Хакасияда килкiм предприятиелер тоғыстарын чахсы апарчалар
15.04.2026
Хабарлар
Россияның экономика тилізі министрі Максим Решетников «РУСАЛ САЯНАЛ» предприятиеде пол парыбысхан
Тоғыс чорығы. Пу кӱннерде Хакасияда Россияның экономика тилiзi министрi Максим Решетников тоғынған. Ол республикадағы килкiм предприятиелерде пол парыбысхан паза пос киреенең айғасчатханнарнаң тоғасхан
Хакасия пазы Валентин Коноваловнаң хада Максим Решетников Сойан-Сус ГЭС-та паза Саяногорсктағы «РУСАЛ САЯНАЛ» предприятиеде пол парыбысхан. Анда олар производство тилiзiн, регионда алынҷа экономика орнын тӧстирiн ӱзӱргеннер. Пу проект федеральнай син хайиинда.
– Алынҷа экономика орны тӧстелгенi металлургияда, машиностроениеде паза металлообработкада наа производство тӧстирге оңдай пирер, ол санда высокотехнологичнай отрасльларға наа продукция сығарарға. Олар хазнаа импорттаң кӧмес позып аларға ла нимес, iдӧк регионның экономиказын тилiдерлер – наа тоғыс орыннары тӧстелер, налог синi ӧзер паза алюминий сығарызы алғыдылар, – таныхтаан чооғында Россияның экономика тилiзi министрi Максим Решетников.
Саяногорск паза Пии аймаа чирлерiнде тӧстелер алынҷа экономика орны регионның промышленнозын тилiтчең паза инвесторларны тартчаң орын пол парар тiп кӧрiлче.
Таныхтирға кирек, «Хакас технология ойымы» – ол чуртас-экономика тилізi программазының ӧӧн кӧстеглерiнiң пiрсi, хайзы Россия Федерациязының чарадии хоостыра чуртасха кирiлер.
Хакасиязар тоғыс чорығынаң килгенде, федеральнай министр Максим Решетников Хакасия пазы Валентин Коноваловнаң хада iдӧк республика идiнҷектерiнең тоғасхан. Анда кiчiг паза ортын пос киреенең айғасчатханнар араласханнар.
Хакасияда кiчiг паза ортын пос киреенiң саны сыбыра ӧсче (2025 чылда 881 субъектке хозыл парған). Iдӧк ол регион экономиказын чахсы саринзар алыстырча. Оларның cаны ниме-ноо сығарчатхан производстволарда, туризмде, наукада паза логистикада ӧсче. Анзына федеральнай министр Максим Геннадьевич алынҷа хайығ айландырған.
Таныхтирға кирек, амғы туста кiчiг паза ортын пос киреенде республикада чуртапчатхан ортын частығ чонның ӱзiнҷi чардығы тоғынча: 83,5 муң кiзi, анзы, тiзең, ирткен чылнаң тиңнестiрзе, алты муңа кӧп. Пу отрасльның хозымы орындағы бюджетке чылдаң ӧсче: 2025 чылның салтары хоостыра, пос киреенең айғасчатханнардаң республика бюджедiне 2,9 миллиард салковай налог кiрген.
Хакасия правительствозы идiнҷектерге паза предприятиелерге хабазарына алынҷа хайығ айландырча. 2017 чылдаң пасти МСП-ға хабазығ 10 хати алғыдылған, алынҷа отрасльларға налог ставказы нииктелген. Ирткен чылда ла Хакасияның промышленность тилiзi чыындызынҷа предприятиелерге хабазарына 730 миллион салковай ызылған.
Россияның экономика тилiзi министрi Максим Решетников идiнҷектерге пӱкӱлее хабазығ пирiлчеткенiн пӧзiк паалаан. 2025 чылда республика идiнҷектерi льгота программаларынҷа 1,3 миллиард салковай тартып алғаннар. Ол льготалығ кредиттер паза микрозаймнар. Ағаа хоза полған на 10-ҷы идiнҷек «Минiң пос киреем» кiннең полызығ ал полған. Анда пос киреенең айғасчатханнарға кирек пiчiктер тимнирiнең, чӧптернең паза хазна полызығларын аларынаң полысчалар.
Хайди искiрген тоғазығда Максим Решетников, Россияның правительствозы пос киреенең айғасчатханнарға хабазығ пирерiн алыстырар: амды алынҷа отрасльларнаң айғасчатханнарға улуғ хайығ салылар паза хайзылары регионның экономиказын алыстыр поларлар. Ӧӧн кӧстеглер санында туризм, креатив индустриялары, технологическай паза производственнай бизнес. Мындағ хабазығлар чахсы салтарлар кӧзiтчелер. Хакасияда туризм чахсы тилiпче – республикада пол парыбысхан туристтернiң cаны 16,5%-ке ӧс парған. Пу кӧстегнi аннаң андар тилiдер пӧгiннең, республикада модульнай гостиницалар пӱдiрiлчелер, килкiм отельлерге льготалығ кредиттер позыдылча.
Алынҷа чоох парған кiчiг бизнессер арған сағысты кирер технологиядаңар. Максим Решетниковтың искiриинең, чағдапчатхан туста килкiм IT-компанияларнаң чоохтазығ иртер. Ол пос киреенең айғасчатханнарға арған сағысты кирерiне чарыдылар.
Хакасия пазы Валентин Коновалов Россияның экономика тилiзi министрi Максим Решетниковха пос киреенең айғасчатханнарнаң азых, тузалығ чоохтазығ апарған, республикаа хайығ айландырчатхан ӱчӱн алғызын читiрген.
– Пӱӱн пiс Хакасияда кiчiг паза ортын бизнес чахсы тилiпчеткенiн сизiнчебiс. Пiс кӧрчебiс, хайди пiстiң идiнҷектерiбiс регионны алнынзар тартчалар, аны чахсы саринзар алыстырчалар: республикада наа тоғыс орыннарын тӧстепчелер, туризмнi паза амғы технологияларны тилiтчелер. Пiстiң амғы ӧӧн пӧгiнiбiс – аны хайраллап халары ла нимес, iдӧк пос киреен азарға сағынчатханнарға полыс пирерi. Пу тоғысты наа ла пастапчатханнар хазна хабазиин сизiнзiннер паза сағынған сағыстарын, мында, тӧреен чирде, чуртасха кирзiннер, – таныхтаан Хакасия пазы Валентин Коновалов.
Хакасияда тоғынчатхан килкiм предприятиелер тоғысты чахсы апарчатханда, кiчiг паза ортын бизнеске хабазығ пирiлчеткенде, регионның экономиказы чахсы тилiпче тирге чарир.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
