Сталинге хумартхы тас турғызары пӧгілче
08.04.2026
Хабарлар
Сурастырығ. Пу неделя тооза тиксі республикада Ағбандағы Чиңіс паркында Иосиф Сталинге хумартхы тас турғызарынҷа сурастырығ иртче
Совет Союзының ӧӧн политика, хазна, чаа паза партия устағҷыларының пірcі Иосиф Виссарионович Сталин полча. Илбек Ада чаа тузында Иосиф Сталин СССР-ның Тирігліг Кӱстерінің Ӧӧркі Ӧӧн командующайы полған. Аның адын Ағбанда хумартхылирынҷа пастағнаң Илбек Чиңістің 80 чыл пайрамы таныхталған чылда «Чаа палалары» тиксі Россиядағы халых пірігізінің региондағы пӧлии сыххан. Килістіре орынға Ағбандағы Чиңіс паркын санапчалар. Паза пір танығ – хумартхы тасты чайирына, аны турғызарына бюджет ахчазы киректелбес. Пастағҷылар ол кӧстеге ахча чыып пирерге тимделер.
Пу пастағны чуртасха кирер ӱчӱн, 6-10 хосхарда Хакасияның Халыхтар палатазы, полызыға волонтерларны тартып, тиксі республикада халых ӱзӱріглерін паза сурастырығлар иртірче. Ӱн пиріс чаҷынында ӧӧн сурыға ікі нандырығның: я паза чох – пірcін таллирға чарир. Ӱн пиріс 10 хосхарға теере иртер, 11 хосхарда, тізең, сананыс комиссиязы ӱннерні санир.
Салтарлар 13 хосхарда чарлалар. Сурастырығ городтарда паза аймахтар кіннерінде МФЦ-да, чонға полызығ читірҷең пӧліктерде паза чонға тоғыс табарға полысчаң кіннерде иртірілче. Тиксі орыннарның адрестерін пу хабарның хысха ссылказында таап аларға чарир: https://oprh.ru/~n9Uu0.
Хакасия пазы Валентин Коновалов пу пастағнаң тиксі чарасча. Аның кӧрізінең, пістің хазнада полған на чуртағҷы тархынға аарласнаң хайарға кирек, Илбек Чиңіске улуғ хозым иткен Иосиф Виссарионовичтің адын хумартхылирынҷа чӧп, тізең, уғаа килістіре паза турыстыра сағыс.
Республика пазы пу сағыснаң чарасчатханын 7 хосхарда Л.Р. Кызласовтың адынаң Хакас национальнай чир-суғ ӱгренҷең музейде иртірілчеткен сурастырығда ӱн пирізінең киречілеен.
Сом Илона Каковани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
