң паза ӧрттер сығызарынаң хорғыс ағылчатхан тусты иртеріне чарыдылған. Пу сурығҷа сӧс Хакасияның ГО, ЧС паза ПБ хазна комитедiнiң кнезi Владимир Карамашевке пирiлген.
– Республикада часхыда суғ чайыларының iкiнҷi чардығы иртче, ол пус талалыбысханынаң палғалыстығ. Абаза хыринда Ағбан суғның тасчатханынаң палғалыстығ кирек алынҷа хайығда тудылча. Анда 11 хосхарда Ағбан суғдағы пус талал сыххан, аның сылтаанда узуны читi километр орында пус тығылыс парған. Аның ӱчӱн iкi дача пiрiгiзiнiң чирлерiнде суғ чайылған. «Лесник» пiрiгiсте 150 дача участогы паза «Черемушки» пiрiгiстiң 91 участогы суға кiр парған. Городтың чирiнзер суғ кiрбеен.
Абазада пуох кӱн 8.00 часта сағыбаан саай режимi кирiлген, ол ам даа тоғынча. Суғның синiн хайығда тудар тоғыс тыыдылған, чуртағҷыларға искiрiглер читiрер тоғыс апарылча. Дачалар пiрiгiстерiнде чуртапчатхан пис кiзi кӧзiрiлген. «Лесник», «Черемушки», «Строитель» дачалар пiрiгiстерiнзер чоллар чабылған, чуртағҷыларға тӱрче полҷаң орын азылған. Абаза устағ-пастаана хабазар пӧгiннең инженер-арачыланыс устанызы, кирек полза, дренаж каналынаң суғны ағызарға iкi насос станциязын ысхан.
Амғы туста Абаза хыринда суғның синi алысча, аның синчеткенi пiлдiрче. Пӱӱнгi кӱнге суғның синi 142 сантиметрге тиңнелче, 490 сантиметр хорғыс ағылчатханына саналча. Пус тығылыс парған орынның узуны 3,5 километрге тиңнелче. Дачалар пiрiгiстерiнең суғ парча, амғы туста 12 участокта суғ турча.
Iдӧк Алтай аймаандағы Хубачар аал хыринда Ағбан суғда пус тығылысхан орын полған, 14 хосхарда ол позы сайбал чӧрiбiскен, туралар чирлерiнзер суғ кiрбеен. Аннаң пасха, пус тығылысхан чир Таштып аймааның Аңчул аалы хыринда iлезiне сығарылған. Амғы туста хорғыс чоғыл. Тиксi республикада суғ чайылар тус пiр синнiг иртче, кирек тӧремiл хайығда тудылча, – искiрген комитет устағҷызы.
Абаза пазы Валентина Филимонова суғ кiрген участоктарда 15 хосхардаң тыхтағ тоғыстары апарылча тiп искiрген. «Энергетиктер сыныхтағ иртiрiбiскен соонаң дача пiрiгiстерiнзер чарытхы пирiлген. Дача участоктарында тӧремiл чуртапчатхан кiзiлер чурттарынзар айлан килгеннер. Оларға тураларын хурударға полысчабыс. Аннаң андар дача пiрiгiстерiнҷе комиссия тоғынып пастир», – теен ол. Город устағҷызы прай хабасхан кiзiлерге, ӱлгӱ органнарына паза ведомстволарға алғызын читiрген.
МЧС-тың Хакасияҷа ГУ пастығының орынҷызы Алексей Максименко Абазаның устағ-пастаа тоғызын пӧзiк паалаан. Прай кӧстеглерҷе тоғыс тузында паза чахсы апарылған теен ол.
Ӧрттер сығысчатханынаң палғалыстығ кирек iдӧк тӧремiл хайығда тудылча, сӧрӧн кӱннер турчатханы паза хар-наңмыр чаапчатханы ӧрт сығызарынаң хорғысты синдiрче тiп таныхтаан Владимир Карамашев. Ирткен неделяда чир-чайаанда сығысхан сигiс ӧрт санға алылған, анзы пылтырғы кӧзiдiглердең асхынах. 2025 чылда пу тусха 36 ӧрт сығысханы санға алылтыр. Ирткен неделяда ӱс ӧрт Харатаста сығысхан, Ағбан пилтiрiнде паза Саяногорскта – iкiлер ӧрт.
Алынҷа кӱннерде чир-чайаанда улуғ ӧрттер сығысханы таныхталған. Iди 13 хосхарда андағ ӱс улуғ ӧрт ӱзiрiлген – Ағбан пилтiрi аймаандағы Тазоба пилтiрi, Расцвет аалларда, «Весна» дачалар пiрiгiзi, Харатас город хыринда. Таныхтирға кирек, пӱӱл чир-чайаанда сығысхан ӧрттер саны ирткен чылдағызынаң 12 %-ке тӧбiн. Ирткен чылда пу тусха 144 ӧрт санға алылған полза, пӱӱл – 127. Iдӧк кӧйген чирлернiң синi хызырылған.
Тиксi чыл пасталарынаң Хакасияда 582 ӧрт сығысханы санға алылған, ирткен чылда пу кӧзiдiг 2 %-ке тӧбiн полған – 571 ӧрт. Ӧрттерде пӱӱл 13 кiзi саайланған, ирткен чылда пу тусха ӧрттерде ӱреен пис кiзi саналған.
Килчеткен неделяда хараазын 0°... -10° полар тiп кӧрiлче, кӱнӧрте – ортымахти +5°...+10°. Чил полар, алынҷа кӱннерде хар-наңмыр чаар. Тынағ кӱннерде +14° читiре чылир тiп искiрчелер.
Хакасия пазы Валентин Коновалов город-аймахтар пастарына чылығ турыбызар тусха паза Хара нымырха кӱнiне удур маневреннай, сыныхтағ ӧмелерiнiң тоғызын тыыдарға, суғ чайыларын, ӧрттер сығызарын тӧремiл хайығда тударға чахығ пирген.
Сом r-19.ru сайттаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
